Acts 5

Hi Bas Ananaeas xal Savira ve Luvosen Nalu

Moletin tei mun del atou nan lupos ni rut tan nalu, hisealu Ananaeas e Savira. Luling xati xa lalkixat xat rut vatu nen ihe nalu, e rute, Ananaeas milehi ba, misa ni mi eloheoh xil e biteni mi Pita bit, “Vatu xil vus xiak.”

Di, Pita biteni mini bitene, “?Ananaeas, veneh ma omae ni Temat mei polu e nenemien nam? ?Veneh ma xouk obit oluvos Ninin Eo melele xa otepos ni rut tan nam e okixat xat rut vatu teni be nam? Tetiamu, tan tehe nam. E melele xa opos ni, vatu xil vus nen be nam. ?Mak, ma veneh ma obit opol ni vamak? !Luvosen xa opol ni xiak, otapol ni ti mi moletin tova, e opol ni mi Hi vari!” Melele xa Ananaeas milonge mak, vatakes, mot e mat. Moletin xil vus xa lalongeong ni, le mulul ven. Di, horam maxoe vutei xil lamei nim, mei lapis xol tiei nan. Di, lapoe ba, ladihin ni.

Haoa tol mitavi, atou nan bemei nim. E xi takil ti vari xa tiramue nan mat. E Pita misisi bit, “?Hit kuhi mu minou, ngan ak be vatu xil vus xa xamil tiramue nam mutehuri e tan xa mutepos ni?”

Atou ak bit rilomun ni mini bit, “Io, xil vus iaxai.”

Ma Pita biteni mini bitene, “?Veneh ma xamil tiramue nam mubit mulsak pis Ninin na Hi? ?Olonge? Moletin xil xa ba ladihin tiramue nam, di lamei sangas ni puiteh. E mei lipo xouk mun uha.” 10 Vatakes, xi mun mot e mat pe met Pita. E melele xa horam maxoe xil lamei nim, lakameti xa xi mun mat. Ma lapoe ba ladihin ni de ri tiramue nan. 11 Ngan xil vus te sias tahal Serusalem, del mosav xil mun xa lalongeong ni naha xa mistal, le mulul tova tang.

Eloheoh Xil Lapol ni Merekel Xil del Sexien Xil Holu xa Tellep

12 E melele nen ak, eloheoh xil di lapol ni merekel xil del sexien xil holu xa tellep pe met moletin xil. Vehakut, ngan xil xa laneket e Iesu mei di labe vituei e rute tei e vioh te Nim Eo xa lakesi ni 'Horao ma Suv Toto Solomon.' 13 Neta sav xa moletin xil ngasen lamerere ni xil, moletin xil xa lataneket ti mu, uli mikan tengan lamei vituei vatel xil. 14 E Hi mileh moletin holu lamei e laneket e Iesu. Misak ni xil mei labe holu mu. 15 Ve polien xa eloheoh xil di lapol ni, moletin xil laleh ngan xil xa lamesei mei laling xil ladi suon mae e seri suse. Xil labit xosxa nini Pita ituxol xil melele xa ikakao imei, ma xil lilonge ihos. 16 E vanut moletin xil holu lamei langgo taon xil xa mikapis e Serusalem. Xil ladel ngan xil xa lamesei e ngan xil xa ninin tesa xil lapolu e xil. E xil vus mei lalonge bos rilomun.

Vat Xil na Siu Xil Di Lasak Pangas Eloheoh Xil

17 Di, Vatixar na pris xil del Satusi xil lanem misa ni eloheoh xil e labit lisak pangas xil. 18 Misak ni, ladal xat xil e laso xil labe nim te xeih. 19 E vongien nen tak, masxaxa tei na Hi mei misah puiteh te nim te xeih e del xil lastal. Di, xi biteni mi xil bitene, 20 “Muha, musoh e vioh te Nim Eo na Hi. Musa sen sepinien xil ngasen usil meulien hu ak mi moletin xil.” 21 Ma eloheoh xil lalong xat sepinien nan, e melele xa ut da milan, xil labe vioh te Nim Eo na Hi e di lapispisi mi moletin xil.

E melele nen tak, Vatixar na pris xil del vat sav xil lamei e lakes viton elda xil na Siu xil lamei vituei e totanen tei na Kaonsel nae. Di, lasil mereketeh xil labe nim te xeih tengan lileh eloheoh xil ak limei lisoh pe met xil.
22 E melele xa mereketeh xil labe nim te xeih, latapus ti xil. Ma ladilomun ba labit mese ni mi vat xil te Kaonsel labitene, 23 “Melele xa mabe nim te xeih, mapusi xa puiteh mikoe nggeih tang, e mereketeh xil dit laketeh xole. !E melele xa masah puiteh mabe nim, matale xoteh ti moletin!” 24 Melele xa vat xil na pris xil del vat na mereketeh xil te Nim Eo lalong sepinien ak, latakil ti naha xa nggul eloheoh xil. 25 Di, moletin tei bemei visal xil e biteni bit, “!Muteong! !Moletin xil xa muteling xil e nim te xeih, taxeak, di lapispisi mi moletin xil e vioh te Nim Eo na Hi!” 26 Ma vat na mereketeh xil del rut moletin nan xil ba laleh eloheoh xil labe von Kaonsel. Xil latapol ni ti vaxeih mi xil vengan ulixil mikan xa moletin xil linahop vin xil.

27 Laleh eloheoh xil lamei nim, e lapol ni xil lasoh pe met moletin xil te Kaonsel ak. Di, Vatixar na pris xil misis xil bitene, 28 “Mateke xat xamim te xeih xa munapispisi ti mun usil his moletin ak. E xamim dit mupispisi ni ba tang. Ma taxeak, Serusalem polu ni pispisien namim. !E mubit muling maten nan mun vate xat xamem!”

29 E Pita del eloheoh xil labit rilomun ni mini labitene, “!Xamem muteong xat Hi kestang, e nave moletin xil ti! 30 Hi na avu nar xil pol ni Iesu temea rilomun ra maten, xi iaxa mutesak ni temat melele xa lateti xati e eivave. 31 E xi, Hi tepet rati ba de rin metu e misa xeihen mini tengan mei ihe Vat ni moletin xil tevusien e iteh meulien e xil. Mak, ma Hi di misa mesal mi mol-Isrel xil tengan lihiles ra tesaen nae e mei iketeh ihos rilomun ni xil. 32 Xamem iaxa di masep usil holesok xil ak, e Ninin Eo mun di pisen ni be reitin. Ninin Eo ak, Hi misa ni mi moletin xil xa di lalong xati.”

33 Melele xa vat xil te Kaonsel lalong sepinien ak, iexil nggat pupu ni eloheoh xil e labit lavas vin xil. 34 E Parasi tei mitamea misoh, hisen Kameliel. Xi be tisa tei te Rae xil na Mosis e moletin xil vus di lamerere ni. Xi misis vat te Kaonsel tengan vasil rerat eloheoh xil lastal vuteili mu. 35 Di, biteni mi Kaonsel bitene, “Tua navan xil tahal Isrel, mulaxat xamim ve naha xa mubit mupol ni mi moletin xil ak. 36 ?Munem moletin tei xa hisen Teotas? Huram vahis xa ba ngamu, xi testal e tevae tetel mol-Rom xil. Xi tehiteni tehit xi be eilep tei, e moletin xil xa lamos en labe handred hat (400). E melele xa mol-Rom xil labas vin ni, moletin nan xil lateletasil, ma polien nan telel. 37 Dutou ni ngan ak, Sudas tahal Kaleli testal e melele kavmen tepol ni pupuluen te moletin xil. Xi teleh vanut moletin tei latehusili e xil mun latevae tetel mol-Rom xil. Xi mun labas vin ni, ma moletin nan xil xa lathusili lateletasil. 38 Mak, ma e rin na moletin xil ak, inou nabiteni mi xamim mak: !Vat nae mat ngamu! !Munapol ni ti neta nasa mi xil! !Muling xil liti nga! Xosxa naha xa xil laling xati e lapol ni mistal nggo nenemien na moletin tang, ma mei ilel. 39 E xosxa mistal nggo Hi, ma xamim misakras musikoe xol xil. Maxa ni, munakamet ti xa di mubae mi Hi.”

Melele xa lalong sepinien nan, xil lamaal e nenemien nan.
40 Di, lakes rilomun ni eloheoh xil lamei nim, e lasis mereketeh nae lameas pangas xil. Di, lake xat xil tengan linavit usil ti mun Iesu, e lamae ni xil ba vexil mase. 41 Melele xa eloheoh xil labe reling Kaonsel, labesi pupu ni xil vengan lakila xa Hi di pet rat xil melele xa mae ni xil langgur longpangasien ve his Iesu. 42 E melengien xil ngasen, e vioh te Nim Eo e e tim sae xil mun, xil dit lapispisi e lasetu ni longeongen hos usil Iesu xa be Kristo xa Hi tehosei.

Copyright information for `TVK