Jeremiah 20

“E melengien xil xa ti imei, elu namim xil mei limeru xat taon namim tahal Serusalem. E lileh vuol ni holesok xil namim ihe nae. Reitin, lileh mani, holesok xil vus namim e neta hos xil mun xa suv toto xil tahal Sudah lateling pilei ni. Ti, lilehi litilomun lihe kantri nae tahal Babilon.”

Seremaea Mibilhilesut ba mi Iahova ve Polien xa Misa ni Mini

Seremaea 20:7-13

Di, provet Seremaea misis mi Hi bitene,

“O Iahova, xouk otluvos nou
e inou natke reitin en.
Del xeihen nam, ote xeih xat nou
e oteli nou.
!Ve sepinien nam, moletin xil vus di lapol pepamen minou!
!!Di lamen xat nou vehakut!!
E melele xil vus xa namangang tengan nasepin,
di opol ni nou nakei xat moletin xil e di nameun xat xil nabit,
'!Vaeen xil ti imei e lihu len holesok namim xil!'
O Iahova, moletin xil di langue xat nou e di lasep sisil nou
vengan xa di nabit rat sepinien nam.
E xosxa nabiteni e nenemien navan nabit,
'Ninavit usil Hi ti, e ninasep mesen ti mun sepinien nan e Hisen,'
ma sepinien nam mei nggoni upang
xa di ngga pangas tinok.
Nasak tengan naki xol sepinien nam,
e nasakrasi vari tang.
10 Di nalonge xa moletin xil di lasep piao ba xat nou labit,
'Moletin ak, ulin di mikan e rin xil vus.
!Ratiha ratihit rat xi mi vat nar xil!'
Tua hos navan xil vus di iexil bei tengan nimot e sepinien navan
e di lasotil nou tengan lasep luvos nou.
Di labit, 'Xosxa rakila risep luvosi,
ma ti, rihut xati e rihasi tengan risa rilomun ni mini pangasien xa sepinien nan di pol ni bat xat xir.'
11 E xouk, Iahova, di osikoe xol nou nggoni moletin te vaeen tei xa ven nggeih.
Misak ni ngan xil xa di lasak tengan lapurun nou, lamot.
Ti lisak pisi tengan lavas nou, e lasakras.
Xil lihe unoun pupu
vengan xa lasakras lapol ni ti neta.
Unounen nae, moletin sav xil lasakras iexil vabong ni va tova.
12 O Iahova te Xeihen, xouk di olepis ngan xil xa meulien nae momal tevi,
e ule kil naha xa di tine xil e nenemien nae.
Mak, ma nabit nipus ti xouk usa xoles longpangasien iha xat elu navan xil,
vengan xa di naling rin xa navan de hem.

13 “!Ve rin ak, mukikei mi Iahova!
!Reitin, mupet rat Hisen!
Vengan xa xi di miteh meulien e ngan xil xa mosav xil dit lapurun xil,
di mileh rerat xil ra he ngan xil xa lasa.”
Copyright information for `TVK