1 Samuel 16

Iahova Bosei Deved Mei Be Suv Toto Hu

1 Samuel 16:1-7, 10-14

Vatei, Iahova mistal mi Samuel e biteni mini bitene, “?Ti ulonge isa ve Sol vuma ... ivus vilieh? Inou nasin ni ngamu tengan nave suv toto ti mun na mol-Isrel xil. E taxeak, uhur ti oel te na olip e uhe taon tahal Betlehem. E rute ak, ha uhe visal moletin tei, hisen Tiese, vengan xa inou nabosei horamue tei nan ngamu tengan mei ihe suv toto hu.”

Samuel misis rilomun ni bit, “?Nipol itep? Xosxa Sol ilongeong ni rin ak, xi mei ihas nou nimat.”

E Iahova bit rilomun ni mini bitene, “Uhur tutut buluk tova itel xatuk, e uhiteni xa xouk ode rute ak tengan osa sanien eo tei vaha mi Iahova.
Ti, usilasil ni Tiese imei e sanien ak, e inou nihit naha xa xouk upol ni. Moletin xa nipisen ni minuk, utah oel xat vatin tengan ipisen ni xa xi iaxa mei ihe suv toto hu.”

Ma Samuel pol ni naha xa Iahova tehiteni mini e be Betlehem. E rute ak, melele xa eilep xil te taon ak lapusi bemei, lamei visali del ulikanen e lasisi labit, “?Provet, omei tengan ovit neta tova xa bos mu tova xa misa?”

Xi bit rilomun ni mi xil bitene, “Bos tang. Inou namei tengan nasa sanien tei vaha mi Iahova. Ma xamim ha musak moten meulien namim, ti, mutilomun mumei.” Di, misilasil ni Tiese del horamue nan xil tengan limei mei isak moten xil, ti, liha ve sanien ak.

Melele xa Tiese e horamue nan xil mei lastal, Samuel pus ngan xa be muimol nan xa hisen Eliab, e xi bit tasen ni xi bit, “Reitin mak, moletin xa misoh da xiak, xi vari iaxa Iahova tehosei.”

E Iahova biteni mini bitene, “E-e, inou nasin ngan xai. Onanem ti usil ve moletin, e rin xa be teviei midep mu valnaon bos midep. Inou natalepis moletin ti taxoni moletin xil te ut etan. Moletin xil di laketeh lapus ve moletin tang, e inou naketeh kiril e nenemien e sexien xil nan.”

10 Nggo suse ak, Tiese mileh natneli xil xa labe lu he sav (7) e mei pisen xil mi Samuel. E Samuel biteni mini bit, “E-e, Iahova tahosei ti tova e ngan xil xai.” 11 Di, xi misisi bit, “?Natumali tova da tamu?”

Tiese bit rilomun ni mini bit, “Ngan xa tasite e xil da tamu, e xi di milaxat sipsip xil tang.”

Samuel biteni mini bit, “Silasil ni vamei inggak. Rinatotan ti mu ituxoh melele xa xi imei.”

12 Ma Tiese misil moletin tei ba ngguri bemei. Melele xa bemei, Samuel pusi xa xi be horam maxoe xa ven mae pupu e valnaon bos. E Iahova biteni mi Samuel bit, “!Xi vari xai! Umea utah oel xat vatin tengan ipisen ni xa xi iaxa mei ihe suv toto hu na mol-Isrel xil.”

13 Ma Samuel nggur oel te olip e mitahi xat vat Deved e pe met tuneli xil. Vatakes, Ninin Eo na Iahova bemei polu e Deved e di mini melengien ak ba. Di, Samuel pol ni sanien nan mi Hi, e dilomun be tim san e Ramah.

14 E mi Sol, Ninin Eo na Iahova be relingi, e Hi misa xoles ninin tesa ba ni xa misak ni minexo pupu.

Copyright information for `TVK