Genesis 17

Hi Biles His Ebram mei be Ebraham e Misa Sexien te Vexaho mini Tengan Vapisen Hitxatien te Xeih Nalu

Senesis 17:1-27

Melele xa Ebram, huram nan sangas duxoh hanutap lim (99), Iahova mistal mini e biteni mini bit, “!Inou, nabe Hi te Xeihen! Ulong xat nou e vehakut upol ni holesok xil xa momal pe metok. Nipol rilomun ni hitxatien te xeih itel xouk e nisak ni vatimol xil xa listal lixo xouk mei lihe holu mu.” Ma Ebram mitingeiril mini, valnaon duxoh tan. E Hi bit rilomun ni mini bit, “Inou nipol ni hitxatien ak itelak: nabit xati xa vatimol xil nam mei lihe vanut moletin xil holu xa lihe eilep. Ven rin ak, hisom nave 'Ebram' ti mun, e mei ihe 'Ebraham' vengan xa nipol ni xouk mei uhe vatit moletin te vanut moletin xil holu xa lihe eilep. Nisak ni vatimol xil xa listal lixo xouk mei lihe vanut moletin xil xa lihe eilep, e rute xil mei lihe suv toto xil. Inou nipol ni hitxatien te xeih itelak xa hoxalite teni ihe tovuol. Reitin, nipol ni itel xouk, itel horamue nam xil, e itel ngan xil mun xa listal lixo xil
17:7Rut vanuvei xil labit,“...e itel ngan xa istal ixo xouk ha vuma...”
ha vuma ... navus ti. Inou nihe Hi nam, e Hi nae mun.
Ut xa oda en xosali nggoni ngan halesav tei, inou nisa ni minuk e mi ngan xil xa listal lixo xouk e huram xil xa ti imei. Reitin, kantri tahal Kenan, iti e hemim vehakut tang, e inou nihe Hi namim.”

E Hi biteni mun bit, “E xouk, Ebraham, uhusil xat hitxatien te xeih navan, xouk itel vatimol nam xil mun xa listal lixo xouk. 10 Xouk itel nam xil mumae ni horamue xil vus namim mei lihe vexaho. 11 Imak, ma melele xa malohos xil vus namim lihe vexaho, ipisen ni xa munggusil xat hitxatien te xeih naralu. 12 E huram xil xa ti imei, tuvava xil vus namim xa labe malohos lihe vexaho e melele xa melengien nae ihe tol e he sav (8). Slev namim xil xa mulehi ixo ut sav itel horamue nae xil xa lipes xil e tim samim, 13 xil vus mun lihe vexaho. Imak, ma rut tenbe xa lipol ni vexaho en ipisen ni mi moletin xil vus xa munggusil xat hitxatien te xeih navan xa misakras vavus. 14 Xosxa moletin tei nave vexaho ti, ma xi nave moletin navan ti, vengan xa xi talong xat hitxatien te xeih navan ti.”

15 E Hi bit rilomun ni mi Ebraham bit, “Atou nam, onakesi ti mun ni 'Serae'. Xosali iha, hisen ihe 'Serah'. 16 Nituxol xati e nimaen ni ihur tuvava tei namil. Nipol ni mei ihe nana na vanut moletin xil xa ihe eilep e suv toto xil mun listal lixo xi.”

17 Ebraham mitingeiril mi Hi, valnaon duxoh tan, e di men mi xi tasen. E nenemien nan bit, “?Be reitin tomak xa tiramue mikila vasa tuvava mi atou tei melele xa huram nan duxoh hanutap lim (100)? ?E Serah mun mikila tamu vahur tuvava melele xa huram nan duxoh hanutap hat e he xalu mun (90)?” 18 Xi misis Hi bit, “?Osakras omaen ni li tengan Ismael mun vahur tuxolxatien xa osa ni minou?”

19 E Hi bit, “!E-e! Atou nam, Serah, ihur tuvava tei namil, e uling hisen ihe 'Aesak' xa koute teni be 'Menen'. Hitxatien te xeih xa napol ni delak, nipol ni mun itela e itel vatimol nan vehakut. 20 E di nalong naha xa xouk obiteni minou usil Ismael. Isak ni, nitokol xati e horamue nan xil mun lihe holu xa lihe holu. Xi ihe vatit moletin te vatimol lu he sav (12) xa mei lihe vanut moletin tei xa eilep. 21 E hitxatien te xeih navan, nipol ni itel horamue nam Aesak xa Serah ihuri e aveti ak te huram xa ti imei.” 22 Melele xa Hi misepin bus, mea rani be nesao.

23 Ma e melengien nen ak vari, Ebraham telong xat Hi e tepol ni vexaho mi malohos xil vus xa tehe xil lateti: Ismael, slev nan xil, e moletin sav xil xa di latehusili. 24 Ebraham, huram nan tetuxoh hanutap hat e hat e le sav mun (99) e melele xa tehe vexaho. 25 E Ismael, huram nan e melele nen ak tetuxoh tol e le sav (13). 26 Misak ni, Ebraham xal horamue nan lutehe vexaho e melengien tei takes, 27 tetel moletin te polien nan xil, slev nan xil xa texal xil, tetel horamue nae xil mun xa latestal latexo xil.

Copyright information for `TVK