aMt 7:1+; Yo 8:7+
bRo 1:18
cIgham 34:6+; Ep 2:4+; 2Pe 3:9,15
dRo 1:18; Syg 6:17
eMbo 62:12; 2Kor 5:10; Syg 22:12
fMt 25:46
gMt 7:18; Ro 1:18; 2Tes 1:8, 2:12
hMbaŋ 10:34
iEp 6:9; Kol 3:25; 1Pe 1:17
jMt 7:21; Yems 1:22+, 2:22+
kMbaŋ 10:35
lYer 31:31+; Hib 8:10
mMbaŋ 10:42, 17:31; 2Kor 5:10
nMt 3:9; Yo 5:45; Ro 9:4+
oMt 15:14; Yo 9:40+
pMbo 50:16+; Mt 23:3+
qMt 5:27+
rEzek 36:20+; 2Pe 2:2
sGa 5:3
tRo 2:7,10; Ga 5:6
uMt 12:41+
vRo 9:6+; Ga 6:15; Pil 3:3; Kol 2:11+

Romans 2

Maaron pale igabiiz tamtamon tisov ve ighur atuya pazi

Aiyo, yo sei ta ugagabiiz tamtamon ve ughe yes sasaghatizi na, yau leg saveeŋ payo paam. Pasaa, ŋgar tau yes tighamghamu na, yo ughamghamu paam. Tauvene saveeŋ tau usiki pazi na, ene imuul pa taum. Ve yo irau upasakaal taum mako. Pasaa, yo ughamgham sosor raraate imin yes. a 

Iit tawatagh: Yes tau tighamgham ŋgar sasaghati tauvene na, Maaron pale ighur atuya pazi. Ve ighe i igham tauvene, ene iduduuŋ. b 

Ughita. Yo ugagabiiz tamtamon ve ughe yes sasaghatizi. Eemon taum utaghon ŋgar raraate imin yes tighamghamu. Mindai, ughe Maaron pale ighurghur ghom? Mako kat! I aat igabiiz ghom ve ighur atuya payo paam. Ughita. Maaron itotoi poia tooni tiina kat payo. Pasaa, i itatan aate, ve ighur atuya payo rekia mako. Mindai, matam veleghin poia tooni tawe? Ughilaal, ma mako? I igham tauvene, leso igham gherev payo, ve utoor ŋgar tsio. c 

Eemon ŋgar tsio iyaryaaŋ kat, ve lolom pa utoora mako. Ŋgar tau yo ughamghamu na, ene imin undoundou lem atuya pa saghati tsio. Mboŋ Murei, Maaron pale itotoi aatyavyav tooni ivot ighazooŋ, ve ighur atuya iyat duduŋai tamtamon eŋaeŋa sosor toozi. Saawe tana, aatyavyav tooni pale iŋarui ghom pa sosor tsio. d 

Maaron pale ighur atuya pa tamtamon eŋaeŋa itaghon ŋgar toz toz

Maaron pale ighur atuya pa tamtamon eŋaeŋa itaghon ŋgar toz toz. e 

Tauvene yes tau tiyooz ariaaŋ pa badooŋ pataŋani ve tighamgham ŋgar popoia, ve tizuari zi tighe le Maaron tauu ipait zi ve tileep tomania ila mbonari loolo irau saawe, ene yes aat tigham lepoogh poia ila tooni taghon taghon gha ila. f 

Eemon yes tau titaghon saveeŋ onoon mako, ve matazi iŋgal tauzi mon, ve tighamgham ŋgar tau iduduuŋ mako na, Maaron aatyavyav tooni tiina pale izaa toozi, ve ighur pataŋani pazi. g 

Tauvene tamtamon tisov tau tighamgham ŋgar sasaghati, ene pale pataŋani tiina tomania yavyavuuŋ igham zi. Pale igham yes Yuda imin maata, o yes tau Yuda mako anazi. 10 Eemon tamtamon tisov tau tighamgham ŋgar popoia, ene pale Maaron ipait zi, ve yesŋa tivalupu zi timin eemon, ve tileep poia ila mbonari loolo. I pale igham tauvene pa yes Yuda imin maata, o yes tau Yuda mako na anazi. h 

11 Pasaa, Maaron ivool to tamtamon eta mako. I ighamgham ŋgar raraate mon pa tamtamon tisov. i 

12 Onoon, yes tau Yuda mako na tikankaan pa tutuuŋ to Mose. Eemon isaav ighe tisosor ila Maaron maata, i pale ighur atuya pazi gha tilalez. Ve yes Yuda tileep ila tutuuŋ to Mose saamba, ve tutuuŋ tawe ighamgham pooz pazi. Tauvene Maaron pale igabiiz zi itaghon tutuuŋ tana. 13 Ve tayamaan ghiit. Pa loŋaaŋ tutuuŋ mon irau igham ghiit taduduuŋ ila Maaron maata ne mako. Iit aat tataghon tutuuŋ, o taduduuŋ ila i maata. j 

14 Onoon, nugh nugh tau Yuda mako na, tiwatagh tutuuŋ to Mose mako. Eemon muuŋ ve ilam, yes paam lezi ghilalooŋ igheen ila lolozi. Ghilalooŋ toozi tawe ta ighamgham pooz pazi imin tutuuŋ. k 

15 Ghilalooŋ toozi tawe itotoi ighe Maaron ibood tutuuŋ tooni ila lolozi wa. Tauta saawe tau tigham ŋgar saghati eta, tauzi tiyamaan tighe tigham sosor. Ve saawe tau tigham ŋgar poia, tiyamaan tighe lezi sosor mako. l 

16 Vaaru poia tau yau navovotia na, isaav tauvene: Saawe to Mboŋ Murei, Yesu Krisi pale igham uraat to gabizooŋ tau Taama Maaron ighuru ila niima na. Saawe tana, ŋgar ŋgozaaŋa isov to tamtamon pale ivot ighazooŋ, ve i ighur atuya pazi. m 

Yes Yuda timamalaaŋ pa tutuuŋ to Maaron

17 Yo sei tau uwaat taum ughe yo Yuda, na yau leg saveeŋ payo paam. Pasaa, yo unumeer tutuuŋ to Mose ughe igham ghom ududuuŋ ila Maaron maata, ve upapait taum ughe yo uwatagh katin Maaron. n 

18 Ŋgar tau Maaron loolo pani na, yo uwataghi. Ve gabua tau poia kat iliiv gabua naol isov, ene tutuuŋ ipaghazoŋai ghom pani gha ughilaalo wa. 19 Yo ugham ŋgar ughe ŋgar popoia ve saveeŋ onoon tau igheen ila tutuuŋ to Mose na, yo ughazooŋ pani wa. Tauta unumeer ughe yo irau utotoi eez pa yes tau matazi kumkuuma na, ve umin ghazooŋa pa yes tau tileep ila ndoroom loolo. Ve ughe upaduduuŋ yes kankanooŋa, ve upaghazoŋai yes tau ŋgar toozi ŋgaala soone na. o 

21 Laak, yo tau ughe upaduduuŋ tamtamon siriv na, puughu mindai ta upaduduuŋ taum mako? Ughita. Yo uvovotia saveeŋ pa tamtamon ughe tium sov. Ve mindai pa yo taum? Uyumyum, ma mako? p 

22 Ve usavsaav pa tamtamon ughe tighur boog sov. Taum ughurghur boog, ma mako? Ve ughe lolom pa maaron karomŋa rigta mako kat. Mindai, uum gabua eta to rumei toozi, ma mako? q 

23 Yo tau upapait taum ughe uwatagh katin tutuuŋ to Maaron na, mindai? Taum umalaaŋ pa tutuuŋ tawe rigta mako? Pa ighe umalaaŋ pani, ene yo uvaghamunia Maaron eeza. 24 Ŋgar tau ughamu na, tibood saveeŋa pataghaaŋ wa. Tighe:

“Ŋgar tau yam aghamu na, ene imin puughu pa nugh nugh tau Yuda mako na tisiksik saveeŋ veleghiiŋ pa Maaron.” r 

Ŋgar to ravuuŋ tamtamon warozi, ene gabua tauu mako. Gabua tauu, ene tataghon Maaron ŋgar tooni

25 Isaav ighe utaghon duduŋai tutuuŋ to Maaron, ene aat ŋgar to ravuuŋ warom iuul ghom. Ve isaav ighe umamalaaŋ pa tutuuŋ tooni, ene aat uraat to ravuuŋ warom imin kaut sorok, ve Maaron ighit ghom ighe yo raratem imin yes tau tirav warozi mako na. s 

26 Ve isaav ighe ŋeer eta tirav waaro mako, eemon maata kisin tutuuŋ to Maaron ve itaghoni, ene aat Maaron ighita ighe i iduduuŋ ila i maata raraate imin yes tau tirav warozi na. t 

27 Onoon, tutuuŋ tau tiboode na, yam Yuda awataghi, ve tirav waromim wa. Eemon isaav ighe amamalaaŋ pa tutuuŋ, na ayamaan gham. Pa yes tau tirav warozi mako, eemon matazi kisin tutuuŋ to Maaron ve titaghoni na, yes aat tipaghazoŋai sosor tsiam ivot ighazooŋ, ve Maaron ighur atuya tiina payam. u 

28 Isaav ighe tamtamon eta ipamir tauu ighe i Yuda, eemon itaghon Maaron ŋgar tooni mako, ene i Yuda tauu mako. Pasaa, ŋgar tauu to yes Yuda, ene gabua to loloon. Ve uraat to ravuuŋ tamtamon warozi tauvene paam. Ene gabua to uliin mon mako. Ene gabua to loloon. Maaron Avuvu igham ŋgar muŋgaana ilale, ve igham ŋgar paaghu ivot ila loloon. Gabua tauvene, tutuuŋ tau tiboode na irau igham pait mako. Tamtamon tau ighe gabua tauvene ivot pani, i aat igham ŋgar pa pakuruuŋ to tamtamon mako. I aat izuari ghi pa pakuruuŋ tau ilam pa Maaron mon. v 

Copyright information for `TUCT