Acts 21

Pol Be Serusalem

Melele xa masep ling xil bus, mabe tuturil ak maba. Manggur xoteh tas, e mei maduxoh aelan tahal Kos. Di, makoe nen, mei maduxoh aelan tahal Rods. Bus, manggo inggak, mei mabe taon tahal Patara. E inggak mapus tuturil tei xa di labue xati tengan vahe Vonesia, ma mabut en maba. Ma maloh mei matavi e aelan tahal Saepras e rin xa be saot, di, ba maduxoh taon tahal Taer xa de provins tahal Siria. E inggak, tuturil miso rat holesok xil xa teti e vangite. E rute ak, makamet rut Kristin xil, ma madi visal xil wik tei. E melele xa madi tamu visal xil, xeihen te Ninin Eo bemei e xil, ma lasep xol Pol tengan nava ti e Serusalem. E melele xa melengien pipin tengan maling xil mava, Kristin xil vus te taon ak, tiramue xil, atou nae xil e horamue nae xil mun, be xamem maling taon ak tengan va laling xamem e bien. Di, mabe tan inggak, matingeiril e masis. Di, lasep ling xamem. Bus, xamem mabe tuturil, e xil ladilomun labe tim sae.

E suse xa manggo en, tuturil miling Taer be Patolemas. E inggak, masao ni Kristin xil del memaalen e madi visal xil duxoh makoe. E makoe nen, maling Patolemas e maloh maba maduxoh Sesaria. E inggak, madi e tim sa Evanselis Pilip. Xi be tei e dikon kokot xil xa labe lu e he sav (7). Natnahin xil labe hat (4) e latatali ti mu. Xil labe provet xil e dit lake mese ni sepinien xil xa Hi di misa ni mi xil.

10 Madi inggak melengien vahis, e provet tei, hisen Akabas, nggo Sudea mei mistal. 11 Xi bemei visal xamem, nggur rat atuatu na Pol e bar xat len e hen xalu ni. Di, mike mese ni mi xamem bitene, “Ninin Eo iaxa misepin ni mak bitene, 'Moletin xa atuatu nan xiak, Siu xil livar xati imak melele xa ha ituxoh Serusalem. Ti, lisa rati ihe he ngan xil xa latave Siu ti.'”

12 Melele xa malonge mak, xamem del moletin sav tatei xil mun xa ladi inggak madak kes Pol tengan nava ti mu e Serusalem. 13 Ma xi bit rilomun ni mi xamem bitene, “?Veneh ma di mumuis? Maxa ni di musak ni nou mun, tinok muis. Inou, nabue xat nou tuei tengan livar xat nou mu lihas nou mun nimat e Serusalem ve neketen navan e Suv Iesu.”

14 Melele xa mapusi xa masakras maviles nenemien nan, ma malingi nga tang, e mabiteni mini mabitene, “Suv ipol ni mi xouk ixoni ngan xa xi ien bei.”

15 Melengien vahis mitavi, di, mabue xat xamem tengan muling Sesaria e muhe Serusalem. 16 Rut Kristin xil tahal Sesaria lamei labituei del xamem e ladel xamem maba mabe tim sa moletin xa mupat itela, hisen Neson tahal Saepras. Xi be tei e moletin xil xa lateneket kokot e Iesu.

Pol Ba Pus Kristin Xil e Serusalem

17 Melele xa ba mastal e Serusalem, Kristin xil langgur pilei xamem del memaalen. 18 E makoe nen, Pol be xamem maba tengan ha mapus Temis e elda sav xil mun te sias. 19 Di, Pol bit bos makoe mi xil e misep usili mi xil holesok xil ngasen xa Hi di tepol ni mi ngan xil xa latave Siu ti texo polien xil nan.

20 Melele xa Temis del elda sav xil lalong sepinien xil na Pol, xil vus lames Hi ven. Di, labiteni mini labitene, “Tua Pol. ?Opusi? Siu xil hao xa hao latemei lateneket ngamu e Suv Iesu. E xil vus nenemien nae nggeih tova tang tengan lihusil xat Rae xil na Mosis. 21 Xil di latelongeong ni xa di opispisi mi Siu xil xa ladi tan xil na moletin xil xa latave Siu ti tengan ti linahusil ti mun Rae xil na Mosis. Latelongeong ni mun xa di otehiteni mi xil tengan linapol ni horamue nae xil ti linave vexaho, e linahusil xat ti mun sexien matu xil na Siu xil. 22 Navehi ti, xil lilongeong ni xa xouk otestal ngamu inggak. ?Mak, ma ripol ni itep? 23 Xamem iemem bei xa upol ni imak: moletin hat inggak latepol ni hitxatien tei tetel Hi. 24 Ha uhe xamim muhe Nim Eo na Hi e muhusil xat sexien xil te serep moletin en. Ti, uxal vongoro xil namim xa ha musa ni mi pris xil. Melele xa mupol vuol ni, ma mukila mukot hilimim mei muhe vatumas. Imak, ma moletin xil vus lipus kila xa longeongen tesa xa di lalongeong ni usiluk, tave reitin ti. Xil lipus kila sung xa xouk di olong xat Rae xil na Mosis e di tamu omerere ni xil. 25 E usil ngan xil xa latave Siu ti xa lamei labe Kristin, xamem matesa uvei tei tuei tehat mi xil. E uvei ak, matesis xil tengan linaxa ti anien xa latesa ni teha mi nanao xil, e linaxa ti mun anien xa ra di xati, mu linaxa ti vongoro xa latesar xoteh huraen tang. E matesis xil mun tengan linapol ni ti sexien tesa xil ti natel atou mu tiramue na mosav.”

26 Pol mae ni, ma makoe nen, mileh tiramue xil ak laba tengan lava lapol kokot ni sexien xil te serep moletin en. Di, Pol ba be vioh te Nim Eo na Hi e misep mese ni mi pris xil xa lapol kokot ni sexien te serep moletin en ngamu. Di, miling xat melengien mun vari xa xil litomun mei lisa sanien eo nae kekes en.

Ladal Xat Pol e Nim Eo na Hi

27 E melele xa melengien lu e he sav (7) sangas mei vatavi tengan Pol vatel moletin xatel mun ha latopol vuol ni sexien xil te serep moletin xil en, rut Siu ngan xil xa latexo provins tahal Esia lamei. Melele xa xil lamei e vioh te Nim Eo, xil lapus kil Pol, ma lasi petine vanut moletin xil tengan liha lital xati. 28 Melele xa ladal xati, lakei nggeih ba ni moletin xil labitene, “!Tua namem xil! !Mumei! Mututou ni xamem. Moletin ak vari iaxa di mikapis e rute xil vus e di misa pispisien xil xa misa ba xat xir tahal Isrel, ba xat Rae xil xa Mosis tesa ni mi xir, e ba xat Nim Eo nar. E taxeak, xi di mileh moletin xil xa latave Siu ti lamei e Nim Eo ak vari, e di misak ni rute ak tave ut eo ti mun pe met Hi.” 29 Lasepin ni mak vengan xa melele xa latepus Pol e taon, xi tehe xal moletin tei tahal Episis xa tave Siu ti xa hisen Tropimas. E xil latenemi latehit Pol iaxa tehuri lutemei e vioh te Nim Eo ak.

30 Ngan ak misak ni rumen te ekaten miloh mikapis bivil taon ak, e moletin xil laloh lamei vituei. Ladal xat Pol, e ladel kakao ni mistal ra vioh te Nim Eo ak. E vatakes, lakoe xol puiteh xil teni. 31 Melele xa moletin xil ak di lasak tengan lavas vin Pol, vatixar tei na moletin xil te vaeen milongeong ni xa vaeen tei xa mahulong mistal e Serusalem. 32 Ma vatakes, vatixar ak mileh viton vat sav xil del moletin te vaeen xil nae, e latemanon mei labe visal vanut moletin xil ak. E melele xa xil lapus ngan xil te vaeen, lastokovein Pol e latavasi ti mun.

33 Vatixar na moletin xil te vaeen mikakao be visal Pol, dal xati, e misemae ni tengan moletin nan xil livar xati ni sen lu. Di, misis pilei vanut moletin xil bitene, “?Moletin ak be visi? ?Xi pol ni naha?” 34 Rut moletin xil lakekei ni neta ngan, e rute ngan xil mun lakekei ni neta sav. Vanut moletin xil latangal holu, misak ni vatixar ak misakras valong kuh vatit rumen ak xa testal tetep. Ma misemae ni tengan moletin nan xil lihur Pol ha lilingi ite nim ma moletin te vaeen xil. 35 E melele xa ladel Pol lamei sangas ni nim mae e labit lipeou lihusil von kakaoen lihe nim, moletin xil te vaeen lapo rat Pol dat nesao vengan xa vanut moletin xil ak, nenemien nae nggeih pupu tengan lital rat Pol ra he xil, ha lihasi. 36 Siu xil langgulehi langgusili e lamuis kei be nesao labitene, “!Ravasi! !Ravasi vamat!”

Pol Misep Kil Rin Nan Pe Met Moletin Xil

37 Melele xa moletin te vaeen xil lamei sangas ni puiteh te nim mae, Pol misepin mi vatixar nae bitene, “?Nakila namit neta tei minuk?”

Ma vatixar ak biteni mini bitene, “?Ei, xouk okila osepin ni sepinien tahal Kris?
38 Inou di nanemi nabit xouk obe silixin tahal Isip xa testal tave nousav ti. Moletin ak teleh viton vanut moletin xil latehe taosen hat (4000) e latehe uruvuol aveti vahis xa mitavi tuei. Moletin tevae xuxusen nan xil latesak pisi tengan lapangei polien na kavmen tahal Rom.”

39 Pol bit rilomun ni mini bit, “E-e, tave nou ti. Inou nabe Siu tei xa nabe hortan tahal Tarsis, taon tei xa bos mak mu xa de provins tahal Silisia. Nasisuk tengan umae ni nou li nisepin vuteili mi vanut moletin xil ak.”

40 Vatixar ak mae ni, ma Pol misa hen be nesao tengan liti votei e misepin mi xil ni sepinien xati nae xa be Arameak, e xi biteni mak mi xil bitene,

Copyright information for `TVK