Acts 17

E Hal Tesolonaeka, Vat Xil na Siu Xil Lapol ni Moletin Xil Labae del Pol Xatel

Pol xal Saelas lukakao ba, lunggur sal ni taon tahal Ampipolis del Apolonia e mei lustal e Tesolonaeka. E rute ak, nim te pispisien tei na Siu xil da en. Pol be nim te pispisien ak nggoni ngan taxa di pol vehakut ni. E Sabat tol, xi di misep kil sepinien xil xa de Vanuvei na Hi mi moletin xil. Xi pisen ni memese mi xil xa Kristo xa Hi tehit xati tehit imei, xi ilong pangas xi, e ha imat. Ti, imeul rilomun ra maten. Pol biteni mak, “Iesu xa nasep usili mi xamim iaxa be Kristo reitin xa Hi tehit xati.” Rute xil laneket en, ma lamos del Pol xal Saelas. Atou xil holu xa labe vat na atou xil lamos del xalu, xil del moletin xil holu mun tahal Kris xa lamot mi Hi.

E melele xa rut Siu xil lapusi mak, lanem misa ni xalu. Ma laleh viton vatxeih tatei xil xa labe te suse tang tengan lamei labe vanute tei e lapol ni rumen xa eilep. E lasak ni xil lapol ni vaeen tei xa eilep e taon ak. Di, lalang ni Pol xal Saelas tengan laleh xalu lalomei pe met moletin xil. Labit ludi e nim ma Tiesen, ma ba langgulen puiteh te nim man. E melele xa latakamet xalu ti, xil langgur Tiesen del rut Kristin xil mun e ladel kakao ni xil mei lasoh pe met vat xil te taon ak. Di, lakei nggeih labit, “!Moletin xil ak lasak ni vaeen tova tang e rute xil vus! E taxeak, xil lamei e taon nar. E Tiesen xai di misoson xalu ludi nim man. Xil vus di langgur xoteh rae xil na suv toto nar tahal Rom vengan di labiteni labitene suv toto tei mun da xa hisen Iesu.” Melele xa vanut moletin xil del vat xil lalong sepinien xil ak, iexil mikat pupu ven. Misak ni vat xil lapol ni Tiesen del ngan tesav xil lasa vatu tei xa eilep mi xil. Di, labiteni mi xil labit, “Vatu xil ak be namim, e xosxa tua namim xalu lalipol ni neta tei mun xa isa, ma vatu ak ikesae reling xamim.” Di, lamae ni xil laba.

Moletin Xil tahal Beria Mei Laneket e Iesu

10 Melele xa vongien bemei, Kristin xil te rute ak lasil Pol xal Saelas lube hal Beria. E melele xa ba lustal e rute ak, luka sal lube nim te pispisien. 11 Lukameti xa moletin xil e rute ak iexil bei tengan lalong ti sepinien nalu mili ngan xil tahal Tesolonaeka. E melengien xil vus, laketeh be Vanuvei na Hi tengan lalepisi xa naha xa Pol biteni be reitin mu tave reitin ti. 12 Ma xil holu laneket e Iesu del eilep tatei xil tahal Kris del rut atou xil mun xa latellep tahal Kris. 13 E melele xa Siu xil xa ladi Tesolonaeka lalongeong ni xa Pol di misetu ni sepinien na Hi e Beria mun, xil lamei mun e rute ak. Mei labiles nenemien na moletin xil tahal Beria tengan iexil vat pangas xalu. 14 Vatakes, Kristin xil lasil Pol ba be bien tengan vahur tuturil tei. E Saelas xal Timoti ludit e Beria. 15 E ngan xil xa ladel Pol laba, ba labus tang e taon tahal Atens e lalingi e rute ak. Di, ladilomun labe Beria del xat sepinien nan xa ha lihiteni mi Saelas xal Timoti tengan laltemanon mei ihe xatel.

Longeongen Hos Ba ni Moletin Xil tahal Atens

16 Melele xa Pol di midatil rumali e Atens, xi milonge misa pupu vengan xa pusi xa nanao na hi sav xil labe holu tova tang e rute xil vus e taon ak. 17 Ma xi be nim te pispisien na Siu xil e di misep kil sepinien na Hi mi Siu xil del ngan xil xa latave Siu ti e laneket e Hi nae. E melengien xil ngasen mun, be von bovarangen e taon ak e di misepin del xat movotei xil xa lamei laba. 18 Rut moletin xil xa lamei e di langor dela labe tisa na vanut moletin lu, tei lakesi ni Epikiurias , e tei xalu mun lakesi ni Stoik . Xil lasis moletin xil usil pispisien na Pol labit, “!Ei! ?Unu xai bit ti vahit naha?”

Rut moletin sav xil labit rilomun ni mi xil labit, “Lehit ngan ak di misep usil hi sav tatei xil.” Xil di lasepin mak vengan xa Pol di misetu usil 'Iesu' e 'Meul Rilomunen'.
19 Ma lasis Pol tengan vamei e von totanen tei te taon ak xa lakesi ni 'Ariopakas'. Labiteni mini labit, “Mabit makil kuh ti pispisien hu eah nam iaxa di opispisi ni mi moletin xil. 20 Rut holesok xil xa xouk di obiteni be neta hu mi xamem e mabit makil ti koute teni.” 21 Xil labiteni mak vengan xa moletin xil vus tahal Atens e ngan xil xa ladi en xa latave hortan ti en, vehakut iexil bei xa ti latumul e ti lateong ni holesok hu xil xa di mistal.

22 Ma Pol be xil, e ba misoh pe met Kaonsel te taon ak e biteni mi xil bitene, “Napusi xa xamim, mol-Atens xil, e sexien xil vus namim, di mumerere ni hi namim xil. 23 Melele xa di nakakao e taon namim, di napus kila xa von moten xil namim labe holu. E nakamet hor tei sung xa latetis en labit, 'Hor na Hi xa Matakil ti.' E Hi xai xa di mumot mini xa mutakil ti, xi vari iaxa di nasep usili mi xamim taxeak. 24 Hi ak tepol ni ut etan e holesok xil vus xa di en, xi iaxa be Suv te ut nesao e ut etan. Xi tara ti e von moten xil xa moletin xil tang di lapol ni. 25 Xir rasakras ritutou ni ni neta tova, vengan xa xi vari tang iaxa be vatit meulien e di pol ni moletin xil e di misa holesok xil vus mi xil. 26 Nggo moletin tei takes, xi pol ni hisit moletin sav xil e miling xil latasil ladi ut ngasen e ut etan. Moletin xil ngasen, xi miling xat rute xil xa xil liti en e di buli xat melengien xil nae xa liti en ihe nousav itep. 27 Xi pol ni xil tengan ti lilang vesi, lilang vesi vuma ... xos ti e xil likameti, vengan xa Hi tara ti sotin ra xir. 28 Nggoni ngan taxa moletin tei biteni bitene,

'Nggo xeihen nan kestang, xir di rameul, di rakakao e di rapol ni neta ngan.'

Nggoni ngan taxa rut moletin te tisen xil namim latetisi latehit,

'Xir mun rabe horamue nan xil.'

29 Reitin, Hi pol ni xir xa rabe horamue xil xati nan rameul radi. Ma vengan xa ngak ak, rinanemi ti rinahit xi nggoni nanao tei xa tameul ti, xa moletin tang pol ni nggo gol mu silva mu hat nggo metisouen nan. 30 Tetiamu, e melele xa moletin xil latnakil ti mu Hi, xi tenasa pangasien ti ve hisit tesaen xil vus nae. E taxeak, xi di misemae ni moletin xil vus e ut ngasen tengan lihiles ra tesaen xil nae. 31 Xil lihiles meulien nae vengan xa xi teling xat melengien te lepisien tei ngamu. Tehosei moletin tei xa ilepis moletin xil vus e sexien tei xa momal. !Moletin xa Hi tehosei iaxa tepol ni temeul rilomun ra maten tengan xir vus rikila!”

32 Melele xa moletin xil lalong Pol misep usil moletin tei xa meul rilomun ra maten, rute xil lapol pepamen ni e rute xil labiteni labit, “Iemem bei malong xouk usep usil netak vatei mun mi xamem.” 33 Di, Pol be reling xil e von totanen ak. 34 Rut moletin xil lamos en e mei laneket e Iesu. Tei e xil tehe moletin tei te kaonsel te rute ak, hisen Daionaisas. Atou tei mun mineket en, hisen Damaris, del rut moletin sav xil mun.

Copyright information for `TVK