1 Samuel 3

Iahova Mistal mi Samuel

1 Samuel 3:1-21

E melengien nen xil ak, melele xa Samuel di tepol mi Iahova pe he Ilae, Hi tenasepin pupu ti mi moletin xil e tenapisen pupu ni ti nenemien nan vaxo metuveen xil.

E vongien tei, Ilae, xa sangas meten vavar, di pat e von paten nan. E Samuel, xi di pat e vangit Nim Tavolin na Hi, e rute xa de sangas visal Bokis te Hitxatien. E laet xa misoh da en di tamu pili vengan xa ut talan ti mu. Di, Iahova mikes Samuel bit, “!Samuel, Samuel!”

E xi bit rilomun ni bit, “!O-o!”
Di, miloh be visal Ilae e misisi bit, “?Midep? ?Xouk iaxa di okes nou? Inou iaxale.”

E Ilae biteni mini bit, “E-e. Inou natakesuk ti. Ha mun pat.” Ma Samuel ba mun pat.

Di, Iahova mikes Samuel vatei mun, ma xi mitamea be visal Ilae e misisi bit, “?Xouk iaxa di okes nou? Inou iaxale.”

E Ilae bit rilomun ni mini bit, “Horamue navan, inou natakesuk ti. Ha mun pat.”
Samuel takil ti xa Iahova iaxa di mikesi xiak vengan xa tenasepin ti mu mini.

Di, vatol nen, Iahova mikes Samuel. Ma xi mitamea, be visal Ilae e misis rilomun ni bit, “?Xouk iaxa di okes nou? Inou iaxale.”

Di, Ilae minem kila xa Iahova iaxa di mikes horamue ak
ma biteni mini bitene, “Ha mun pat. E xosxa rae ak di mikesuk mun, uhiteni uhit, 'Iahova, sepin. Moletin te polien nam di miteong.'” Ma Samuel ba mun e rong man.

10 Di, Iahova bemei misoh sangas visali e mikesi nggoni ngan taxa tepol ni tuei bit, “Samuel, Samuel.”

E Samuel bit, “O-o. Sepin vengan xa inou, moletin te polien nam, di nateong.”

11 Ma Iahova biteni mini bit, “Uteong. Navehi ti, nipol ni neta tei mi mol-Isrel xil xa isa pupu. Isak ni moletin xil vus xa lilongeong ni, iexil ivon. 12 E melele nen ak, nipol vuol ni naha xil xa nabit xati tengan nipol ni iha xat pris Ilae e ngan xil xa ladi vatimol nan, e ieok nabong ni ti tova. 13 Inou natehiteni ngamu mi Ilae xa nisa pangasien mi vatimol nan xil xa hoxalite teni ihe tovuol vengan xa horamue nan xalu lutepol tesa teha xat nou, e sepinien e sexien nalu. Pris Ilae tekil naha xa lutepol ni, e tenasikoe xol xalu ti. 14 Misak ni nabit xati nggeih mi Ilae e ngan xil xa langgo vatimol nan xa sanien eo eah mu re vongoro tova mu neta sav tova mun misakras vari vata xoteh longpangasien xa nisa ni mi xil ve tesaen xil nae.”

15 Melele xa Iahova misepin bus, Samuel dat mak tang e rong man ba duxoh makoe. Di, mitamea e ba misah puiteh te Nim Tavolin na Iahova. Xi tave ti vapus Ilae vengan xa ulin mikan tengan vahit rat metuveen nan mini. 16 E Ilae mikesi bit, “Natuxoli Samuel, amei mu.”

Ma bemei e bit, “?Io, okes nou?”

17 Di, Ilae misisi bit, “?Iahova tehit naha minuk? Onasoson ti neta ra nou. Maxani, Hi isa pangasien minuk ixeih pupu, xosxa onavit vuol ni holesok xil ti xa xi tehiteni minuk.” 18 Ma Samuel bit vuol ni holesok xil vus mini, tasoson ti vari neta. Ma Ilae biteni bit, “Xi be Iahova. Bos xa xi ipol ixoni ngan xa xi pusi bit momal.”

19 Melele xa Samuel di matu, Iahova de sangas visali e di pol ni holesok xil vus xa Samuel tehiteni mei mistal be reitin. 20 Ma mol-Isrel xil vus, e taon tahal Dan e rin tei te kantri ak ba duxoh taon tahal Bersiba e rin sav lakila xa Samuel be provet reitin tei na Iahova. 21 Misak ni, e taon ak tahal Saeloh, Iahova di nggulehi di mistal mi Samuel e di misepin mini. E melele xa Samuel di misepin, mol-Isrel xil vus lateong xati.

Copyright information for `TVK