Genesis 35

Melele xa Siekob mea ra kantri tahal Mesopotemia, Hi testal mini vatei mun e ut Betel e tetuxol xat rilomun ni. 10 Di, biteni mini mak, “Taxeak hisom be 'Siekob' xa koute teni be 'moletin te luvosen', e xosali iha, hisom ihiles ihe 'Isrel' xa koute teni be 'moletin xa texum tetel Hi'. 11 Inou nabe 'El-Sadai', xa koute teni be 'Hi te Xeihen'. Horamue nam xil mei lihe holu. Kantri holu listal lixo xouk e rute xil mei lihe suv toto xil. 12 Tan xil xa natsa ni mi avu nam Ebraham e tamom Aesak, nisa ni mun minuk e mi vatimol nam xil xa mei listal lixo xouk.” 13 Melele xa Hi misepin mini bus, be relingi. 14 Ma e rute xa Hi tesepin mini en, Seikob mikili ni hat tei misoh be simeleleen tei tengan ti inem xat naha xa Hi tehiteni mini. Di, nggur oel del uaen e mideh xalu xati tengan vapisen ni xa rute ak be ut eo na Hi. 15 E rute ak, Siekob teling rilomun ni hisen tehe 'Betel', 'nim na Hi'.

16 Melengien vahis mei mitavi, Siekob del moletin nan xil lamea reling ut Betel. E melele xa di tamu laba, sotin nen li ra hal Efrat, melele pipin xa Resel vahur tuvava e mikameti nggeih. 17 Melele xa di milong pangas xi ven, atou xa di dutou ni biteni mini bit, “Onanexo ti, horamue tei mun iaxai.” 18 E tave ti xa mak, pangasien xa da en be te maten tang. E melele xa Resel milehi kor ni sesehen nan, miling his tuvava ak be 'Ben-oni' xa koute teni be 'horamue te longpangasien'. E tamen sung bilesi mei be 'Ben-samin' xa koute teni be 'horamue xa ihe heok metu'.

19 Melele xa Resel mat, ladihin ni de seri suse xa be Efrat (e xosali, rute ak lakesi ni Betlehem). 20 Di, Siekob po hat tei xa eilep e milingi misoh tengan vapisen ni xa inggak be von tahinen na atou nan. E hat ak misoh dat rute ak duxoh xosali.

22 Siekob, atou nan latehe hat (4) e horamue nan xil latehe lu e le (12).
23 Horamue xil xa Leah teling xil tehe Ruben (xa be muimol na Siekob), Simeon, Livae, Sudah, Isakar, e Sebulun.
24 Horamue xil xa Resel teling xil tehe Siosep xal Bensamin.
25 Horamue xil xa Bilah, atou te polien na Resel, teling xil tehe Dan xal Naftali.
26 E horamue xil xa Silpah, atou te polien na Leah, teling xil tehe Kat xal Aser.
Ngan xil vus ak, lateleh xil e kantri tahal Mesopotemia.

Copyright information for `TVK