Daniel 3

Tua na Daniel Xatel Latobit Latnamot ti mi Nanao na Suv Toto tahal Babilon

Daniel 3:1-30

Vatei, suv toto Nebukanesa tesemae ni moletin nan xil tengan lapol ni nanao tei xa mahulong. Melele xa latepet nanao ak tesoh, mita nen tetuxoh hanutap tei e hexalu mun (30) e ien tetuxoh mita tol (3). Di, latehas xole ni gol e latepeti tesoh tete valkesao e rute xa lakesi ni 'Dura' e provins tahal Babilon.

Di, suv toto misilasil ve eilep nan xil tengan mei lale rohon ni nanao nan xa latepol ni: minista nan xil, vat te provins xil, ngan xil xa lapol nggoni area sekreteri, ngan xil xa lasa suse mini, ngan xil xa lalaxat mani nan, ngan xil xa di lalepis moletin xil, polis nan xil, suv xil vus, e eilep savsav xil mun xa ladi e provins xil.

Melele xa moletin xil vus ak ladi vituei ve tuxolxatien te nanao ak, moletin tei xa di be vulonge suv toto mei misepin be nesao mi moletin xil bit, “Ngan ak be rae na suv toto bat mi moletin te kantri xil vus xa di lasepin ni hisit sepinien xil tevusien. Melele xa mulong liten xil te amaru, vangivue, eiou, kitar, iukalele e neta sav xil mun, xamim vus, mutingeiril e mumot mi nanao xa be gol xa suv toto Nebukanesa milingi da xiak. E xosxa ti e xamim linatingeiril e linamot mi nanao ak, vatakes, lilah xil ha liso xil lihe oven xa mahulong xa upang teni nggeih pupu.”

Misak ni, melele xa moletin te kantri xil vus xa di lasepin ni hisit sepinien xil tevusien lalong holesok xil ak lasel, xil vus latingeiril e lamot mi nanao xa be gol xa suv toto Nebukanesa tepeti.

E melele nen ak, rute ngan xil tahal Babilon lamei tengan lasep purun mol-Isrel xil. Xil lamei labiteni mi suv toto Nebukanesa labit, “O suv toto xa hisom be nesao xa be nesao, meulien nam ita vehakut. 10 Xouk suv toto, otesemae ni xa melele xa moletin xil lilong liten te holesok xil, ma xil vus litingeiril e limot mi nanao ak xa be gol. 11 E xosxa ti e xil latatingeiril ti tengan lamot mi nanao ak, lilah xil ha liso xil lihe oven xa mahulong xa upang teni nggeih pupu. 12 E rut Siu xil ladi, xa hise xil Sadrak, Misak, e Abednego, xa xouk oteling xil latlaxat provins tahal Babilon. Xil vari iaxa latapol ti vahusil rae xa xouk oteling xati. Xatel latamot ti mi hi nam xil, e latenatingeiril ti mi nanao xa otepeti.”

13 Melele xa suv toto milonge mak, ien mikat pupu e misemae ni moletin nan xil tengan laleh moletin xatel ak latomei latosoh pe meten. 14 Melele xa lamei, xi biteni mi xatel bit, “!Sadrak, Misek e Abednego! ?Midep? ?Be reitin xa xamitel iemitel ti tavei xa mutomot mi hi navan xil, e muttenatingeiril ti mi nanao xa be gol xa natepeti? 15 Taxeak, melele xa mutilong liten xil te amaru, vangivue, eiou, kitar, iukalele e neta sav xil mun, e mutitingeiril sung e mutimot mi nanao navan, ma ihos mi xamitel. E xosxa mutnapol ni ti, ma, vatakes, liso xamitel mutihe oven xa muhulong xa upang teni nggeih pupu. ?Xosxa lipol ni imak mi xamitel, ma mutnemi mutbit hi tova mikila iteh meulien e xamitel ra heok?”

16 Di, Sadrak, Misak e Abednego latobit rilomun ni mini latobit, “O suv toto Nebukanesa xa hisom be nesao xa be nesao. Xametel matsakras matohit ti neta e rin xa nametel. 17 Xosxa uso xametel matehe upang te oven, ma Hi nametel xa di matemot mini mikila iteh meulien e xametel e ileh rat xametel ra hem. 18 E tave ti neta xosxa Hi namatel napol ni ti namak, iemetel bei xa xouk, suv toto, okila xa matosakras matomot mi hi nam xil mu matotingeiril mi nanao xa be gol xa otepeti teta.”

19 Melele xa Nebukanesa milong sepinien natel, ien mikat pupu e meten pili xat Sadrak, Misak e Abednego. Ma xi misemae ni moletin nan xil tengan liso av ihe holu ihe oven ak tengan isak ni itin xa itin ihe lu e he sav (7) ili ngan xa di mitin vehakut. 20 E xi misemae ni rut moletin nan xil te vaeen xa vexil nggeih tengan livar xat xatel e liso xatel lathe oven xa upang di minggan nggeih xa nggeih pupu en. 21 Ma vatakes, laleh xat xatel latomei e labar xat xatel xa latosing tamu ni eising natel xil. Di, ladel xatel tengan ha laso xatel latohe upang. 22 E melele xa moletin te vaeen xil laba laso xatel latobe upang, upang ak duxoh moletin te vaeen xil ak e ngga vin xil vengan xa rae na suv toto te xeih pilei mak e latepol ni upang tepili pupu. 23 E Sadrak, Misak, e Abednego, latekiri latobe vangit oven xa upang di pili en, e ao di xat xatel tamu.

24 E melele xa Nebukanesa di miketeh pus xatel, mitemanin e xi mitamea misoh e misis moletin nan xil bit, “?Ei, midep? ?Moletin tehe tol tang iaxa mutevar xat xatel e muteso xatel latehe upang?”

Ma xil labit rilomun ni mini labit, “Io, suv toto, tol tang.”

25 Ma suv toto bit, “?E veneh ma di napus xatel latbe hat sung iaxa di latkapis e upang ak? Napusi lehit ao tovuol e xil, e upang taxul xatel ti. E ngan xa be hat nen, napusi nggoni masxaxa tei.”

26 Ma Nebukanesa be visal puiteh te oven ak e mikei ba ni xatel bit, “!Sadrak, Misak, Abednego, moletin xatel na Hi xa be Reitin, tostal tomei hale!” Ma vatakes, lattestal ra upang.

27 E melele xa moletin xil lalongeong ni rin ak, minista xil, vat te provins xil, ngan xil xa lapol nggoni area sekreteri, del eilep savsav xil mun lamei tengan lapus ti termali xatel ak xa latestal ra upang. E lapusi xa upang taxul ti xatel vari. Reitin, upang tenaxa ti hiliatel mu eising natel, e latapongos ti vari vo eas e xatel.

28 E pe met moletin xil ak, suv toto biteni bit, “Ripet rat his Hi na Sadrak, Misek e Abednego. Vengan xa xi tesa masaxa nan temei tehur xol xatel e teteh meulien e xatel xa di latepol mini e latling nenesien natel en. Latlong ras rae navan, e latemaen xoteh meulien natel tengan latnamot ti mi hi sav xa tave Hi xati natel ti.

29 “Misak ni nasemae ni mak: xosxa moletin tova isep isa ni Hi na Sadrak, Misek e Abednego, moletin navan xil lital papas tenben xil vus e lihu len nim man. Neta sav xa nggo kantri eah, mu be hisit moletin eah, mu di misepin ni sepinien eah. Vengan xa Hi tovuol mun xa mikila vateh meulien na moletin xil vamak.”

30 Di, suv toto pet rat Sadrak, Misek e Abednego mei latbe eilep pilei sung e provins tahal Babilon.

Copyright information for `TVK