Acts 24

Pol Misoh Pe Met Filiks

Melengien lim (5) mei mitavi, Ananaeas xa be Vatixar na pris xil, del rut elda xil labe Sesaria. Xil lamei del loea tei nae xa hisen Tetalas. Ba lasoh pe met Filiks e von koten nan e laso sepinien xil xa nggeih usil Pol mini. Di, xi misemae ni tengan litel Pol imei nim. Melele xa bemei, Tetalas misep sisil Pol pe met Filiks biteni mak:

“Vat te Kavmen Filiks, vengan xa di olaxat kuh xamem del metisouen, xamem madi e tomat vehakut. Xouk di oserep holesok xil hao ve moletin xil te kantri ak mei bos pupu.
E ut xil vus, xamem mamaal ve lelaxatien nam, e mabit mamesuk ven. Mabit munavas pupu ni ti melengien nam, e madak kesuk tang tengan umae li e uteong vuteili ni rin namem e ngongoren ak xa mabit maviteni minuk taxeak. Makameti xa moletin ak be vatxeih tei xa di pol ni vaeen xil xa mahulong del Siu xil e rute xil vus e ut etan. Xi be vat na vanut moletin xil xa di langgusil pispisien na moletin tei tahal Nasaret. Xi tesak tengan vapol ni Nim Eo na Siu xil mei vahe muis pe met Hi, ma matetal xati ven. Xosxa usis pilei moletin ak, ma ulong kila ixo xi mun tang xa holesok xil xa di mabit usili be reitin.” E Siu xil vus xa lateti lamae e sepinien nan e labit holesok xil vus be reitin.

Pol Misep Kil Rin Nan Pe Met Filiks

10 Di, Vat Filiks pisen ni nggo hen tengan Pol imei ihit kil rin nan e ngognoren ak, ma Pol biteni mini bitene, “Namei pe metom Vat Filiks tengan nisep kil rin navan del sien, vengan xa nakila xa huram xil holu, xouk di otelepis moletin xil te kantri ak. 11 Xosxa usis moletin xil ak, ma ulong kil kuhi xa melengien lu e le (12) tang tetavi xa inou natehe Serusalem tengan namot mi Hi en. 12 Melele xa Siu xil latekamet nou, inou natnangor ti vatel moletin tova e Nim Eo, mu natnapol ni ti selen mi moletin xil e nim te pispisien tova mu e rute sav xil mun e taon ak. 13 Siu xil xai lasakras lapisen kil sexien tesa tova xa lavit inou iaxa natepol ni. 14 E taxeak, nihit rat ngan ak minuk Filiks xa inou di namot mi Hi na avu namem xil usil sexien tei xa Siu xil ak labit tamal ti. E inou mun nake reitin e holesok xil vus xa latetisi e Rae xil na Mosis tetel uvei xil na provet xil. 15 Nenesien navan del nenesien nae pipin tang xa bit Hi isak ni moletin xil ngasen, ngan labos e ngan lasa, likila limeul rilomun ra maten tengan Hi ilepis xil vus. 16 Mak, ma vehakut di nasak tengan nipol ni holesok xil e sexien tei xa isak ni nou ninave unoun ti pe met Hi e pe met moletin sav xil.

17 “Huram xil holu natnata kat ti e Serusalem. Di, natetilomun nateha tengan naleh ti vatu vaha vatutou ni rut moletin xil tahal Isrel e nasa sanien eo xil vaha mi Hi. 18 E melele xa di natepol ni holesok xil ak, xil latekamet nou e vioh te Nim Eo na Hi e melele vari xa di natepol vuol ni sexien xil te serep moletin en. E melele nen ak, natnata ti vatel vanut moletin tova, e natnapol ni ti selen tova. Natetat temak tang. 19 E rut Siu xil xa latexo provins tahal Esia lateti. Bos vahit xil mun lati inggak xosali tengan lisep kil sexien tesa tova pe metom xa labit inou natepol ni. 20 Mu umae ni ngan xil xa ladi inggak lavit kil neta tova xa misa xa latekameti da xat nou melele xa natesoh pe met Kaonsel nae. 21 Mu xos ve neta xa natekei ni melele xa natesoh pe met xil e natehit, 'Namei nasoh pe metemim taxeak vengan xa nake reitin xa moletin ikila imeul rilomun ra maten.'”

22 Di, Filiks, xa mikil kuh neketen na Kristin xil, misep xol koten nan del sepinien ak bit, “Melele xa Lisias xa be vatixar na moletin xil te vaeen mei ituxoh inggak, inou nimal ni ngongoren namim sung.” 23 Di, Filiks misemae ni moletin te vaeen xa di miketeh xol Pol tengan ti iketeh kuhi xole e imae ni tengan ikakao vuteili e nim te xeih e imae ni timue nan xil limei lipusi e lisa tutouen mini.

Pol Misetu mi Filiks del Atou Nan

24 Melengien vahis mei mitavi, Filiks del atou nan xa hisen Drusila lube visal rute xa Pol da en. Atou nan be ate-Siu tei. Di, Filiks misilasil ve Pol bemei e luteong ni misetu usil neketen nan e Iesu Kristo. 25 E sepinien kor na Pol, xi misetu mi xalu bit, “Hi ien bei xa moletin xil lilaxat kuh sexien nae xil e lipol ni naha xa momal tevi, vengan xa melele xa rimat, xi ilepis xir vus.”

Melele xa Pol biteni mak, Filiks, ulin mikan. Ma biteni mini bit, “Utilomun mun uha. E melele xa nakamet mesal, nikes rilomun ni xouk.”
26 E melele nen tak, xi di minemi bit Pol isa ti vatu mini. Ma ve ngan ak, Filiks mikesi vehakut e di misepin dela.

27 Huram lu mei mitavi, moletin tei mei minggoles von Filiks e mei be vat hu te kavmen tahal Sudea, hisen Porkas Festas. E vengan xa Siu xil, iexil nggat Filiks e polien nan, xi mistokovein Pol da nga nim te xeih nan tengan vapol ni nenemien nae mei vahos vuteili.

Copyright information for `TVK