Exodus 11

Dutou ni holesok xil xa tellep xa tepol ni, Iahova biteni mi Mosis bit, “Nisa kor ni pangasien tei mi suv toto tahal Isip e mi moletin nan xil. Ivus ti, xi imaen xamim muha. Reitin, ixeih xat xamim tengan muha itel holesok namim xil. Itiamu xa muha, uhiteni mi mol-Isrel xil vus tengan ha lisis mol-Isip xil xa ladi sangas visal xil tengan xil lisa ti holesok xil xa lapol ni ni silva mu gol. Ma Iahova misak ni mol-Isrel xil mei labe eilep mak mu pe met mol-Isip xil vus. E Mosis mun mei be eilep tei pe metexil e pe met eilep xil na suv toto tahal Isip.

Mosis ba rilomun visal suv toto tahal Isip e biteni mini bit, “Iahova biteni mak, 'E hilaep te vongien, inou nika pas rute xil vus e hal Isip, e nipol ni horam muimol xil vus na mol-Isip xil lilel. Reitin, xil vus lilel: muimol na suv toto xa dotan e voninen te xeihen, ha ituxoh muimol na atou xil xa labe slev xa di lasak mesen anien. E muimol na vongoro sae xil mun lilel. Tangen xa eilep ikapis e hal Isip. Isa mak mu ili naha xa mutepusi tetiamu, mu naha xa istal e huram xil xa ti imei. E rute xil xa mol-Isrel xa ladi en, tangen ihe tovuol, holesok xil vus liti votei. E kuli xil mun, linamuis xat moletin mu vongoro xil ti. Imak, ma xamim mukila sung xa inou, Iahova, di nalepis mol-Isrel xil misav ni mol-Isip xil.'”

Melele xa Mosis di tamu misepin mi suv toto, ien mikat ma biteni mun mini bit, “E melele xa sexien ak istal, eilep nam xil mei limot minou. Xil lixeih xat nou tengan nileh rat moletin navan xil ra xil. Ivus ti, niha sung.” Melele xa misepin bus, Mosis mikavitou ni suv toto ak, e be relingi.

Copyright information for `TVK