aRo 15:1; 1Kor 8:9+, 9:22
cKol 2:16
dMt 7:1; Yems 4:11+
e1Kor 10:30+; 1Tim 4:3+
f2Kor 5:15; Ga 2:20; 1Pe 4:2
gPil 1:20; 1Tes 5:10
hMt 28:18+; Mbaŋ 2:36
iMt 25:31+; Mbaŋ 17:31
jIs 45:23; Pil 2:10+
kMt 12:36; 2Kor 5:10; 1Pe 4:5
lMt 18:6+; 1Kor 8:9, 10:32
mMk 7:14+; Mbaŋ 10:15; Tit 1:15
n1Kor 8:11+, 10:24+
oRo 15:13; Ga 5:22+
p2Kor 8:21
qMbo 34:14; Ro 15:2; Hib 12:14
rRo 14:14+; 1Kor 8:9,13
s1Yo 3:21

Romans 14

Isaav ighe zetaanŋa siriv titaghon eez ite pa ghuruuŋ ila toozi, ene tayau avoon pazi sov

Isaav ighe tamtamon eta ghuruuŋ ila tooni iyaryaaŋ geeg mako, ve ighe ilat tomani gham pa suŋuuŋ, na ayok pani, ve aghamu toman lolomim poia. Ayau avomim pani pa ŋgar tooni siriv tau ite rig pa ŋgar tsiam na sov. a 

Tamtamon siriv tighur ila tighe yes irau tighan gabua naol isov. Ve tamtamon siriv, ghuruuŋ ila toozi iyaryaaŋ geeg mako, ve tigham ŋgar tighe: Isaav ighe tighan gabua mizazi, ene pale igham zi tiŋgalaaŋ ila Maaron maata mako. Tauta tighanghan aniiŋ ve saiŋ mon.
(14:2) Saawe siriv, yes tau Yuda mako na, tirav sipsip ma makau imin watooŋrau pa maaron karomŋa toozi, ve timoz sirivu ila rumei toozi loolo, ve tigham sirivu ila nugh to raukoliiŋ, leso tamtamon tigholi. Ve eez toozi to ravuuŋ gabua, ene ite pa eez to yes Yuda. Yes tau tiroi pa ghaniiŋ gabua mizazi na, tiroi pa ghaniiŋ gabua tauvene.


Yes tau irau tighan gabua naol isov na, tivelegh zetazŋa tau tiroi pa ghaniiŋ gabua siriv na sov. Ve yes tau tiroi pa ghaniiŋ gabua siriv na paam. Tighita zetazŋa tau tighan gabua naol isov na, ve tighe yes tisosor sov. Pa yes paam, Maaron igham zi timin i le. c 

Ve yo sei ta ughe ugabiiz Ŋeer Tiina besooŋa tooni pa ŋgar tau tighamghamu na? Maaron tauu pale igabiiz zi. Isaav ighe ighit zi ighe tiduduuŋ, ma tisosor, ene i kaut tooni. Eemon i aat ighit zi ighe tiduduuŋ. Pasaa, i irau ipalot zi, leso tiyooz ariaaŋ ve titaghon ŋgar tooni. d 

Ve tamtamon siriv, yes tighita tighe saawe ee to suŋuuŋ, ene patabuyaaŋ iliiv saawe siriv. Ve tamtamon siriv tighita tighe saawe ta naol ne, ene raratezi mon ila Maaron maata. Ene poia. Tamtamon eŋaeŋa irau tigham ŋgar poi pa gabua tane, ve saa ŋgar tau tighita tighe ene iduduuŋ, o titaghoni. Yes tau tipatab pa saawe eta na, tighamgham tauvene to tipakur Ŋeer Tiina. Ve yes tau tighanghan gabua naol isov na, yes paam tipakur Ŋeer Tiina. Pasaa, saawe tau tighan, yes lolozi poia pani, ve tipaiti pa gabua tau i igham pazi na. Ve yes tau tighanghan gabua siriv mako na, yes paam matazi iŋgal Maaron. Tauta tighamgham tauvene, ve tipapaiti pa poia tooni toman lolozi poia. e 

Pasaa, lepoghaan, ene gabua to iit tauun mako. Ve mateegh toit paam, ene gabua to iit tauun mako. f 

Isaav ighe taleep, ene taleep to tabees pa Ŋeer Tiina, ve tapait eeza. Ve isaav ighe tamaat, ene taleep ila i niima. Tauvene isaav ighe taleep, ma tamaat, ene iit tooni mon. g 

Pasaa, Krisi imaat ve iburig muul, leso imin tiina pa tamtamon tisov. Yes mateegha, ve yes tau tileep matazi yaryaare na paam. h 

10 Tauvene puughu mindai ta yo ughe ugabiiz toŋvetaz tsio to Krisi, ve matam veleghin zi? Yo uwatagh mako? Murei, iit tasov pale tayooz ila Maaron naagho. Leso igabiiz ghiit, ve ighur atuya pait. i 

11 Saveeŋa tiboode pataghaaŋ wa tauvene:

“Yau Maaron tau naleep le alok. Ve avog iyaryaaŋ naghe:
Tamtamon tisov aat tiput aghezi payau ve tipait ghau,
ve tisaav ghazooŋa tighe yau Maaron tauu.” j 
12 Tauvene iit eŋaeŋa tasov pale tayooz ila Maaron naagho, ve tavotia ŋgar tau taghamu izi taan na ila tooni. k 

Tagham zetaanŋa titap pa ghuruuŋ ila toozi sov

13 Tauvene iit tagabiiz zetaanŋa ve tavelegh zi muul sov. Ve tagham ŋgar eta to tagham yes toŋvetaz to Krisi titap pa ghuruuŋ ila toozi, ma tapoon eez pazi pa Krisi sov. l 

14 Pasaa, Tiina toit Yesu ipaghazoŋai ŋgar tsiau le nawatagh kat tauvene: Gabua naol isov tau taghanghan zi na, tisov tiŋgalaaŋ ila Maaron maata. Eta saghati mako. Eemon isaav ighe tamtamon eta igham ŋgar ighe gabua eta iŋgalaaŋ ila Maaron maata mako, na iyamaan ghi. Pa ighe ighan gabua tana, ene i igham sosor. m 

15 Tauvene isaav yo ughan gabua eta ila toŋvetaz tsio maata, le ureu loolo, ene yo utaghon ŋgar to loloon pa tamtamon mako. Gabua tauvene, ughani sov. Pale uvaghamunia toŋvetaz tsio tau Krisi imaat pani na. n 

16 Tauvene isaav ighe yam agham ŋgar aghe gabua naol isov, ene popoia pa ghaniiŋ, ene poia. Eemon ayamaan gham. Pa aat aghan gabua tau zeetmimŋa siriv tirere pani na, mako tiyau avozi payam. 17 Isaav ighe tataghon pooz to Maaron, ene aat tagham ŋgar tiina pa saa gabua tau poia pa ghaniiŋ ma ghunuuŋ ne mako. Pasaa, pooz to Maaron ŋgara, ene vene: Tataghon ŋgar duduuŋa, itiŋa tavalupu ghiit tamin eemon, ve Avuvu Patabuyaaŋ igham ghiit taleep toman loloon poia kat ve loloon luuma. o 

18 Tamtamon tau ighe ibees pa Krisi itaghon eez tauvene, ene aat Maaron loolo poia pani, ve tamtamon paam tiyok pani tighe ŋgar tooni poia. p 

19 Iit aat tazuari ghiit pa ghamuuŋ ŋgar tau igham tamtamon tisov tileep poi toman lolozi luuma, ve tavapaloti ghiit pa ŋgar popoia siriv. q 

20 Tauvene yam avazorai gham pa gabua to ghaniiŋ sov. Pa aat avaghamunia uraat to Maaron. Onoon, gabua naol isov tiŋgalaaŋ ila Maaron maata, ve poia to taghan zi. Eemon isaav ighe tamtamon eta ighan gabua eta, ve igham iitete itap pa ghuruuŋ ila tooni, ene i igham ŋgar saghati. r 

21 Tauvene isaav ighe yo matam iŋgal ughe ughan gabua miiza, ma ughun vaen, ma ugham ŋgar ite paam tau irau igham toŋvetaz tsio eta itap pa ghuruuŋ ila tooni, na poia to upul ŋgar tana.

22 Gabua tauvene, isaav ighe yo ughur ila ughe poia, ma saghati, ene kaut to yamru Maaron. Isaav ighe tamtamon eta iyamaan ila loolo ighe ŋgar tau i itaghoni na, Maaron le saveeŋ pani mako, ene pale tintini. s 

23 Eemon isaav ighe tamtamon eta loolo ruru pa gabua eta ve ighani, ene i igham sosor. Pasaa, i ighur ila ve igham ŋgar tana mako. Ve saa ŋgar tau iit taghamu itaghon ghuruuŋ ila toit mako, ene isosor.

Copyright information for `TUCT