Daniel 6

Hi Misikoe Xol Daniel Melele xa De Vul Ma Laeon Xil

Daniel 6:1-28

Melele xa Derias mei tehe suv toto, xi tehosei minista nan xil latehe handred tei e hanutap tei mun (120) tengan lilaxat rute xil vus xa di pe hen. Di, xi tehosei Daniel tetel xat moletin lu mun tengan latihe vat na minista xil ak tengan latipol e rin na suv toto Derias e latilaxat kuh holesok xil vus nan tengan xi nanexo pupu ti ve neta tova.

Tavehi ti, moletin xil vus latepusi xa polien na Daniel tehos mak mu teli polien na vat sav xalu e na minista sav xil mun vengan xa ninin xa bos teta en. Ma suv toto Derias tehit bos xa iling Daniel tengan ilaxat rute xil vus xa di pe hen. Tesak ni vat xalu e minista sav xil latenem tesa ni Daniel e latesak tengan lakamet neta tova xa di pol ni misa e polien nan. E latesakrasi, vengan xa Daniel, polien xil vus nan temal tevi, e di tepol vuol ni polien nan xil e tenapol ni ti neta vasa.

Di, vatei eilep xil ak labiteni mi xil labit, “Xir rasakras rakamet rin tova xa Daniel vapol ni vasa. E xos rikila rital xati ixo rin taxa di nggusil xat rae xil na Hi nan.”

Ma xil laba lapus suv toto e labiteni mini labit, “O suv toto Derias xa hisom be nesao xa be nesao, meulien nam ita vehakut. Xamem vus xa otehosei xamem mei di mapol nggoni eilep na moletin nam xil, mamei e nenemien tei. Xamem mabit vahos mak mu xosxa xouk, suv toto, uling xat rae tova tengan moletin xil vus limot e lisis minuk kestang ituxoh aveti tei. E xosxa moletin tova imot mu isis mi hi sav tei, ma liso ni ihe vul ma laeon xil. O suv toto, xosxa umaen ni, ma masisuk tengan utis nenemien ak mei ihe rae tei e utis xat hisom ita en. Imak, ma nggusil sexien te rae nar xil tahal Mid e Persia, moletin ti vari nahiles rae ak mu nahur rati.” Ma suv toto Derias maen ni e midis xat rae ak e midis hisen da en.

10 Melele xa Daniel milongeong usil rae ak, xi dilomun be nim man e ba be vontoen tei xa de nesao. E rute ak, xi ba mitingeiril be tan sangas visal windo xa miketeh momal ni Serusalem, e misis e di memes Hi. Vatol e melengien tei, xi di pol ni mak, nggoni ngan taxa di pol vehakut ni. 11 Di, elu na Daniel xil labituei laba, e lakameti xa Daniel di misis mi Hi nan ve tutouen. 12 Ma xil vus ladilomun labe visal suv toto e lasisi e rin te rae nan labit, “!O suv toto! ?Reitin, xa xouk otetis hisom tete rae tei xa bit moletin xil ti lisis minuk kestang ituxoh hoxalite te aveti tei? E xosxa ngan ak be reitin, ma moletin tei xa misis mi hi sav tei mu moletin sav tei e melengien xil ak, ma liso ni ihe vul ma laeon xil.”

Ma suv toto bit rilomun ni mi xil bit, “!Io! Rae ak da e lasakras lavilhilesi nggoni sexien te rae xil tahal Mid e Persia.”

13 Di, labit rat Daniel mini labit, “Daniel, ngan Sudah xa latehur rati ra voninen, xi di minem mele ni xouk, suv toto, e tahusil rae nam ti xa otetis hisom teta en. Xi di ni ngan taxa di misis mi hi nan vatol e melengien tei.”

14 Melele xa suv toto milonge mak, xi minexo pupu. Ma di misak tengan vakamet suse tova xa vatutou ni rin na Daniel. Xi di misak tengan vateh meulien en ba duxoh melele xa eai ba minu.

15 Di, elu xil na Daniel ladilomun lamei visal suv toto e labiteni mini labit, “O suv toto, okila ngamu xa nggoni sexien te rae xil tahal Mid e Persia di biteni, moletin tovuol mikila vahiles rae tei xa suv toto teling xati.”

16 Ma suv toto misemae tengan latel Daniel vamei. Di, laso ni be vul ma laeon xil. E xi biteni mi Daniel bitene, “Ieok bei pupu xa Hi nam, xa di omot mini vehakut, xi iaxa mei iteh meulien e xouk.”

17 Di, lapo hat tei xa mahulong e lasikoe xol puiteh te vangavul ak ni. Di, laling tan xa pili mikapis xol hat ak tengan vavil xati. Di, suv toto, del eilep nan xil mun, lasi mele ni ring nae xil en. Ngan ak pisen ni xa moletin ti vari natal rat Daniel. 18 Di, suv toto dilomun be nim man. E xi ien ti tavei vaanian, e ien ti tavei moletin tova mun vamei vasa sien mini. E vongien ak, xi misakras vapat.

19 Di, makoe roroh tamu, suv toto mea e mitamanon be vangavul ma laeon xil. 20 Melele xa xi be sangas visal vul ak, mikei del nenexoen bit, “?Daniel, moletin te polien na Hi xa meul, omeul tamu? ?Hi nam xa di omot mini vehakut, xi tehur xeihen tepin tengan vasikoe xolok ra laeon xil?”

21 E nggo vangavul ak, Daniel misepin bit, “O suv toto, xouk uta vehakut. 22 Hi navan misil masxaxa tei nan bemei tekoe xol vulonge laeon xil ak. Misak ni xil latavas nou ti vengan xa xi pusi xa namese tang pe meten. E suv toto, natnapol ni ti neta vasa vaha xatuk.”

23 Melele xa suv toto milong rae na Daniel, xi memaal pupu ven, e misemae tengan lilihi rat Daniel ra vangavul ak. E melele xa ladal rati, lapusi xa neta ti vari tenaxula vengan xa xi tenesi e Hi nan.

24 Di, suv toto misemae tengan lital xat moletin xil vus xa latsepin tesa teha xat Daniel. E laso xil vus, del atou nae xil e horamue nae xil mun labe vul ma laeon xil. E melele xa latnatuxoh tan ti mu, laeon xil labut xat xil e langar vuvul si xil.

25 Di, suv toto Derias midis sepinien ak mikapis ba mi kantri xil vus e ut etan, mi hisit moletin xil vus, e mi ngan xil xa di lasepin ni sepinien sav xil. E tisen nan tehiteni temak:

  • Hosien e tomat iti mi xamim.
26 

  • Nasemae ni xa moletin xil vus te kantri xil xa di pe heok, limerere ni Hi na Daniel e ulixil ikan ni.

Vengan xa xi be Hi xa meul
e ita vehakut ha vuma ... da tuok.
Moletin ti nasakras napangei lelaxatien nan,
e ihe suv toto na moletin xil vus ha vuma ... navus ti.
27 Xi di dutou ni moletin xil
e di miteh meulien e xil.
Xi di pol ni merekel xil e sexien sav xil xa tellep
e ut nesao e ut etan.
Xi vari iaxa teteh meulien na Daniel
ra xeihen na laeon xil.”

28 Ma Daniel temeul e tepus hosien e melengien xil xa Derias tehe suv toto, e melengien xil mun xa Saeros tahal Persia tehe suv toto.

Copyright information for `TVK