Daniel 5

Hi Mitis Selxatien Tei Bat mi Suv Toto Belsesar

Daniel 5:1-9, 13-31

Vatei, e melele xa suv toto hu xa hisen Belsesar telaxat moletin xil, xi tepol ni anien tei xa eilep e tesilasil ni vat xil na moletin nan xil xa labe taosen tei (1000). E melele xa lamei vituei, suv toto ak di mumun del xil. Melele xi di lamun, suv toto Belsesar misemae ni rut moletin nan xil tengan ha lileh kap te uaen e pesin xil xa lapol ni ni gol e silva vengan xa bit xi e vat nan xil, atou nan xil, e atou sav nan xil mun likila limun en. Holesok xil ak, tata nan xa tehe suv toto Nebukanesa teleh rerat xil ra Nim Eo na Hi e Serusalem. Tavehi ti, laleh kap te uaen e pesin xil ak xa labe gol lamei, e xil vus di lamun en. E melele xa di tamu lamun, di lapet rat hi nae xil xa labe nanao tang xa lapol ni xil ni gol, silva, brons, aean, liei e hat.

Vatakes, he moletin tei mistal e di midis e hilaep te seri vesis te nim ma suv toto. E rute xa midis en, latepol kuhi ni semen e laet di mileluv en. Mak, ma suv toto di vari pus he moletin ak melele xa di midis. E melele xa pusi mak, ulin mikan pupu, ven mei memel e len di malili ni. Ma xi [mingaten] e mikei ves moletin tova nan vaha valeh moletin xil xa di lapol ni vongou, ngan xil xa labe lingling temat, e ngan xil mun xa di lalele ni neta nggo hitu xil.

Melele xa moletin xil ak lamei visali, suv toto biteni mi xil bitene, “Xosxa tei e xamim mikila ivuli tisen ak e ihit koute teni minou, ma lising kuhi ni ni eising tei xa ihos pupu ixoni ma suv toto xil kestang. Ti, lisoxolen sen tei te merereen xa be gol ite hiraen. Ti, nipol ni mei ihe nesao mu ni moletin xil vus te kantri navan. Inou itel ninok kestang, malihe nesao mu maleli.”
E melele xa lamei lapus tisen ak, xil lasakras lavuli mu lavit kil koute teni mini. Melele xa suv toto Belsesar milonge mak, ulin mikan tova tang e ven memel pupu ni. E vat nan xil mun latakil ti vari xa lipol ni naha mun.

13 Di, ladel Daniel bemei sangas visal Belsesar. E suv toto biteni mini bitene, “?Xouk iaxa obe Daniel, ngan xa tata navan tehur ratuk ra voninom e tehuruk otemei inggak? 14 Nalonge xa ninin na hi eo xil lase xatuk e xouk okilakil kuhi, obe metisou, e di opus suse te holesok xil. 15 Moletin xil ak labe metisou e rute ngan xil labe lingling temat. Inou natesilasil ni xil tengan lamei lavuli tisen ak, e lasakras lavit kil koute teni minou. 16 E nalonge xa xouk iaxa okila ovit kil koute te neta xil xa minggus e osep kil holesok xil xa nggeih. Xosxa xouk okila ovuli tisen ak e ovit kil koute teni minou, ma lising kuhi ni xouk ni eising tei xa ihos ixoni ma suv toto xil kestang. Ti, lisoxolen sen tei te merereen xa be gol ite hiraem. Ti, nipol ni xouk mei uhe nesao mu ni moletin xil vus te kantri navan. Inou itel ninok kestang, malihe nesao mu maleli xouk.”

17 Ma Daniel bit rilomun ni mini bit, “Suv toto navan, sanien nam xil ak ukila uleh xat xil ihe nam tasom, mu usa ni mi mosav tova. E neta sav xa nihur neta mu ninahuri ti, e inou nivuli tisen ak ve xouk, e nihit kil koute teni minuk.

18 “O suv toto uteong kuhi, Hi te ut nesao tepol ni tamom Nebukanesa mei tehe suv toto tei xa eilep e tesa merereen e xeihen mini. 19 E ve xeihen xa Hi tesa ni mini, moletin xil vus te ut etan xa texo kantri xil vus, hisit moletin xil vus e sepinien xil vus, xil vus ulixil tekan ni e di latmalili pe meten. Melele xa tehit vahas moletin tei vamat, tehas vari ni. E melele xa tehit vamaen moletin tei vameul, ma temaen ni meul. Xi temerere ni ngan xil xa en tehei vamerere ni xil. E ngan xil xa en tehei vapol ni xil lave unoun, tepol vari ni tang.

20 “E vengan xa xi tepet rat xi tasen e nenemien nan, e tepol tesa mi moletin sav xil vengan tehe valkoai tei, ma Hi teso rati ra voninen te xeihen nan e tehur rat his te merereen rani. 21 Latehol rati tehe reling moletin xil, e nenemien nan temei texoni vuran tei tang. Xi teti tetel dongki reran xil, e di tea husmunae texoni buluk xil. Xi tepat e valkesao e nin di tesal e tenben. Xi tetat temak tetuxoh melele xa xi tenem kila xa Hi te Xeihen kestang di milaxat sen ut xil vus e ut etan e mikila ihosei moletin tova xa xi ien bei tengan vasa lelaxatien teni mini.

22 “E xouk, o Belsesar, xa obe natnali, neta sav xa okil kuh holesok xil ak, e otapol ni nenemien nam ti vahe tan. 23 Xouk iaxa di opet rat xouk tasom obe nesao oleli Hi te ut nesao. Xouk oleh kap te uaen e pesin xil xa labe gol lamei, xa lateleh rerat xil ra Nim Eo na Hi. Di, xamim vus di mumun en: xouk, vat nam xil, atou nam xil, e atou sav nam xil mun mumun en. E melele xa di mupol ni mak, xamim di mupet rat hi namim xil xa be nanao tang xa lapol ni xil ni gol, silva, brons, aean, liei e hat. Hi xil ak labe hi votei xil xa lasakras laketeh, lasakras lateong, e latakil ti neta. E xouk, otamerere ni Hi ti xa meulien e kakaoen nam de pe hen kestang.

24 “Vengan xa otepol ni temak, ma Hi tesa he moletin ak tengan mei vatis sepinien xil ak. 25 Tisen ak, sepinien teni mak:

MENE, MENE, TEKEL, PERES

26 E koute teni mak:

Mene - koute teni be 'vulien'. Hi tevuli xat melengien xil te lelaxatien nam, e tesak ni mei tetuxoh hoxalite teni.

27 Tekel - koute teni be 'sikel'. Xi tesikel ni xouk e tekameti xa xouk otapin ti pe meten.

28 Peres - koute teni be 'setien'. Hi teseti lelaxatien nam e tesa ni sung mi mol-Mid xil e mol-Persa xil.”

29 Vatakes, Belsesar misemae ni moletin te polien nan xil tengan lasing kuhi ni Daniel ni eising tei xa bos na suv toto xil kestang. Di, lasoxolen sen tei te merereen xa be gol de hiraen. Di, pol ni Daniel mei be nesao mu ni moletin xil vus te kantri. Suv toto del ninen kestang, lube nesao mu luli.

30 Di, e vongien nen tak, latehas vin Belsesar, suv toto tahal Babilon. 31 Di, Derias tahal Mid, xi nggur xoles voninen, e mei milaxat kantri ak. Huram na Derias tehe hanutap tol e lu mun (62) melele xa mei tehe suv toto.

Copyright information for `TVK