Acts 8

E moletin tei da tak, hisen Sol. Xi memaal xa labas vin Stivin mak.

Sol Misak Purun Vanut Moletin Xil xa Laneket e Iesu

E melele ak vari, sakpurunien tei xa eilep mistal ba xat ngan xil te sias tahal Serusalem. Lasak ni holu e xil lalesae ba ladi e rute sav xil e provins tahal Sudea e Sameria. E eloheoh xil na Iesu latnalesae ti, ladi kat ladit Serusalem.
E melele xa Stivin mat, rut moletin xa neketen nae nggeih e Hi laba lapo tiei nan e ba ladihin ni. Xil ladang nggeih ve maten nan.

E Sol, di misak purun ngan xil xa laneket tengan vahu len Sias na Iesu Kristo. Xi mikakao e nim xil ngasen, e midal xat tiramue e atou xil xa laneket e Iesu, di miso xil labe nim te xeih.

Pilip Misetu mi Mol-Sameria Xil Usil Iesu

Moletin na Iesu xil xa latlesae ra hal Serusalem, labe ut xil ngasen, ba di latsetu ni longeongen hos usil Iesu mi moletin xil. Tei e xil xa hisen Pilip be taon tei xa eilep tahal Sameria e di misetu mi moletin xil te rute ak xa Iesu be Kristo xa Hi tehit xati tehit imei. E melele xa moletin xil lalong sepinien nan e lapus holesok xil xa tellep xa di tepol ni, xil vus lalong kuh naha xa xi biteni. Latepus temat xil lathe reling moletin xil hao tetel tangen xil xa te xeih. E holu xa rut tenbe xil temat mu latsakras lakakao, xil vus mei latlonge tehos. Misak ni, moletin xil vus e rute ak labesi pupu ni xil.

Moletin tei de rute ak, hisen Saemon. Xi di tepol ni moletin xil tahal Sameria latmesep ve vongou xil xa di tepol ni. Xi di po xi bit be eilep tei. 10 Ma moletin xil vus te rute ak, ngan xil xa latellep e movotei xil mun, di lateong ni e labiteni labit, “Xi be hi tei xa lakesi ni 'Ngan xa Nggeih' xa bemei e ut etan.” 11 Xil di latehusili nousav vengan xa holesok xil xa dit tepol ni tesak ni xil latmesep ven. 12 E melele xa moletin xil lalong sepinien na Pilip usil sexien xa Hi mei ihe Suv Toto e meulien nae e usil Iesu xa be Kristo na Hi, moletin xil ak laneket en. Tiramue xil e atou xil hao lamei e lamae ni tengan Pilip iterir ni xil e oei. 13 Saemon mun mike reitin e sepinien na Pilip e mae ni derir ni e oei. E dutou ni ngan ak, xi nggusil xat Pilip e di mesep pupu ve merekel e holesok sav xil xa tellep xa di pol ni.

14 Longeongen usil naha xa mistal e Sameria duxoh eloheoh xil na Iesu e Serusalem. Lalonge xa mol-Sameria xil lake reitin e sepinien na Hi, ma lasil Pita xal Sion lube visal xil. 15 Melele xa ba lustal, lusis ve ngan xil xa laneket tengan mei lapolu ni Ninin Eo 16 vengan xa mei tenapolu ti mu e tova xil. Pilip teterir ni xil e oei e his Iesu kestang. 17 Ma melele xa Pita xal Sion luling he xalu e xil, Ninin Eo mei polu e xil.

18 Melele xa luduxol xat xil, Saemon pusi xa Hi misa Ninin Eo mi xil. Misak ni xi misa vatu mi xalu 19 e misis xalu bit, “Lusa xeihen xai minou tengan moletin eah xa inou nituxol xati, xi mun ikila ihur Ninin Eo.” 20 E Pita misep pangasi bit, “!Xouk uhe Von Upang itel xat vatu nam ve nenemien nam xa obit okila oxal rat sanien na Hi ni vatu! 21 Xouk otapin ti omos e polien namem vengan meulien nam tamal ti e pe met Hi. 22 Itiamu, uhiles nenemien tesa nam, e usis mi Hi Suv tengan xa, xosxa imae ni, ma iketeh ihos rilomun ni xouk ve nenemien tesa nam xa obit opol ni. 23 Taxeak, uhiles meulien nam vengan napusi xa di onem misa ni xeihen xil namem e tesaen di bar xolok.”

24 Melele xa Saemon milonge mak, dak kes Pita xal Sion bitene, “Lusis li mi Suv ve nou tengan xa holesok xil xa di musepin ni naxui nou.”

25 Dutou ni ngan ak, Pita xal Sion lubit usil kakaoen nalu tetel xat Iesu Kristo e lusetu ni sepinien usil Suv Iesu mi moletin xil. Di, ludilomun lube Serusalem. E suse nalu, lusetu ni longeongen hos e metimal xil hao tahal Sameria.

Pilip Derir ni Eilep Tei tahal Itiopia e Oei

26 Di, masxaxa tei na Hi biteni mi Pilip bit, “Uvue xatuk e ukakao uhe saot e uhusil suse xa nggo Serusalem ba be Kasa. Suse ak ba nggur xoteh uruvuol.” 27 Ma Pilip bue xat xi, di, ba. E melele nen ak, eilep tei tahal Itiopia di nggusil suse ak. Xi be moletin xa di milaxat vatu xil na Kandis, suv toto tahal Itiopia xa be atou. Moletin ak tehe Serusalem tengan vamot mi Hi 28 e di minggusil suse nan tengan vatilomun vahe ut san. Xi nggo kat tei xa hos milihi, e melele xa ba, di buli rut sepinien e Vanuvei na Hi xa provet Aesea tetisi. 29 Ma Ninin Eo biteni mi Pilip bitene, “Uha, ha ute sangas visal moletin xa de kat iaxor.” 30 Misak ni Pilip miloh ba e milonge xa moletin ak di buli sepinien xa provet Aesea tetisi. Ma misisi bit, “?Xouk okil koute te naha xa di obuli iaxai?”

31 Eilep ak bit rilomun ni mini bit, “?Xosxa moletin ti nasep kil kuh minou, ma nikila itep?” Ma xi misis Pilip tengan vapeou vaha vatotan vatela e kat nan. Ma Pilip pol ni nggoni ngan xa xi biteni. 32 Sepinien xa de Vanuvei na Hi xa moletin ak di buli biteni mak bit:

“Moletin ak, nasi ti melele xa moletin xil litela ha lihasi imat,
ixoni sipsip tei xa ladela tengan lavasi vamat.
Xi navit ti neta melele xa lipol isa mini,
ixoni sulut sipsip tei xa tatangal ti melele xa lakot rerat hilin.
33 Xil lipol ni unounen mini.
E melele te lepisien, xil linahusil ti suse xa momal.
Moletin ihe tovuol xa ikila isep usil horamue nan xil,
vengan xa lihur xoteh meulien nan ra ut etan.”

34 Eilep ak misis Pilip bit, “?Hiteni minou, provet ak di misep usil visi vari xiak? ?Di misep usil xi mun tang, mu mosav tova?” 35 Di, Pilip misep kil koute te sepinien ak mini e misetu mun ni longeongen hos usil Iesu mini. Ma eilep ak mike reitin en. 36 Melele xa di lunggusil suse luba, lumei e rute tei xa oei di en. Ma eilep ak biteni bit, “Oei xi tak. Xosxa onemi bos, ma ubaptaes ni nou li en.”

37 E Pilip bit rilomun ni mini bit, “Nakila niterir ni xouk en xosxa oneket nggo meulien tevi nam.”

Ma xi biteni bit, “Inou nake reitin xa Iesu Kristo be Nat Hi.”

38 Ma eilep ak misemae ni moletin nan tengan vapol ni kat nan vangel. Di, xal Pilip, lube tan e oei, e Pilip derir ni en. 39 E melele xa lumea lukakao reling oei, vatakes, Ninin Eo na Hi mei nggur rat Pilip be rute sav. E eilep ak, xi tapus ti mun e nggusil suse nan ba del sien. 40 E Pilip mitemanin e pusi xa da ngamu e Asotas. E suse nan xi di misetu ni longeongen hos e taon xil ngasen vuma ... duxoh Sesaria.

Copyright information for `TVK