2 Samuel 11

Deved Nggur Soson Atou na Moletin Sav

2 Samuel 11:1-17, 26-27

E melele xa melengien xil te us mei mitavi e suse xil bos rilomun, Deved misil Soab del moletin te vaeen xil vus tahal Isrel del vat nae xil tengan ha lipol ni vaeen itel mol-Amon xil. Ma xil laba, vengan xa ngan ak be melengien xil xa suv toto xil di laba del moletin nae xil tengan lavae. E moletin xil na Deved labas vin mol-Amon xil e lakapis xol taon nae tahal Raba. E Deved tava ti, xi dat Serusalem.

Vatei, e mahis, Deved ba pat. E melele xa mea rilomun, xi mikakao be nesao e nim man e von ngengelen tei. E rute ak, miketeh be nim sav tei e pus atou tei di minggul. Xi pusi xa atou ak bos xa bos. Ma xi misil moletin tei nan ba tengan vakil ti xa atou ak be visi. E xi mikameti xa atou ak, hisen Batsiba. Xi be atuli na Eliam e miteli nggur Uraea xa be ngan Hit tai. Di, Deved misil rut eloheoh nan xil tengan va lavur atou ak vamei visali. Melele xa Batsiba bemei visali, xi ngguri e ba pat dela. (E melele xa Batsiba temei, xi tekas moten xi ngamu ve meseien na atou xil xa tevus rani.) Di, atou ak dilomun be tim san. Dutou ni, atou ak pus kila xa xi di xoteh aveti. Ma xi misa mesen ni ba ni suv toto Deved.

Ma ve rin ak, Deved misa sepinien nan ba ni Soab bitene, “Usil Uraea, moletin tahal Hit, itilomun imei visal nou.” Ma Soab misila be visal Deved. Melele xa Uraea mei mistal, suv toto Deved misisi xa Soab e moletin te vaeen nan xil ladi bos tang, e vaeen ba da midep. Di, xi biteni mi Uraea bitene, “Bos. Uha ungel ti mu tim sam.” Ma Uraea ba, e Deved misa sanien tei be tim san. E melele xa Uraea ba, tava ti tim san. Xi ba sung e pat visal puiteh te nim ma suv toto del mereketeh xil na Deved. 10 Melele xa Deved milongeong ni xa Uraea tava ti tim san, xi ba e misisi bit, “Otekesae ra tim nousav. ?E taxeak xa odilomun omei, veneh ma otava ti tim?”

11 Uraea bit rilomun ni mini bit, “!Suv, nasakras! Taxeak, mol-Isrel xil e mol-Sudah xil dit lapat e horao xil. E Bokis te Hitxatien na Hi di pat e nim tavolin tei tang. Eilep navan, Soab, del vat te vaeen nan xil, dit lapat e valkesao. Ma tamal ti tengan name tim savan, mei namanien vahos, namun e napat vatel atou navan. !Inou nabit xati nggeih minuk xa inou nasakras napol ni vamak!”

12 Ma Deved biteni mini bit, “Ma uta tak melengien tei mun, e visuvong, nisa rilomun ni xouk uha.” Ma Uraea dat e Serusalem melengien nen ak bus, e melengien tei mun. 13 Deved misilasil ni mei lungganien vituei e vongien nen ak, e pol ni mumun vuma ... mitalang pupu. E vongien nen ak mun, xi tava ti tim. Ba mun pat e von paten nan del mereketeh xil na Deved.

14 E makoe nen, Deved midis uvei tei na Soab, e misa ni mi Uraea tengan ihuri iha. 15 E uvei xa midisi biteni mak bit, “Uling Uraea isoh itiamu ni moletin te vaeen xil e rute xa vaeen nggeih pupu. Ti, mutilitou mutimei tengan xi ha lihas vini.” 16 Ma melele xa Soab di mikapis xol taon tahal Rama, xi misi Uraea ba de rute tei xa mikila bit elu nae xil langgeih en. 17 Melele xa moletin te vaeen xil lastal langgo taon ak lamei labae del moletin te vaeen xil na Soab, xil labas vin rut moletin te vaeen xil na Deved, e Uraea mun mat.

26 Melele xa Batsiba milongeong ni xa tiramue nan labasi mat, xi milonge misa pupu e di midesi. 27 Melele xa melengien xil te tangen xa labe lu e he sav (7) mei mitavi, Deved misilasil ven. Ma xi mei be nim na suv toto e bemei be atou nan. Dutou ni, xi miling horam malohos tei nan. E Iahova minem misa ve naha xa Deved tepol ni.

Copyright information for `TVK