Acts 20

Pol Misao ni Kristin Xil e Provins Xalu tahal Masedonia e Akeia

Dutou ni xa rumen te ekaten ak be tan, Pol mikes viton Kristin xil tahal Episis e misel xat xil. Di, misep ling xil e ba be provins tahal Masedonia. Di, e rute xil vus xa di tekapis en, xi di misao ni Kristin xil e di misa sepinien te selxatien ba vatutou ni xil. Di, miling xil ba be provins tahal Akeia. Di, tekapis taon xil e provins ak tehe aveti tol (3). E melele xa di bue xat xi tengan ihe reling rute ak ha ihe provins tahal Siria, maxa ni e milonge xa rut Siu xil tahal Siria di lapol ni lingxatien tei tengan lihas vini e suse nan. Misak ni xi biles nenemien nan tengan itilomun ihusil suse sav ha ixo Masedonia. Pol mikakao del moletin xil ak: Sopata xa be nat Piras tahal Beria; Aristakas xal Sekandas tahal Tesolonaeka; Nggeas tahal Derbi; Titikas e Tropimas xa lube tahal Esia; e Timoti mun xa be ngan Listra tei. Melele xa laduxoh Pilipae, rut moletin xil ak langgo tuturil tei, ladiamu labe taon tahal Troas tengan litatil Pol en. E Pol de Pilipae duxoh melele xa Anien te Beret xa Is Tovuol En bus. Inou Luk tehe xamel del rut Kristin xil mun. Di, manggo tuturil e Pilipae e maloh melengien lim, di, ba maduxoh Troas. E inggak, mabituei del ngan xil xa latetiamu, e madi duxoh wik tei.

E melele xa di mabue xat xamem tengan maling rute ak, mamei vituei e Sarere vongien tengan mavur anien eo na Suv. Di, Pol misetu mi moletin xil e dit misepin ba vuma ... duxoh hilaep te vongien. Pol pol ni mak vengan xa mikila xa makoe tang ihe reling xil. E nim xa madotan en, madi e von toen xa de nesao xa be tol nen, e laet holu di lapili en. E melele nen ak, horam maxoe tei di dotan de windo, hisen Iutikas. E melele xa Pol di tamu misepin, horam maxoe ak miteong ni ba vuma ... meten minoh xa minoh, ma pat. Latemanin e mot nggo windo nesao mei mirum e tan. E melele xa ba lapusi, e xi mat ngamu. 10 E Pol be tan ba por xati e di misa hen xole. Di, biteni mi xil bitene. “!Munanexo ti, xi tamat ti, meul tang da!” 11 Di, Pol del moletin sav xil ladilomun labe von toen xa de nesao, e langganien. Di, Pol misepin rilomun mi xil ba vuma ... ut milan. Bus, Pol miling xil ba. 12 E horam maxoe ak, ladela labe tim san, e lamaal himetu vengan xa xi meul tang da.

Pol Be Malaetas e Misep Ling Elda Xil tahal Episis

13 Ma xamem mabit mava. E Pol diamu ni xamem mikakao nggusil suse xa tamure tang e bit itatil xamem e Asos. E xamem mabe bien tengan muxo tuturil muhusil suse xa teviei muhe Asos, e muhur Pol ihe xamem e rute ak. 14 E melele xa maduxoh Asos, mapusi xa Pol di datil xamem ngamu en. Ma mangguri bemei e tuturil e maloh mabe Mitilen. 15 Di, mamea inggak maloh maba, be ut milan, e maduxoh Kios. Di, maloh vongien, e makoe nen, be maduxoh Samos. E visuvong nen, matle sal ba maduxoh Malaetas sung, 16 vengan xa Pol tepol ni nenemien nan tehit matavi e Episis vengan xa ien ti tavei vahas melengien vahe holu e provins tahal Esia. Mipol ni mak vengan xa bit vasak pisi vatuxoh Serusalem mu, vati vahe melengien te Pentekos sung.

17 Melele xa Pol da tamu e Malaetas, xi misa sepinien nan ba mi elda xil te sias tahal Episis bit limei lipusi. 18 E melele xa lastal, xi dotan del xil e misepin mi xil bitene, “Xami mukil sexien xil navan melele xa natemei nateti mi xamim e provins tahal Esia, e melengien kokot teni tetuxoh melengien xa nateling xamim nateha. 19 E melele nen ak, di natepol ni polien na Suv tetel nenemien xa be tan e simetok teleh ve xamim. Natepol ni temak, tave ti neta xa melengien holu natekameti te xeih ve lingxatien xil xa rut Siu xil latepol ni teta xat nou. 20 Mukila xa natesa sen holesok xil xa ti vatutou ni meulien namim texo setuen e pispisien navan xil xa natepol ni pe met moletin xil e e tim kekes sami xil. Natnasoson ti neta vari mi xamim. 21 Natesa sepinien te selxatien te xeih mi xamim vus; mi xamim xa mube Siu, e mi xamim xa mutave Siu ti tengan muhiles ra tesaen xil namim e mumei visal Hi. E natesel xat xamim mun tengan muling neketen namim ixeih e Suv Iesu.

22 “E taxeak, Ninin Eo di del nou tengan name Serusalem. E natakil ti naha tova xa ixui nou en. 23 E rute xil vus xa di natesao en, Ninin Eo tepisen ni minou xa nave nousav ti, nihe nim te xeih e ti nilong pangas nou. 24 Tave ti neta xa mak, nanem mele ni meulien navan tang. Ieok bei taxa nipol vuol ni polien xa Suv Iesu tesa ni minou tengan ti nihithit longeongen hos usil eheien hos na Hi. Ieok bei tang tengan xa ti nihusil lohen xa Suv teling nou en ituxoh hoxalite teni.

25 “Melele xa nateti tamu visal xamim, natekapis ut namim xil ngasen e di natesetu mi xamim vus usil suse xa Hi imei ihe suv toto e meulien na moletin xil. E taxeak, nakila xa xamim vus musakras mupus rilomun ni nou. 26 Mak, ma e xosali ak, ieok bei nabit mese ni mi xamim xa xosxa tei e xamim ikesae e taling ti mu neketen nan e Iesu, inou navan tovuol en. 27 Vengan xa inou natnasoson ti neta mi xamim. E-e, natesep vuol ni holesok xil xa Hi ien bei vapol ni e meulien na moletin xil. 28 Mak, ma muxuxou kuhi ve xamim e ve moletin xil na Hi xa Ninin Eo miling xil ladi e hemim. Ma mulaxat kuh xil vengan xa ngan xil ak labe Sias na Hi xa texal rati ni re natnali xati. 29 Nakila xa itutou ni ngan xa niha, ngan xil limei listal e lisak purun xamim ixoni kuli reran xil lapol ni mi sulut sipsip xil. 30 E ngan xil mun listal lixo vanut xamim mun tang, mei lihiles reitinen na Hi e lisep luvos Kristin sav xil tengan ha lihusil pispisien xil nae. 31 !Mak, ma muxuxou kuhi ve xamim! E munem usil huram tol (3) xa nateti mi xamim, e di natesel xat xamim e melengien e vongien tetel simetok xa di teleh.

32 “Ma xosali, naling xamim pe he Hi. Sepinien usil eheien hos nan isak ni neketen namim ixeih. E nggo sepinien xil nan, Hi di bit xati xa isa tuxolxatien mi xamim e mi ngan xil vus xa tepol ni xil labe moletin eo nan. 33 Melele xa nateti mi xamim, natnasis ti moletin tengan vasa vatu mu eising minou. 34 Xami mukil kuhi mak xa inou di natepol tetel heok xalu tengan di matekamet holesok xil xa inou tetel moletin navan xil di iemem tehei. 35 Texo sexien xil navan xa natepol ni e pe metemim, natepisen ni xa melele xa rapol nggeih, ma rakila ti ritutou ni ngan xil xa lamerou. Ixoni sepinien xa Suv Iesu vari tang tesepin ni tehit, 'Sien xa iti mi ngan xa di misa tutouen mi mosav ili sien xa iti mi ngan xa di nggur tutouen nggo mosav tang.'”

36 Melele xa Pol misepin bus, mitingeiril be tan del xil e misis. 37 Xil vus lamuis e lasa he ngga xole. Di, lapesum e vin e labiteni mini labit, “Oba li.” 38 Lalonge misa himetu vengan xa Pol tehiteni mi xil xa xil linapus ti mun. Ma langgusili laba, lalingi be tuturil.

Copyright information for `TVK