Exodus 34

Hi Misa Rilomun ni Rae He Xalu Nan mi Mol-Isrel Xil

Eksodas 34:1-2, 4-10, 28-35

Iahova biteni mi Mosis bit, “Upol ni hat ihe lu ixoni ngan xa natepol ni tetiamu, ngan xalu xa oteho len ni. Ti, inou nitis rilomun ni sepinien xil en xa natitisi tetiamu. Uvue xatuk, e visuvong makoe, umei nesao e Vathu Senae e mei usoh pe metok.”

Ma Mosis dei xoles hat lu mun xa lumehin. Di, ut milan, mileh xalu be nesao e Vathu Senae nggoni ngan xa Hi tehit xati mini. Di, Iahova nggo momah tei bemei e tan e mei misoh sangas visali e bit rat his eo nan mini bit, “Inou Iahova.” Di, Iahova mitavi e Mosis e bit rati bit,

“Inou, nabe Iahova,
Hi xa esaeen e eheien hos di en.
Hi xa tatamanon ti ni ekaten nan, e tinen di e moletin xil.
Hi xa pol vuol ni hitxatien nan xil.
Reitin, nihur xat hitxatien navan itel moletin xil, horamue nae xil, havneli nae xil mun ha vuma ... navus ti va tova.
Ngan xil xa lapol mikavui, langgur xoteh rae navan xil, e lapol ni tesaen xil,
inou nakila nipisen eheien navan mi xil e niketeh ihos mun mi xil.
E neta sav xa mak, nilepis xil ve tesaen xil xa latepol ni,
e nisa pangasien imei ipurun xil, itel horamue nae xil e havneli nae xil mun.”
Vatei takes, Mosis mot be tan e mitingeiril mini, valnaon duxoh tan e biteni mini bit, “Iahova, xosxa di obesi xouk venou, ma nadak kesuk tengan xouk umei itel xat xamem. Be reitin xa moletin xil ak, vatixil nggeih pupu, e uketeh ihos rilomun ni xamem li ve sexien tesa namem xil e upol ni nenemien nam ihe teviei li e rin xa namem. E uhur pilei xamem li mei muhe moletin nam xil.

10 Iahova bit rilomun ni mi Mosis bit, “Xosali, inou nipol ni hitxatien te xeih tei itel mol-Isrel xil. E pe metexil, inou nipol ni holesok xil xa tellep e isav ni ngan xil xa di testal e kantri sav xil. Moletin xil vus te ut etan lipus holesok xil xa tellep xa inou, Iahova, ti nipol ni. Xil ti limesep vengan xa inou nipol ni sexien xil mei istal xa ihe tellep xa ihe tellep.”

28 Mosis de rute ak del xat Iahova melengien be hanutap lu (40). E melengien e vongien, xi taxa ti neta e tamu ti neta. Xi dei sepinien te hitxatien na Hi di e hat lu ak xa be Rae He Xalu (10) na Hi.

29 Melele xa Mosis misuvul bemei e tan ra Vathu Senae, mileh xat Rae He Xalu (10) ak. E melele xa be visal moletin xil, xi takil ti xa valnaon minehin pupu vengan xa xi tesepin tetel xat Iahova. 30 E melele xa Eron del moletin xil lapusi mak, ulixil mikan e latava ti sangas visali. 31 E melele xa Mosis mikes viton moletin xil, Eron del eilep xil te vatimol xil lamei visali, e Mosis misepin mi xil. 32 Di, mol-Isrel xil mun lamei visali e Mosis misa rae xil na Hi mi xil xa Hi tesa ni mini e Vathu Senae. 33 Melele xa Mosis misepin bus, xi mikutaxol valnaon ni kaliko tei xa mahin xa mikila vaketeh vakital en. 34 E melele xil ngasen xa Mosis be Nim te Hisuen tengan vasepin vatel Iahova, xi nggur rat kaliko ak. E melele xa mistal, mei bit vuol ni holesok xil vus xa Hi tesemae ni tengan ihiteni mi moletin xil. 35 Melele xa moletin xil lamei tengan lapusi, lapusi xa valnaon di minahin. E melele xa misepin mi xil bus, miling rilomun ni kaliko dakoe xol valnaon duxoh melele sav xa ba tengan vasepin vatel Iahova.

Copyright information for `TVK