Acts 14

Rut Moletin Xil Langgol Rerat Pol Xal Banabas ra Hal Aekoniam

Di, e Aekoniam, nggusil sexien matu nalu, Pol xal Banabas lube nim te pispisien na Siu xil e di lupispisi kuhi mi xil. Misak ni Siu xil holu del ngan xil xa latave Siu ti, mei laneket e Iesu. E rut Siu xil xa latake reitin ti e pispisien nalu, lasusu petine ngan tesav xil xa latave Siu ti tengan iexil vakat e lavae mi Kristin hu xil. Misak ni, xalu ludi be nousav e rute ak e ulixalu takan ti. Di lusetu kuhi mi moletin xil usil eheien hos na Iesu, e Suv di pisen ni xa sepinien nalu be reitin nggo xeihen xa misa ni mi xalu tengan lupol ni merekel xil e sexien sav xil xa tellep. Ma moletin xil te taon ak ladi pas xil be vanute lu: vanute tei langgusil Siu xil, e vanute tei mun langgusil eloheoh xalu.

Di, rut moletin xil xa latave Siu ti del Siu xil e vat nae xil, lapol ni lingxatien tei tengan lava ni xalu ha lavov vin xalu. Melele xa eloheoh xalu lulongeong ni lingxatien ak, xalu lulesae lube Laekonia, ba ludi taon xalu ak, Derbi del Listra, e ut nen xil mun xa di sangas. E rute xil ak, xalu di lusetu ni longeongen hos usil Iesu.

Moletin Xil tahal Listra Lanemi Labit Pol xal Banabas Lube Hi Lu

E taon tahal Listra, moletin tei da en xa misakras vakakao vengan xa len xalu tesa melele xa latepesi. Xi dotan tang da, di miteong ni sepinien na Pol. Pol pusi e pus kila xa neketen nan pipin tengan mikila ikakao. Ma miketeh momal ni 10 e mikei ba ni bitene, “!Xouk, umea soh!” Ma moletin ak but be nesao e mikakao. 11 Melele xa vanut moletin xil ak lapus holesok xil xa tellep ak xa Pol di pol ni, xil di lakei nggeih nggo sepinien nae tahal Laekonia labit, “!Xalu ak lube hi lu xa lutemei etan e lubiles xalu lumei lunggur tiei nggoni moletin!” 12 Ma xil lakes Banabas ni 'hi Sius,' e Pol ni 'hi Hermis' vengan xa Pol be tei e xalu xa di misetu holu mi moletin xil. 13 Sangas ni taon ak, nim eo tei da xa di lamot mi hi Sius en. E pris tei teni nggur longeongen, ma bemei visal puiteh te vioh te taon ak del xat buluk lu xa laso xol en hungovae de huraealu. Di, xi del vanut moletin xil ak labit lavas buluk xalu ak vahe sanien eo tei nae mi xalu.

14 Melele xa Pol xal Banabas lule kil naha xa xil labit ti lipol ni, xalu lulonge misa pupu. Ludal papas eising nalu e luloh lube hilaep te vanut moletin xil ak e di lukei nggeih lubitene, 15 “!Moletin xil! ?Veneh ma mupol ni sexien xil ak? !Xamel ak mabe moletin tang manggoni xamim! Mamei inggak tengan malsa longeongen hos na Hi mi xamim. Xi bit muviles ra nanao votei xil ak e mumot mini kestang. Xi iaxa meul e pol ni ut nesao e ut etan, pol ni tas del holesok xil vus xa ladi en. 16 Tetiamu, temae ni moletin xil tahal kantri xil ngasen tengan lihusil nenemien nae xil tang e ti limot mi hi sav xil. 17 E tave ti neta xa latakil ti, xi di pisen sexien nan xil mi xil nggo holesok hos xil xa di pol ni. Xi misa us mi xamim nggo ut nesao e mei mikas anien samim xil e naho e pol ni meul bos. Xi bos mak, e di misa pupu ni anien mi xamim e di pol ni mubesi xamim.” 18 Tave ti neta xa xalu luso sepinien xil ak, sangas lusakras lalosikoe xol moletin xil ak tengan linavas buluk xalu ti ak nave sanien eo nae mi xalu.

19 Rut Siu xil langgo taon tahal Pisitia-Antiok e taon tahal Aekoniam mei lastal e Listra. Lasep luvos vanut moletin xil ak tengan lanem vasa ni xalu. Ma xil langgov Pol e lalihi ba laso ni be reling taon nae vengan xa lanemi labit mat. 20 E dutou ni, moletin xil xa laneket e Iesu mei lakapis xole. Vatakes, xi mitamea e ladilomun lube taon tahal Listra. Ut milan, xal Banabas lube taon tahal Derbi.

Pol Xal Banabas Ludilomun Lube Antiok

21 Pol xal Banabas lusetu ni longeongen hos na Hi e Derbi e moletin holu mei laneket e Iesu. Di, ludilomun e suse nalu lumei Listra e Aekoniam. Di, lunggur sal ni lube Pisitia-Antiok. 22 E ut xil ngasen, ba di lusao ni moletin xil xa laneket e Iesu. Lupol ni nenemien nae nggeih mu e lusel xat xil tengan lisoh ixeih e neketen nae. Xalu di lupispisi mi xil lubit, “Ixo suse te longpangansen, ma rikila riha rihe ut xa Hi be Suv Toto en.” 23 E sias xil ngasen xa lusao ni, di luling elda xil tengan lilaxat xil. E diamu ni melele xa luba, di lubal ni anien e di lusis ba ni Suv Iesu tengan ilaxat kuh elda xil xa lateling neketen nae en.

24 Usil kakaoen nalu, lunggur xoteh ut xil tahal Pisitia e lube provins tahal Pampilia. 25 E rute ak, xalu lusetu ni sepinien na Hi e taon tahal Perka. Di, lube taon tahal Atalia. 26 E rute ak, lubut e tuturil tei e ludilomun lube Antiok. Rute ak iaxa moletin xil latsis xol xalu tengan Hi iti mi xalu e polien nalu e taxeak lumei e lupol vuol ni.

27 Melele xa mei lustal e Antiok, luleh viton ngan xil te sias te rute ak. Lutumul usil holesok xil xa Hi tepol ni texo polien nalu. Lusep kila mi xil xa Hi tesah suse mi moletin xil xa latave Siu ti tengan mei lineket e Iesu. 28 E ludi rute ak nousav nen li del xil.

Copyright information for `TVK