Genesis 39

Tave Ti Neta xa Sakpisien Xil Lamei e Meulien na Siosep, Hi Duxol Xati

Senesis 39:1-23; 40:1-23

Mol-Ismael xil ladel Siosep be xil labe Isip tengan ha lipos ni ihe slev. Ma moletin tei nggale, hisen Potifar. Xi be vat na mereketeh xil xa di laketeh xol nim xa mahulong ma suv toto tahal Isip. Melele xa de tim sa Potifar e Isip, Iahova dutou ni Siosep e holesok xil vus xa di pol ni. Misak ni, masta nan pus kila xa Iahova di pol ni holesok xil vus xa Siosep di pol ni mei bos mak mu. Potifar besi pupu ni xi ven, ma milingi mei be vat e tim san, e milaxat holesok xil vus nan. Ma, nggo he Siosep, Iahova duxol xat tim e naho xil sa ngan Isip ak. Ma vengan xa Siosep di milaxat kuh holesok xil vus nan, Potifar tanem ti mun neta sav. Minem kes ni anien taxa ia ni.

Siosep, ven nggeih e valnaon bos xa bos.
E melengien vahis mei mitavi, atou na Potifar miling nenemien nan en, ma misisi tengan vahe xalu ha lalopat vituei. E Siosep misin ni e biteni mini bit, “!Ei, masta navan, nenesien nan de nou e miling holesok xil vus nan di e heok tengan nilaxati. Xi tanem ti mun neta sav tova e tim san. Xi misa xeihen minou tengan raeok ixoni raen, e, e tim san, mae ni holesok xil vus minou. E xouk kestang, xa obe atou nan, xi mikenin xouk bit ninatuxoluk ti. Ma inou nasakras napol ni naha xa xouk di obiteni, sexien ak tamal ti pe met Hi.” 10 Melengien xil ngasen xi di nggeih ni Siosep tengan vahe xalu, e Siosep misin ni.

11 E vatei, Siosep be nim tengan va pol ni polien nan, e moletin sav mun tehe tovuol e nim. 12 Melele xa atou na Potifar pusi, xi miteli xat eising nan e biteni mini bit, “!Amei, pat vatel nou!” E Siosep misin ni, e milesae relingi, e eising tei nan da nga he atou ak. 13 E melele xa pusi xa Siosep milesae relingi e eising nan da nga tang, 14 xi mikei nggeih ba mi moletin nan xil te polien bit, “Mupus ti eising ak, na ngan Hibru xa moletin navan tehuri mei tete nim ak. Xi bit vapol purun xir. Temei von paten navan, e tesak tehit vapol vasa minou, e inou nakei nggeih. 15 E melele xa milong keien navan, xi mistokovein eising nan da nga visal nou e miloh mistal.”

16 Xi nggur xat eising na Siosep da nga visali duxoh melele xa Potifar dilomun bemei tim. 17 Melele xa tiramue nan bemei visali, xi bit usil tumulen ak mini bit, “Ngan-Hibru xa otehuri temei, xi temei e von paten mavan e tehit vapol vasa minou. 18 E melele xa telonge natekei texeih, xi testokovein eising nan tetanga e teloh testal.”

19 Melele xa Potifar milong tumulen ak, tinen misoh e en nggat pupu ni Siosep. 20 Misak ni, xi biteni mi mereketeh nan xil bit ha lipo xati e lilingi e nim te xeih tei xa laling moletin xil na suv toto ladi en melele xa lapol misa mini. E Siosep da kat dat rute ak. 21 E vangit nim te xeih ak, Iahova di mi Siosep e duxol xati mun. Misak ni, vat te nim te xeih di miketeh bos mini. 22 Ba vuma, vat ak miling Siosep mei be eilep e nim te xeih nan tengan ilaxat hisit polien xil vus e moletin xil mun xa ladi en. 23 Misak ni, vat te nim te xeih tanem ti mun neta tova xa milingi de he Siosep. Xi pus kila xa holesok xil vus xa Siosep di pol ni bos pupu vengan xa Iahova di dutou ni.

Copyright information for `TVK