Genesis 15

Hi Pol ni Hitxatien te Xeih Del Ebram

Senesis 15:1-6; 16:1-3, 15-16

Di, Iahova misepin mi Ebram nggo metuveen tei bit, “Ebram, ulum nakan ti. Inou nisikoe xolok tengan neta ti napurunuk e nisa sanien tei xa ihe mahulong minuk vengan xa di oling nenesien nam de nou.”

E Ebram bit rilomun ni mini bit, “?Iahova, Suv navan, sanien ak itutou ni nou itep, vengan xa horamue navan tovuol tamu? Moletin xa be vat e tim savan ihur sein holesok xil navan melele xa nimat, hisen Eliesar tahal Damaskas. Reitin, xi xa be slev navan tang xa latpesi e tim savan ihur sein holesok navan xil vengan xa otasa ti horamue minou.”

Di, milong Iahova misepin rilomun mini bit, “Slev Eliesar ak nahur voninom ti e naleh holesok xil vus nam ti e melele xa umat. !E-e! Horamue xati nam, xi kestang ihur voninom e holesok xil vus nam.” Di, Iahova dela be hale e biteni mini bit, “Keteh vahe nesao e tilang hat e uvuli pis hitu xil. Osakras. E vatimol nam xil lixoni hitu xil ak.”

Misak ni, Ebram miling nenesien nan e hitxatien na Iahova. Ma ve rin ak, Iahova besi xi ven e pus meulien nan momal pe meten.

Copyright information for `TVK