Genesis 41

Hi Nggur Rat Siosep ra Nim te Xeih e Milingi Mei Be Vat te Kavmen tahal Isip

Senesis 41:1-16, 25-43, 47-57

Huram lu mei mitavi, e suv toto tahal Isip metuve xa misoh e seri Oeisal Nael. Melele xa de rute ak, xi pus buluk lu e he sav (7) lamea ra oei e ba di langga husmunae, e vexil bos e lakaio kuhi. Di, pus buluk lu e he sav mun (7) lamea ra oeisal, e vexil miko tang. Ngan xil ak lasoh e seri oeisal sangas visal ngan xil xa vexil mikaio. E ngan xil xa vexil miko, langga vuol ni ngan xil xa lakaio. Di, suv toto milale. Di, por sae mun, e pus metuveen tei mun tisav. Xi pus hunguit uit be lu e he sav (7) lameul ladi vatite tei takes, e xil vus lamen kuhi mak. Bus di, hunguite lu he sav mun (7) lastal e vatite tei tisav, e xil huite tasien kuhi ti vengan votiang tei xa mitin pupu nggo uruvuol mei bui xil. Melele xa di pusi, pus ngan xil xa latasien kuhi ti lameul xol vin ngan xil xa lamen kuhi. E melele xa suv toto mea, xi mikila xa pus kout metuveen tei. E makoe nen, xi minexo pupu, ma misilasil ve lingling temat xil del moletin te leleen xil tahal Isip tengan lamei. Melele xa lamei, xi misep usil metuveen nan xalu mi xil, e tovuol e xil vahit kil koute teni mini.

Melele xa vat na moletin xil xa di ladeh uaen pusi mak, xi bemei mei misepin mi suv toto bit, “Xosali, nanem rilomun ni neta tei xa natepol ni tamal ti. 10 Vatei, iem teat nou tetel vat na moletin xil xa di langgul beret am. Ma oteling xamel e he vat na mereketeh xil xa teling xamel mateti e nim te xeih. 11 E vongien tei, xamel vus matemetuve, e metuveen namel, koute te xalu luteisav. 12 Horam maxoe tei xa be ngan Hibru tete visal xamel, be slev na vat na mereketeh nam xil. Melele xa matehit metuveen namel mini, xi tesep kil koute teni mi xamel. 13 Holesok xil vus mei testal texoni ngan taxa xi tehiteni: xouk oteling rilomun ni nou e polien xati navan, e otehas vin ngan xa tehe vat na moletin xil xa di langgul beret am.”

14 Misak ni, suv toto misil moletin tei nan ba tengan vahur Siosep vamei. Ma vat takes, langgur rat katen ni tang ra nim te xeih, lasil moten ni, lakasi e lasing xole ni eising sav. Bus di, langguri ba misoh pe met suv toto tahal Isip. 15 Ma suv toto biteni mini bit, “Natepus metuveen tei e moletin tovuol vasep kil koute teni minou. Nalongeong ni xa xouk iaxa di osep kil koute te metuveen xil.”

16 Siosep bit rilomun ni mini bit, “Suv toto, tave nou ti, e Hi kestang iaxa mikila ihit koute teni mei istal tengan ukila.”

25 Melele xa Siosep milong metuveen nan xalu, xi biteni mini bit, “Metuveen nam xalu, di lupisen neta tei takes. Hi di pisen ni minuk neta xil xa istal e melengien xil xa ti imei. 26 Buluk lu e he sav (7) xa lakaio kuhi, del hunguit uit lu e he sav (7) xa lamen kuhi, koute te xalu vus be tei takes, e di lupisen huram lu e he sav (7). 27 Buluk lu e he sav (7) xa vexil miko, del hunguit uit lu e he sav (7) xa latasien kuhi ti, koute te xalu mun be tei takes tang, e di lupisen huram lu e he sav (7) te mae kekaten. 28 Nggoni ngan taxa nabiteni tuei minuk, Hi di pisen ni minuk naha xil xa xi ipol ni e melengien xil xa ti imei. 29 Huram lu e he sav (7) ihe huram xil te hosien xa anien ihe holu xa ihe holu pupu e hal Isip. 30 Ivus ti, huram lu e he sav (7) mun xa itutou ni ihe te mae kekaten. Mae kekaten ak isak ni moletin xil iexil ibong ni huram xil te hosien xa lateti en. 31 Reitin, iexir ibong ni huram xil te hosien vengan xa huram xil te mae kekaten isa pupu. 32 Hi di biteni minuk be valu tengan ukil kuh naha xa xi teling xati mei istal, e, navehi ti, ipol ni.

33 “Ve rin ak, ulang ves moletin tova xa be metisou e mikilakil kuhi. Ti, ulingi ilaxat kuh kantri nam. 34 Ulang ves ti moletin xil mun xa mei lihe vat xil xa liketeh xol polien xil te naho e huram xil te hosien. E melele xa moletin xil lise bak te uit ihe lim (5), vat xil ak lipo rat bak tei e hisom, e liling kuhi ita mese. 35 Ti, usa xeihen mi xil tengan lileh viton anien xil xa lateso xati tuei teti e hisom, e liserep kuhi iti e nim ti xil xa tellep e taon xil. Ti, xil ti liketeh xole. 36 Anien xil ak iti ituxoh huram xil te mae kekaten xa mei istal e Isip. Imak, ma moletin xil linalel ti e melele nen xil ak.”

37 Suv toto del moletin nan xil lamaal pupu ve nenemien na Siosep. 38 E biteni mi xil bit, “Rasakras rakamet moletin tova vaxoni Siosep xa ninin na Hi di mini.” 39 Ma biteni mi Siosep bit, “Vengan xa Hi pisen holesok xil ak minuk, mapus kila xa xouk kestang metisouen e kilakilen di e xouk mili sein moletin sav xil. 40 Inou nilinguk uhe vat te kantri navan e moletin navan xil lilong xat sepinien nam. Xeihen te holesok xil vus nilingi e hem, e von xeihen navan kestang iaxa nakenin ni minuk. 41 Taxeak, namaen xeihen navan minuk tengan mei uhe 'Vat te Kavmen' tahal Isip.” 42 Di, suv toto nggur rat ring te xeihen nan e milingi e vakuhe Siosep. Bus di, mising xol Siosep ni eising tei xa bos e misoxolen sen tei xa be gol de pe hiraen. 43 Di, misa kat te lohen tei mini. Kat ak be na ngan xa be he metu na suv toto. E melele xa miloh en, moletin xil lakei nggeih labit,” !Mutingeiril! !Vat te Kavmen iaxa di bemei iaxai! !Mutingeiril mini!” Nggo sexien ak, Siosep mei be Vat te Kavmen tahal Isip.

47 E huram lu e he sav (7) te hosien, anien holu xa holu pupu. 48 E ut xil vus, Siosep mileh viton bak uit xil ra naho xil e milehi ba be taon xil xa di sangas, e miserep kuhi di e nim xil xa latellep xa di en. 49 Nggo rin ak, Siosep miserep kuh bak uit xil ak mei be holu xa be holu pupu ba vuma ... lasakras lavuli mun vengan langgoni suvien xil te tas.

50 Melele xa mae kekaten ak tenamei ti mu, Siosep tehur atou tei, hisen Asenat, xa be nat pris tei tahal Hon xa hisen Potefara. Xi teleh horamue lu na Siosep. 51 Muimol nan, teling hisen tehe 'Manase' xa koute teni be 'ieok bovong' vengan bit, “Hi misak ni nou ieok bovong ni longpangasien navan e ngan xil e tim sa tata navan.” 52 E ngan xa tetutou, xi teling hisen tehe 'Efrem' xa koute teni be 'misa horamue' vengan xa bit, “Hi misa horamue xil minou e ut te longpangasien navan.”

53 Melele xa huram lu e he sav (7) te hosien e hal Isip mei mitavi ba, 54 huram xil te mae kekaten bemei nggoni ngan xa Siosep tehiteni. Mae kekaten ak ba duxoh kantri sav xil mun e ut netan, e Isip kestang, anien di en. 55 Melele xa mae nggat mol-Isip xil, xil mei ladak kes suv toto ve anien. Misak ni, misil xil ba lapus Siosep e bit, “Muhe visal Siosep e mupol ni naha xa xi ihiteni mi xamim.” 56 Melele xa mae kekaten mei misa pilei sung, Siosep mae ni moletin nan xil lasah puiteh te nim xil xa latellep xa uit di en e taon xil ngasen. Ma mol-Isip xil lamei di langgale. 57 Moletin xil langgo kantri sav xil mun e ut etan e lamei visal Siosep e hal Isip tengan laxal uit rani vengan xa anien tovuol e ut xil vus.

Copyright information for `TVK