2 Samuel 7

Iahova Pol ni Hitxatien te Xeih Del Deved

2 Samuel 7:1-5, 8-17

Melengien xil mei mitavi, e Deved da bos tang e nim xa eilep na suv toto e hal Serusalem, e Iahova misak ni elu nan xil latavae ti mun vatela. Di, vatei, suv toto Deved biteni mi provet Netan bitene, “?Upusi? Taxeak, inou nade nim tei xa bos xa lapol ni ni vatit sida. E Bokis te Hitxatien na Hi dat e nim tavolin tei tang.”

Ma Netan bit rilomun ni mini bit, “Bos tengan upol ni naha xa di onemi vengan xa Iahova di minuk vehakut.”

Di, e vongien nen tak, Iahova biteni mi provet Netan bitene, “Uha uhiteni mi moletin te polien navan Deved xa nabiteni mini mak nabit: 'Nave xouk ti iaxa upol ni nim tova mavan tengan ha nita en.'

“Uhiteni mun mini xa inou, Iahova, nabiteni mini mak nabitene, 'Inou, natehur ratuk ra rute xa di otelaxat sipsip xil en, e natelinguk mei otehe vat tengan ulaxat moletin navan xil tahal Isrel. Inou nateti minuk e rute xil vus xa oteha en. E melele xa di otehe vaeen, inou di natehas vin elu nam xil. Inou nipol ni hisom mei ihe eilep pupu ixoni his vat sav xil te ut etan xa latehe eilep pupu. 10 Inou nabosei rute tei xa niling moletin navan xil tahal Isrel ha liti en. Inggak, nisak ni xil liti kat tang e tomat e kantri nae xati. Ngan xil xa labe elu ni xil, linapangei xil ti mun 11 naxoni naha xa latepol ni mi xil e melele xa latemei rohon e tan ak. E melele xa nateling rut moletin xil te lepisien mei latelaxat xil, mei duxoh xosali ak. Reitin, inou, Iahova nabit xati minuk xa nisak ni elu nam xil linavae ti mun natelak.

Inou, Iahova, nabit xati minuk Deved xa nisak ni vatimol xil xa listal lixo xouk ti liso rin ni lelaxatien nam mi mol-Isrel xil.
12 Melele xa xouk umatu kuhi e umat, xil litihinuk ute sangas visal avu nam xil. Ti, inou nisak ni horamue tei xati nam mei ihur xoles voninom ihe suv toto. E nipol ni isoh ixeih e lelaxatien nan. 13 Xi iaxa ipol ni nim xa inou nita en. E inou, nipol ni lelaxatien na ngan xil xa listal e vatimol nan iloh sal ha vuma ... hoxalite teni ihe tovuol. 14 Inou nipol ni mini ixoni ngan xa xi be horamue navan e inou nabe tamen. Xosxa ipol isa, inou nisa longpangasien mini ixoni ngan taxa tata misa longpangasien mi horamue nan tengan vamal ni. 15 E ninahur rat eheien navan ti rani naxoni ngan xa natepol ni mi Sol xa natehur rati tengan xouk mei uhur voninen mei uhe suv toto. 16 Inou nisak ni vatimol nam xil xa listal e xouk liti vehakut, e xil ti lilaxat mol-Isrel xil ixoni suv toto ha vuma .... hoxalite teni ihe tovuol.'”

Ma, provet Netan ba pus suv toto Deved e bit vuol ni naha xa Hi tehiteni mini ba mini.

17 

Copyright information for `TVK