Acts 10

Hi Pisen ni mi Pita xa Moletin Xil Ngasen Lakila Laneket

E taon tahal Sesaria, moletin tei da en xa hisen Konilias. Xi be ngan Rom tei e be vat na vanut moletin te vaeen tei xa lakes xil ni 'Ngan Itali xil'. Xi be moletin xa merere pupu ni Hi na Siu xil e di mot mini, xi del ngan xil xati xa ladi nim man. Vehakut, di misa tutouen mi Siu xil xa labe hoeo e di misis mi Hi. Vatei, e 3 klok mahis, Konilias di misis e tim san e pus neta tei xa nggoni metuveen tei. E metuveen ak, pus masxaxa tei na Hi bemei sangas visali e mikesi bit, “!Konilias!”

Melele xa pusi mak, Konilias mitemanin e ulin mikan pupu e bit rilomun ni mini bit, “Io, Suv. ?Okes nou?”

Masxaxa biteni mini bitene, “Hi milong sisen xil nam e mipus kil tutouen xa di osa ni ba ni hoeo xil. Holesok xil xa di opol ni nggoni sanien eo tei mi Hi xa von mikon.
Taxeak, usil moletin ti tengan lihe taon tahal Sopa e ha lipus moletin tei, hisen Saemon Pita, tengan imei tim sam. Xi de visal moletin tei xa di pol ni holesok xil ni hilbe buluk. Moletin ak, hisen Saemon e nim man de sangas ni tas.” Di, masxaxa ak be relingi ba. Ma Konilias mikes viton slev lu te polien nan del moletin te vaeen tei xa be mereketeh nan xa xi mun di mot mi Hi. Di, mitumul usil holesok xil xa testal mini, e di, misil xatel latobe Sopa.

E visuvong nen, sangas vahe piniae, moletin xatel ak latemei sangas ni Sopa. E melele nen tak, Pita be nesao e nim xa da en tengan vasis. 10 Mae nggati bit vanien, e anien tameses ti mu. E melele xa di lasak mese ni, pus neta tei nggoni metuveen tei. 11 E metuveen ak mipus tilang hat masel e neta tei nggoni kaliko xa mahulong lasae ni nggo kusute xatel nggo ut nesao bemei e ut etan. 12 E vangit kaliko ak, xi pus hisit vongoro sav xil, tetal xil, e tuman xil. 13 Melele xa pusi mak, milong rae tei misepin mini bitene, “!Pita tamea! Uhas ti xil e ua ni.”

14 E Pita misepin rilomun mini bit, “!Suv, nasakras napol ni vamak! E meulien navan, natakar pis ti mu holesok xil xa latamese ti mu xa tavos ti pe metom tengan lava ni.”

15 Rae ak misepin rilomun mini bitene, “!Naha xa Hi bit 'xi memese ngamu', xouk onanemi ti onahit 'xi tavos ti pe meten'!” 16 Sexien ak mistal mi Pita be vatol. Di, kaliko ak dilomun be ut nesao.

17 Melele xa Pita di tamu minem usil koute te neta xa pusi, moletin xatel xa Konilias tesil xatel, latkamet nim ma Saemon e latemei latesoh sangas visal puiteh te vioh. 18 Latsisi latbitene, “?Moletin tova dat inggak xai xa hisen Saemon Pita?”

19 Melele xa Pita di tamu minem usil naha xa tepusi, Ninin Eo mei misepin mini bitene, “Moletin tol mei latdi tak e di latallang ni xouk. 20 Uhe tan, uvue xatuk tengan uha ihe xamitel. Onanem pupu ti tengan ove xamitel vengan xa inou iaxa nasil xatel latemei.” 21 Ma Pita be tan e biteni mi moletin xatel ak bitene, “Inou iaxa di mutlang ni nou. ?Mutomei ve neta tova?”

22 Xatel latbiteni mini latbitene, “Vat namatel, Konilias, iaxa misil xametel matomei. Xi be moletin tei xa bos, di mot mi Hi, e Siu xil vus di lamerere pupu ni. Masxaxa eo tei na Hi mei testal mini e tehiteni mini iaxa misil xametel matomei ve xouk tengan umei tim san. Masxaxa ak bit bos xa xi ilong kil ti naha xa xouk ukila uhiteni mini.” 23 Ma Pita misis xatel tengan latipat tamu itela e nim ak.

Di, e makoe nen, Pita del rut moletin ngan xil tahal Sopa xa laneket, labue xat xil. Di, be xil laba.
24 E visuvong nen, e mahis, laduxoh Sesaria. E rute ak, Konilias di datil Pita, xi del rut vatimol nan e rut timue tehos nan xil xa tesilasil ni xil tengan limei. 25 Melele xa Pita be nim, Konilias mei mitingeiril pe meten e mot mini. 26 E Pita dal rati e bitene, “!Mea soh! !Inou mun nabe moletin tang!” 27 Ma Konilias mea e Pita dit misepin mini. Lukakao lube nim e Pita pusi xa ut pol ni moletin xil ngamu. 28 Ma misepin mi xil bitene, “Xamim vus mukil kuhi xa Rae na Siu xil bit masakras mavituei vatel ngan xil xa latave Siu ti. E Hi pisen ni tuei minou xa ninanemi ti ninahit moletin tova misa mu tamese ti. 29 Misak ni melele xa osa sepinien bit nimei, namaen ni e namei komanon. ?Ma nasis xamim, veneh ma musilasil ve nou?”

30 Konilias biteni mini bitene, “Melengien tol mitavi, e 3 klok mahis nggoni ngan taxa radi xiak, inou di natesis e nim mavan. varinga tang, napus moletin tei mising ni eising tei xa minehin pupu, mei misoh momal pe metok. 31 Xi biteni minou bitene, 'Konilias, Hi mikil xouk, di milong sisen xil nam e mipus kil tutouen xa di osa ni ba ni hoeo xil. 32 Taxeak, usil moletin ti xil lihe Sopa tengan ha lipus moletin tei, hisen Saemon Pita. Xi de visal moletin tei xa di pol ni holesok xil ni hilbe buluk. Moletin ak, hisen Saemon, e nim man de sangas ni tas.' 33 Mak iaxa natemanon nasa sepinien bat ve xouk, ma bos mak mu xa omei. Xamem vus mei madi vituei inggak pe met Hi Suv tengan xa muteong ni naha xa Hi misa ni minuk tengan xa mei uhiteni mi xamem.”

34 Di, Pita biteni mi xil bitene, “Taxeak, nakil kuhi sung mak xa Hi taketeh ti vahos ni Siu xil kestang, e pe meten, moletin xil vus lapin tang. 35 Hi memaal ve ngan xil vus xa di lamot mini e di lapol momal, tave ti neta xa xil labe moletin te rute sav xil. 36 Xamim mukil sepinien xa Hi misa ni tuei bat mi moletin xil tahal Isrel xa bit longeongen hos te tomat bemei mi xir nggo Iesu Kristo. !Xi be Suv na moletin xil ngasen! 37 Mukila ngamu sexien xil xa mistal mikapis e provins tahal Sudea. Testal kokot texo provins tahal Kaleli tetutou ni melele xa Sion di tesetu usil teriren xa di tepol ni mi moletin xil. 38 Mukila ngamu usil Iesu tahal Nasaret iaxa Hi tepol ni tepolu ni Ninin Eo e tesa xeihen mini. Iesu tekapis ut ngasen e di tepol ni polien hos xil e di tetal rerat ngan xil vus xa xeihen na Temat teti xat xil mei vexil temase. Xi tekila tepol ni temak vengan xa Hi teti visali. 39 Xamem iaxa matepus holesok xil xa di tepol ni e taon tahal Serusalem e rute sav mun e von ne Siu xil. Di, lasak ni temat melele xa lateti xati tete eivave. 40 Melengien tol tetavi, Hi tesak ni temea rilomun ra maten e mei testal 41 mi rut xamem tang xa Hi tehosei xamem ngamu. Reitin mak, dutou ni melele xa temea rilomun ra maten, xamem mateanien e matemun tetela. 42 Iesu tesep mae ni xamem tengan ti musetu ni longeongen hos nan mi moletin xil e musep kila xa xi iaxa be ngan xa Hi tehosei tengan ti ilepis moletin xil ngasen, ngan xil xa lameul ladi e ngan xil xa lalel tuei. 43 Provet xil vus di latesepin usili latehit moletin xil vus xa laneket e hisen, Hi iketeh ihos rilomun ni xil.

Ninin Eo Mei Polu e Moletin Xil xa Latave Siu Ti

44 Melele xa Pita di tamu misepin, Ninin Eo bemei polu e meulien na ngan xil xa di lataeong ni sepinien nan. 45 Siu xil xa laneket ngamu xa tehe xil mi Pita latexo Sopa latemei, xil lamesep pupu vengan xa lapusi xa Hi misa Ninin Eo nan mei polu e ngan xil mun xa latave Siu ti. 46 Lalong kila vengan xa lalong xil lasepin nggo sepinien xil xa tave nae xati ti e di lakikei lapet rat his Hi. Di, Pita biteni mi xil bitene, 47 “!Ngan xil ak, lapolu ngamu ni Ninin Eo nggoni xir tang! ?Mak, ma visi tova mikila vasikoe xol xir tengan rinaterir ni xil ti e oei?” 48 Misak ni, Pita misemae tengan literir ni xil e oei e his Iesu Kristo. Di, xil lasis Pita xatel tengan latiti melengien ihe vahis mun itel xil.

Copyright information for `TVK