aRo 3:5+
bKol 3:3+; 1Pe 2:24
cGa 2:20, 5:24
d2Kor 5:17; Ep 2:5+, Ep 4:22+; Kol 2:12
eRo 8:11; Pil 3:10+; 2Tim 2:11
fGa 2:19-20, 5:24; Kol 3:5
gRo 8:2; 2Kor 3:17; 1Pe 4:1
hRo 8:11; 2Tim 2:11
iMbaŋ 2:24; Syg 1:18
jHib 7:27, 9:28; 1Pe 3:18
k2Kor 5:14+; Ga 2:20; Kol 3:3+
lMbo 119:133
mRo 12:1; 2Kor 5:14+; Kol 3:5
nRo 7:4+; Ga 5:18; 1Yo 3:6
oRo 6:1; 1Pe 2:16; 1Yo 3:9
pYo 8:34; 2Pe 2:19
qYo 8:32; Ro 8:2
rRo 12:1
sRo 8:13; Pil 3:19
t1Pe 1:9
uGnp 2:17; Ezek 18:4; Yo 3:16; Ro 5:12; Yems 1:15

Romans 6

Iit tapaak Krisi pa mateegh tooni, tauvene tapul ŋgar saghati ileple

Aiyo, isaav ighe Maaron loolo isaghatin ghiit ve ireu sosor toit itaghon tauu poia tooni, ene pale tasaav mindai? Pale tanoknok ghamuuŋ ŋgar saghati, leso poia tooni tiina izaa toit? a 

Mako kat! Iit tau taghur ila to Krisi ne, tapul ŋgar saghati wa, imin yes mateegha. Pale tataghon eez saghati muul mindai? b 

Yam awatagh mako? Saawe tau tagham yaa, itiŋa Yesu Krisi tavalupu ghiit tamin eemon ve tapaako pa mateegh tooni. c 

Onoon kat, saawe tau tagham yaa, ene imin tamaat, ve titavi ghiit tomania Krisi. Leso laghooŋ tomania lepoogh toit imin paaghu, raraate imin Krisi imaat, ve Taama Maaron tapiri ipaburigini pa mateegh. d 

Isaav ighe tapaak Krisi pa mateegh tooni, ve lepoogh toit muŋgaana isov, ene aat tapaako pa burigiiŋ tooni paam, ve tagham lepoogh paaghu imin i igham lepoogh paaghu. e 

Iit tawatagh: Loloon muŋgaana, ene tiravu tomania Yesu izala ai pambarooŋ wa. Leso ŋgar saghati tau ipapazaagh ghiit ne tapiri isov, ve tamin besooŋa pani muul sov. f 

Tamtamon tau ighe imaat wa, ene ŋgar saghati tapiri irau ikisi muul mako. g 

Tauta iit taghur ila tauvene: Isaav ighe tapaak Krisi pa mateegh tooni, ene aat itiŋa Krisi taleep mataan yaryaare paam. h 

Iit tawatagh: Maaron ipaburigin Krisi pa mateegh wa, ve irau imaat muul mako. Tauta mateegh iŋgini muul mako. i 

10 Pasaa, i imaat pa sosor toit pai eemon, ve isov. Irau imaat muul mako. Ve aazne, i ileep to igham uraat itaghon Maaron loolo ve ŋgar tooni. j 

11 Yam tauvene paam. Agham ŋgar aghe: “Yei tau nipaak Yesu Krisi ne, nipul ŋgar saghati wa. Yei nimin yes mateegha tau irau tigham ŋgar saghati eta muul mako. Ve aazne, nileep to nigham uraat itaghon Maaron loolo ve ŋgar tooni.” k 

12 Yam awatagh: Murei, yam pale amaat. Tauvene apul ŋgar saghati igham pooz payam sov. Pale igherev gham ve ataghon ŋgar saghati tau lolomim ighaar pani na. l 

13 Aŋgin poghania anoŋamim siriv siriv, imin matamim, avomim, nimamim ma vene. Apul zi timin besooŋa pa ŋgar saghati muul sov. Muuŋ, yam aleep imin yes mateegha. Ve aazne, Maaron ipaburigin gham gha agham lepoogh paaghu ila tooni wa. Tauvene aghur taumim amin i le kat. Ve aghur anoŋamim siriv siriv tana tisov timin i le paam, leso timin besooŋa pa ŋgar duduuŋa. m 

14 Pasaa, yam aleep ila tutuuŋ saamba muul mako. Yam aleep ila poia to Maaron saamba. Tauvene ŋgar saghati irau igham pooz payam muul mako. n 

Iit tamin besooŋa pa ŋgar saghati muul mako

15 Mindai? Isaav ighe iit taleep ila tutuuŋ saamba muul mako, ve taleep ila poia to Maaron saamba, pale mataan sorok pa ghamuuŋ ŋgar saghati? Mako kat! o 

16 Yam awatagh mako? Isaav ighe aghur taumim ila tamtamon eta saamba, ve ataghon ŋgar tooni, ene yam amin besooŋa tooni. Isaav ighe amin besooŋa pa ŋgar saghati, ene pale igherev gham pa mateegh ve alalemim. Eemon isaav ighe amin besooŋa pa Maaron, ve ataghon ŋgar tooni, ene aat igherev gham pa ghamuuŋ ŋgar tau iduduuŋ ila i maata. p 

17 Muuŋ, yam amin besooŋa pa ŋgar saghati ve ŋgar tawe ighamgham pooz payam. Eemon iit tapakur Maaron! Pasaa, saawe tau tipaghazoŋai gham pa saveeŋ to Krisi, ve tighur gham aleep ila saveeŋ tawe saamba, yam aghur ila, ve aghe ataghon duduŋaini toman lolomim. 18 Saawe tana, Krisi ipas gham pa ŋgar saghati tapiri, ve amin besooŋa pa ŋgar duduuŋa. q 

19 Aazne, nasavia eez to Krisi izaa to ŋgar tau yes besooŋa tighamghamu na, leso iraurau payam to agham ŋgar pani. Aghita. Muuŋ, yam apul anoŋamim siriv siriv timin besooŋa pa ŋgar saghati. Tauta amalaaŋ pa tutuuŋ to Maaron, ve agham ŋgar naol tau iŋgalaaŋ mako. Ve aazne, yam aat ataghon ŋgar raraate, ve apul anoŋamim siriv siriv tisov timin besooŋa pa ŋgar duduuŋa to Maaron. Leso amin i le kat, ve ataghon ŋgar patabuyaaŋ mon. r 

20 Saawe tau yam amin besooŋa pa ŋgar saghati, ŋgar duduuŋa igham pooz payam mako. 21 Mindai? Ŋgar tau aghamu pa saawe tana, igham anooŋa poia eta ivot payam? Mako kat. Aazne, matamim iŋgal imuul ila pani, ve mayamim. Pasaa, ŋgar tauvene pale igham ghiit tamaat gha talaleen. s 

22 Eemon aazne, Maaron ipas gham pa ŋgar saghati tapiri, ve ŋgar tawe igham pooz payam muul mako. Ve yam amin besooŋa to Maaron wa. Tauta aghita anooŋa poia tauvene: Yam amin Maaron le kat, ve ataghon ŋgar patabuyaaŋ. Ve murei, yam pale agham lepoogh poia ila tooni taghon taghon gha ila. t 

23 Ŋgar saghati atuya, ene mateegh. Eemon iit tau tapaak Tiina toit Yesu Krisi ne, Maaron igham poghani ghiit, ve igham leen lepoogh poia tau pale iseeŋga taghon taghon gha ila. u 

Copyright information for `TUCT