Acts 7

Stivin Misetu Mi Kaonsel na Siu Xil

Di, Vatixar na pris xil misis Stivin bit, “?Midep? ?Sepinien xil ak be reitin?”

Stivin bit rilomun ni mi xil bitene, “!Tata xil e tua navan xil, muteong ni nou! Tetiamu ni ngan xa avu nar Ebraham teha tate Heran, Hi te miehen testal mini e Mesopotemia e tehiteni mini tehit, 'Umea reling ut sam itel vatimol nam xil e uhe ut tei xa inou nipisen ni minuk.' Ma xi tehe reling ut san e tan na mol-Kaltia xil e teha tete Heran. E dutou ni ngan xa tamen temat, Hi tesila mei tete kantri ak xa xamim, Siu xil, mudi en taxeak. Hi tenasa ti tan ak mini. Reitin, tenasa ti mavulut tan mini xa vahit vahe nan xati. E mi vatimol nan xil xa listal itutou ni, Hi tehit xati xa isa ni mi xil ihe nae. Hi tepol ni hitxatien ak mi Ebraham melele xa horamue nan tehe tovuol tamu. Ngan ak tehe naha xa Hi tehiteni mini tehit, 'Vatimol nam xil ha liti ut sav tei. Lihe slev xil na moletin xil te rute ak, e xil ti lisak purun xil huram ihe handred hat (400). Itutou ni, inou, nisa longpangasien mi ngan xil xa moletin nam xil di latepol mi xil. Di, vatimol nam xil limea ra rute ak litilomun mei limot minou inggak.' Di, Hi tesa sexien te vexaho mi Ebraham xa pisen ni xa xi del vatimol nan xil labe na Hi. E melele xa latepes Aesak, melengien be tol e he sav (8) tang mei tetavi, Ebraham tepol ni tehe vexaho. E Aesak mun tepol ni Siakop tehe vexaho, e Siakop tepol ni natnali xil xa latehe lu e le (12) latehe vexaho, ngan xil ak latehe avu nar xil.

“Horamue na Siakop xil iexil teat Siosep xa tehe tua nae, ma latepos ni teha tehe slev tei e Isip. E Hi teti mini 10 e tehur rati ra longpangasien xil xa teti xati. Misak ni melele xa Siosep tesoh pe met suv toto tahal Isip, Hi tesa metisouen mini e misak ni suv toto ak temaal ven e tepol ni Siosep telaxat kantri nan tetel holesok xil vus xa teti e nim man. 11 Di, mae kekaten tei xa eilep tekapis e Isip tetel Kenan, e tesak ni longpangasien holu teti xat moletin xil ngasen. Avu nar xil tetiamu mun latehe terume ni anien. 12 E melele xa Siakop telongeong ni xa anien teti e Isip, xi tesa horamue nan xil xa labe avu nar xil lateha. Ngan ak tehe kakaoen kokot nae xa latehe Isip. 13 Di, e valu nen xa latetilomun lateha, Siosep tehit kil xi mi tunali xil, ma suv toto tahal Isip tele kil kuh vatimol xil na Siosep sung. 14 Ma Siosep tesa sepinien tehur pileien teha mi tamen Siakop tehiteni mini tetel vatimol nan xil vus xa latehe hanutap tol e lim e le tei mun (75) tengan limei liti visali e Isip. 15 Misak ni Siakop tehe Isip. E e rute ak, xi tetel horamue nan xil lateti ba tetuxoh melele xa latelel. 16 E tiei nae xil latleh rilomun ni tehe Sekem, e inggak, latetihin xil lateti von tehinen xa Ebraham texal rati ra horamue xil na Hamor ni mani tei nan.

17 “Huram holu mei mitavi. E melele xa Hi tepusi temal xa hitxatien xa tepol xati tetel Ebraham sangas vastal vahe reitin, Siu xil xa lateti Isip mei latehe holu. 18 Di, suv toto sav tei xa tenanem xat kuh ti mun his Siosep mei telaxat kantri tahal Isip. 19 Xi teluvos Siu xil xa latehe avu nar xil e tesak purun xil. Xi tepol ni te xeih mi xil tengan liling tuvava nae xil liti hale tengan lilel. 20 Mosis, latepesi e melele ak vari. Hi tepusi xa valnaon tehos xa tehos, e tamen xal ninen lutelaxati e tim aveti tol. 21 E melele xa lutelingi tete hale, atuli na suv toto tahal Isip tekameti e telaxati texoni horamue nan xati. 22 Misak ni latepispisi mini ni kilakilen xil vus tahal Isip, e xi mei tehe eilep tei usil sepinien nan e e polien nan.

23 “Melele xa huram nan tetuxoh hanutap lu (40), tepol ni nenemien nan tehit vakil ti moletin xil xati nan, mol-Isrel xil, ma teha tesao e xil. 24 E melele tepus ngan Isip tei di tehas purun ngan Isrel tei, teha tengan vatutou ni. Ma, xi sung tesa xolesi mi ngan Isip ak e tehasi temat. 25 Xi tenemi tehit mol-Isrel xil xa latehe vatimol xati nan lile kila xa Hi iteh meulien e xil ixo hen, e xil latnale kil ti. 26 E melengien sav nen, xi tepus ngan Isrel lu di luteti xalu, ma xi teha tengan valing tomat rilomun vatel xalu. Tehiteni mi xalu tehit, 'Tiramue xalu, muliteong. Xamil vus mube ngan Isrel tang. ?Veneh ma di mututu?'

27 E ngan xa di tehas purun tunali tetivin rat Mosis tehe rin e tesisi te xeih tehitene, '?Moletin visi milinguk mei obe vat namem tengan ti olepis xamem? 28 ?Obit ovas inou mun vaxoni ngan taxa otehas vin ngan Isip nanganoh?' 29 Melele xa Mosis telonge temak, telesae ra hal Isip e teha tete tan tahal Midian. E rute ak, tehur atou xa teling horamue nan lu.

30 “Di, huram hanutap lu (40) mun mei mitavi, e masxaxa tei mei testal mi Mosis texo upang xa tepili e holiei tei e rute tei xa be uruvuol, sangas ni Vathu Senae. 31 Melele xa Mosis tepusi, temesep pupu e telis tehe sangas ni tengan vale kuhi. E melele xa temei sangas, telong rae na Hi Suv xa tesepin mini tehit, 32 'Inou nabe Hi na avu nam xil, nabe Hi na Ebraham, Hi na Aesak, e Hi na Siekop.' Melele xa telonge temak, Mosis temalili pupu e ulin tekan vaketeh. 33 Hi Suv tehiteni mini tehitene, 'Sil rat sandel nam vengan xa rute xa di osoh en be ut eo. 34 Inou napus vuol ni longpangasien xil na moletin navan xil xa lateti e hal Isip, e nalong tangen nae. Misak ni namei etan tengan niteh meulien e xil. Amei, inou nisilak utilomun uhe Isip.'

35 “Mosis tak tehe ngan xa mol-Isrel xil latesin ni melele xa latesisi latehit, '?Visi xa milinguk obe vat namem tengan ti olepis xamem?' Texo sepinien na masxaxa xa testal mini texo upang xa pili e holiei tei, Hi tesil Mosis tengan ha ilaxat mol-Isrel xil e isak ni vexil imase. 36 Melele xa xi teleh rat moletin xil ra hal Isip, tepol ni sexien xil xa tellep e Isip, e Tas Tepili, e e uruvuol xa lateti en huram hanutap lu (40). 37 Mosis nen tak tehiteni mi mol-Isrel xil tehitene, 'Hi isa provet tei imei mi xamim ixoni ngan taxa xi tesa nou natemei. Provet ak istal ixo tei e xamim.' 38 Mosis ak be ngan taxa teti mi mol-Isrel xil melele xa lateti uruvuol. Xi teti mi avu nar xil tetiamu, melele xa masxaxa tei tesepin tetela e Vathu Senae. Xi tehur sepinien te meulien texo Hi e tesa ni mi xir.

39 “E avu nar xil latnalong xat ti sepinien na Mosis. Xil latesin ni e latepol ni nenemien nae latehit litilomun lihe Isip. 40 Ma latehiteni mi Eron latehit, 'Pol ni hi sav xil ihe namem tengan ti litiamu ni xamem, vengan xa matakil ti naha xa nggul Mosis xa teleh rat xamem ra hal Isip.' 41 Ma e melele nen ak, latepol ni hi tei xa tehur nanao na buluk. Di, latemot mini e latehas vongoro tei tehe sanien nae mini. Di, latepol ni anien tei xa eilep e langga vin xil ni ve nanao xa xil tang latepol xati ni he. 42 Ma Hi tekavitou ni xil e temae ni xil latemot mi hitu xil. Ngan ak nggoni ngan taxa Hi tehit usili e Vanuvei nan texo provet xil tehit,

'?Mol-Isrel xil, tetep, melele xa muti e uruvuol huram hanutap lu (40),
mutehas vongoro xil tengan vahe sanien namim minou?
43 E-e. E mutemea sung, mutepo xat nim tavolin na hi Molek,
e muteleh xat hi Revan xa nggur nanao na hitu xil.
Xalu lutehe nanao xa mutepol ni tengan ti mumot mi xalu.
Misak ni, inou nisil rerat xamim muha muhe slev xil e rute xil xa ha ili hal Babilon.'”
44 Stivin biteni mun mi xil bit, “Avu nar xil latemot mi Hi e nim tavolin nan melele xa lateti tamu e uruvuol. Nim tavolin ak, latepol ni tehusil ngan xa Hi tehiteni e tepisen ni mi Mosis. 45 Dutou ni, moletin xil ak lasa ni mi avu nar xil, e xil latepo xat nim tavolin ak melele xa latehusil Sosua ba latehur rat tan na moletin xil xa Hi tehol rerat xil. Ma nim tavolin ak tetak teta tetuxoh melele xa Deved mei tehe suv toto. 46 Hi temaal ve Deved, ma Deved misisi tengan vamaen ni vapet kuh nim tova vahe na Hi xa be Hi na Siekop. E Hi tamaen ni ti. 47 E tehe Solomon sung iaxa tehil nim man. 48 E Hi te ut nesao misakras vate nim xa moletin tang pol ni. Nggoni ngan xa provet Aesea tehiteni tehit,

49 'Hi suv biteni bit, “Ut nesao be hor te xeihen navan
e ut etan be ut xa di naling leok di en.
?Hisit nim eah iaxa mukila muhili ihe mavan?
Musakras muvil nim tova xa vapin tengan mei nangel en.
50 Holesok xil ngasen xa di ut nesao e ut etan,
inou tang napol ni.” '”

51 Stivin biteni mun mi xil bitene, “!Vatimum nggeih tova tang! Vurangemim bon ni sepinien na Hi, e vehakut di mupol nggoni ngan xil xa latakil ti Hi! Munggoni avu namim xil tang. !Vehakut di musin polien xil na Ninin Eo! 52 Provet xil ngasen, avu namim xil latesak purun xil. Tetiamu, latehas eloheoh xil xa di latehiteni xa Ngan xa Momal xa Hi tehosei imei. E taxeak, xamim vari tang iaxa musa rati be he ngan xil xa latehasi temat, ma xamim vari tang mutehasi. 53 !Xamim iaxa muthur xat Rae eo na Hi xa masxaxa xil latehuri temei mi avu namim xil, e xamim mutalong xati ti!”

Langgov Vin Stivin

54 Melele xa vat xil te Kaonsel lalong sepinien na Stivin, iexil mikat pupu e mete pili xati. 55 E Ninin Eo mei polu e Stivin, misak ni miketeh momal be ut nesao. Melele xa miketeh, pus miehen na Hi e pus Iesu di misoh de rin metu. 56 Ma xi biteni mi xil bit, “?Mupusi? !Napus tilang hat masel e Nat Hi di misoh de rin metu na Hi!”

57 Melele xa vat xil te Kaonsel lalonge mak, laki xol vurange. Di, xil vus lakei nggeih e laloh laba ni. 58 Di, langguri be hale ra taon, e ba di langgove. E xil xa lasep sisili e langgov kokot ni, latling kot nae xil teti he horam maxoe tei xa hisen Sol. 59 E melele xa xil di langgov Stivin, xi mikei ba ni Suv bit, “!Suv Iesu, uhur ninin navan ihat visaluk!” 60 Di, mitingeiril etan e mikei nggeih bit, “!Suv, onanem xat ti tesaen nae xa di lapol ni xiak!” Biteni mak, di, mat.

Copyright information for `TVK