Exodus 40

Iahova Bemei Etan e Mei Da Kat Del Mol-Isrel Xil

Eksodas 40:17-38

Di, Mosis misis moletin xil tengan lileh sanien nae xil iha mi Iahova tengan lipol ni Nim Tavolin na Hi ni itel holesok nen xil e eising na pris xil mun. Ma mol-Isrel xil laleh holesok holu xa holu bemei visali. Di, Hi bosei moletin lu xa lunggur metisouen tengan mei lalihe vat te polien, e his xalu be Besalel e Oholiap. Xalu lulaxat moletin sav xil te polien xa langgur metisouen tengan lipol ni holesok ihusil nenemien xa Hi tepisien ni mi Mosis.

17 Misak ni, e melengien kokot te aveti kokot te huram hu, xa be huram tei xati dutou ni melele xa latemea reling hal Isip, xil lapet Nim Tavolin na Iahova. 18 Mosis misak ni moletin xil laleh liei xil teni e mei lalingi e vonine del vesis teni. Di, veat del setaman xalu teni, lalihi xil tengan vasomal. 19 Melele xa lalihi bus, xil lalihi tavolin dakoe xol liei xil vus teni. Di, lalihi tavolin tei mun da xole nggusil nenemien xa Hi tesemae ni mi Mosis.

20 Bus di, mileh hat xalu xa Rae He Xalu (10) di en e ba milingi e vangit Bokis te Hitxatien na Hi. Di, misingin liei te poen xalu lube von talxatien nen. Bus di, laboh xole ni led nen xa be von esaeen a  na Hi. 21 Di, lapo Bokis te Hitxatien e ba laling de vangit Nim Tavolin. Di lalihi kaliko tei dakoe xol rute xa da en nggusil nenemien xa Hi tesemae ni mi Mosis. 22 Mosis biteni mi moletin xil tengan lipo vet xa ti liling holesok xil liti en e vangit Nim Tavolin, ha itat hale ra rute xa Bokis da en, e rin metu teni. 23 Di, Mosis miling kuh beret te sanien mi Iahova di e vet ak, nggusil nenemien xa Hi tesemae ni mini. 24 E rin meil, Mosis miling laet tei misoh da en xa meten be lu e he sav (7) xa upang ti ipili en. 25 Di, Mosis misahan met laet xil vus ak pe met Iahova nggusil nenemien xa tesemae ni mini. 26 Di, sangas visal kaliko, Mosis miling pesin xa lapol ni ni gol xa litin vokon en de hilaep te vet xal laet. 27 Di, midin vokon xil en nggusil ngan xa Iahova tesemae ni mini. 28 Melele xa miling kuh holesok xil e vangite, Mosis misoxolen kaliko tei nggoni puiteh te Nim Tavolin ak. 29 E hale te puiteh ak, xi misis moletin xil tengan lipo hor te sanien xa eilep ha lilingi en. Melele xa lalingi bus, Mosis bas vongoro tei e midin ni be sanien eo mi Iahova del xat utut uit xil nggusil ngan xa Iahova tesemae ni mini. 30 Di, misis xil tengan lapo pesin xa mahulong xa di lakas he xil en e lilingi e hilaep te hor te sanien e Nim Tavolin. Melele xa lalingi bus, lase oei ba en. 31 Lalingi mak tengan e melele xil vus xa Mosis, Eron mu natneli xil liha tengan lave Nim Tavolin mu latin sanien eo e hor teni, likila likas moten hexil mu lexil en nggusil ngan xa Iahova tesemae ni mi Mosis. 33 Melele xa polien ak bus, Mosis misak ni moletin xil lalihi kaliko be vioh mikapis xol Nim Tavolin ak del hor te sanien. E hol puiteh teni, lalihi kaliko tei mun dakoe xole. Ma nggusil sexien xil ak, Mosis pol vuol ni polien xil te Nim Tavolin na Iahova.

34 Di, momah na Hi mei da xol rute xa di labisu del Iahova en, e miehen nan mei mise vuol ni Nim Tavolin ak. 35 Misak ni, Mosis misakras vahe rute xa di bisu ni Iahova en vengan xa momah nan midakoe xole, e miehen nan mise vuol ni Nim Tavolin ak.

36 Momah na Hi da kat dat nesao e Nim Tavolin ak. E melele xa momah mea relingi, mol-Isrel xil mun lamea, laleh holesok nae xil, e ba langgusili. 37 E xosxa momah ak da kat tang, ma xil mun ladi kat tang. 38 Ma e melengien xil vus xa di langgusil suse nae, lakila lapus momah na Iahova xa de nesao e Nim Tavolin. E vongien, biles mei be upang xa di pili.

Copyright information for `TVK