Acts 18

Pol Be Korin e Moletin Holu Mei Laneket

Dutou ni melengien xil xa Pol tete Atens, xi ba sung be Korin. E inggak, Pol ba pus Siu tei, hisen Akuila xa be ngan Pontas. Xi temei rohon tang e Korin tetel atou nan xa hisen Prisila. Xalu lutexo Itali lutemei e Korin melele xa Suv Toto Klodias tesa rae tei tehit Siu xil vus lihe reling Rom e liha mun e von ne. Pol ba misao ni xalu. E vengan xa xalu di lupol ni nim tavolin xil nggoni ngan taxa xi mun tesukul ven, xi de visal xalu e nim nalu e latepol vituei. E Sabat xil vus, Pol be nim te pispisien e di misepin del Siu xil e del ngan xil xa latave Siu ti tengan liling neketen nae vate e Iesu.

E melele xa Saelas xal Timoti lunggo Masedonia lumei, Pol miling polien nan te nim tavolin e misa xi ve polien te setuen kestang. Xi di misep kila mi Siu xil e nim te pispisien nae xa Iesu be ngan xa Hi tehit xati tehit imei iteh meulien e moletin xil. E xil lasin sepinien nan e di lasep sisili. Ma xi mirang meas ra eising nan ba xat xil e biteni mi xil bitene, “!Pangasien xa imei xat xamim ihe namim tang. Inou, navan tovuol en! !Taxeak, niha ti nisetu sung mi ngan xil xa latave Siu ti!” Di, Pol miling Siu xil, ba de nim ma moletin tei xa tave Siu ti e di mot mi Hi, hisen Titias Sastas. Nim man dat sangas ni nim te pispisien na Siu xil. Vat te nim te pispisien ak, hisen Krispas. Xi, del ngan xil vus xa ladi tim san, lateling neketen nae e Suv Iesu. E moletin sav holu mun xa ladi e Korin, melele xa lataeong ni sepinien na Pol, xil mun laneket, ma lamae ni Pol derir ni xil e oei.

E vongien tei, Suv misepin mi Pol nggo metuveen tei bitene, “!Tit usetu tang e ulum nakan ti! !Onatat votei ti! 10 Vengan xa inou, nadat visaluk e di nadutou ni xouk. Ninasak ni ti neta naxui xouk vengan xa moletin xil holu xa lade taon ak labe navan.” 11 Misak ni Pol tete Korin huram tei e rute, di tepispisi mi moletin xil usil sepinien na Hi.

12 Melele xa Pol teta tamu e Korin, kavmen tahal Rom teling xoles vat te provins tahal Akeia. Vat hu xa nggur von nen, hisen Kalio. Melele xa Siu xil lapusi mak, xil vus mei laba ladal xat Pol, e langguri be kot pe met Kalio. 13 Xil labiteni mini labitene, “!Moletin ak di misak pisi vapol ni moletin namem xil ti lamot mi Hi e sexien tei xa nggur xoteh rae namem xil!”

14 Pol tasepin ti mu, e Kalio misepin mi xil bitene, “Xamim, Siu xil, xosxa xamim mubit moletin ak pol ni neta tei xa misa ba xat rae xil na mol-Rom mu ve neta sav tei xa eilep, ma momal tang tengan inou niteong ni xamim. 15 E vengan xa di mungor usil rut sepinien xil, usil his moletin xil, e usil rae xil namim tang, ma xamim tang mumal ni. Inou ieok ti tavei tengan nilepis sexien xil ak.” 16 Ma misil rerat xil ra kot nan. 17 Di, vanut moletin xil xa ladi, langgur xat Sostenis xa be vat te nim te pispisien na Siu xil e labasi e von kot vari. Kalio pusi, e bit nakil ti.

Pol Dilomun Be Antiok

18 Pol di mi Kristin xil e taon tahal Korin melengien holu mu. Di, bit vatilomun vahe Siria. Misak ni misep ling xil e ba be Senkaria tengan latohur tuturil en, e Prisila xal Akuila lube xatel latoba. Melele xa latduxoh Senkaria, Pol kot hilin be vatumas vengan xa xi pol vuol ni hitxatien tei xa tepol ni tetel Hi. Di, latnggur tuturil tei latoba latobe provins tahal Siria. 19 Lamei laduxoh Episis, e latobe nim te pispisien e Pol di mitumul del Siu xil en. Di, Pol bit iling Prisila xal Akuila inggak. 20 Siu xil lasisi tengan vata vatel xil melengien vahis mun e xi tamaen ni ti. 21 E melele xa miling xil, xi biteni bit, “Xosxa Hi imae ni, ma nitilomun nimei visal xamim.” Di, miling Episis nggo tuturil ba.

22 Tuturil ba be Sesarea e miling Pol da en. Di, mikakao be Serusalem e ba misao ni ngan xil te sias inggak. Pol da vuteili tang en, di, ba be Antiok. 23 Pol de inggak melengien vahis, di, miling Antiok ba tengan vasao ni vanut Kristin xil e provins tahal Kalesia e provins tahal Prikia. E rute xil vus, di dutou ni ngan xil ak tengan neketen nae e Iesu ixeih mu.

Apolos Mei Be Moletin Te Pispisien e Sias tahal Episis

24 E melele nen ak, Siu tei tahal Aleksandria temei e Episis, hisen Apolos. Xi be moletin tei xa di misepin kuhi mak e mikil kuh sepinien xil xa di e Vanuvei na Hi. 25 Xi di pispisi mi moletin xil del eimaeen. E pispisien nan xil momal usil longeongen hos usil Suv Iesu, e mikil kes ni teriren tang xa Sion di tepol ni ni oei. 26 E melele xa Apolos di misepin del xeihen e nim te pispisien na Siu xil, Prisila xal Akuila lulonge. Misak ni luba lungguri latbe tim, e lusep kil longeongen hos mini tengan vakil kuhi. 27 Di, Apolos pol ni nenemien nan tengan ihe Akeia, ma Kristin xil xa ladi Episis ladutou ni e ladis uvei tei ba ni Kristin sav xil xa ladi Akeia tengan xa lihur pilei melele xa ha istal. E melele xa ba mistal visal xil, xi dutou ni ngan xil xa mei laneket nggo eheien hos na Hi. 28 Melele xa Siu xil te rute ak mei di lasep tetavoe mi Kristin xil pe met moletin xil, Apolos pisen kila nggo Vanuvei na Hi xa Iesu be Kristo xa Hi tehosei.

Copyright information for `TVK