Exodus 1

Mol-Isip Xil Lasak Purun Mol-Isrel Xil

Eksodas 1:1-14, 22

Melele xa Siekob tehe hal Isip, horamue nan xil latehusili tetel xat atou nae xil e horamue nae xil mun. Ngan ak be his natneli xil xa latehusili: Ruben, Simeon, Livae, Sudah, Isakar, Sebulun, Bensamin, Dan, Naftali, Kad, e Aser. Ngan xil ak xa latestal latexo vatimol xati na Siekob tetel tuten nae xil mun, xil latetuxoh hanutap tol e he xalu mun (70). Natnali Siosep teta ngamu e hal Isip. Huram xil holu mei tetavi, e Siosep tetel tuneli xil e ngan xil mun xa tehe xil latemei e kantri tahal Isip tetiamu, xil vus latelel. E horamue nae xil ladit e rute ak e laleh horamue nae xil mun ba vuma ... mei labe holu xa labe holu pupu. Ma melele xa huram handred hat (400) mei mitavi, mol-Isip xil lapusi xa mol-Isrel xil, xeihen di e xil vengan xa mei labe holu pupu e kantri nae e lalonge nggoni lase sein ut xil vus.

Di, laling suv toto hu tei mun mei milaxat kantri tahal Isip, e xi bit nakil ti Siosep mu polien nan xil. Xi biteni mi moletin nan xil bit, “Mol-Isrel xil ak labe holu pupu e langgur xeihen mili xir. 10 Xosxa moletin xil te kantri sav lihit lipol ni vaeen mi xir, ma mol-Isrel xil likila limos e xil, lihas vin xir, e lilesae reling kantri nar. Ve rin ak, rilang ves suse tova xa ipol ni xil linave holu ti mun.” 11 Misak ni, mol-Isip xil lapol ni xil mei labe slev nae xil e laling moletin xil mei labe vat nae xil xa di lameas pangas xil e di lasak ni xil lapol nggeih. Nggo vetin na mol-Isrel xil, lapet metimal lu xa tellep tahal Pitom del Rameses tengan liserep kuh holesok xil na suv toto iti en. 12 E tave ti neta xa mol-Isip xil di lasak purun mol-Isrel xil, xil mei labe holu pilei sung e lase sein ut xil ngasen. E mol-Isip xil vus, ulixil mikan ni xil. 13 Misak ni, mol-Isip xil di lasak tengan lavas vin xil ni polien. 14 Langgeih xat mol-Isrel xil tengan lapol ni nim mae xil xa tellep e laleh holesok xil xa te meas. Lasak ni xil lapol nggeih e naho sae xil e lapol ni polien sav xil mun xa nggeih pilei mak. Nggo rin xil holu iaxa mol-Isip xil lapol ni meulien na mol-Isrel xil nggeih pupu, e iexil tasae ti e xil vari tang.

22 Neta sav xa mak, e mol-Isrel xil mei labe holu pilei sung. Misak ni suv toto tahal Isip misemae ni moletin nan xil bit, “E tuvava xil na mol-Isrel xil, ngan xil xa labe atuli, mumaen xil limeul. E ngan xil xa labe malahos, ha muso xil lihe Oeisal Nael tengan ha lilel en.”

Copyright information for `TVK