Jeremiah 23

Iahova Bit Xati xa Iling Rilomun ni Moletin Nan Xil Liti e Vonine

Seremaea 23:1-6; 29:10-12; 31:3, 31-34; 33:14-16

Iahova misepin nggo provet Seremaea bit, “!Isa pupu mi vat xil na mol-Isrel xil xa di lasak purun moletin nan xil! Langgoni moletin xil te sipsip xa lasa xa latalaxat kuh sipsip sae xil ti e lamaen xil latetasil.”

Ve rin ak, ngan ak be sepinien na Iahova, Hi na mol-Isrel xil, ba ni vat xil xa xi miling xat xil tengan lalaxat kuh moletin nan xil: “!Xamim mutalaxat kuh moletin navan xil ti! Munggol rerat xil sung laletasil. Ma taxeak, nisa longpangasien mi xamim ve holesok tesa xil xa mutepol ni. Ti, inou nileh viton vanut moletin navan xil xa ladi tamu ra kantri sav xil xa natemaen xil latetasil ba ladi en taxeak. Ti, nileh xil litilomun ha liti e vonine. E rute ak, lipes horamue xil e mei lihe holu rilomun. E melele nen ak, inou nihosei vat xil mei lilaxat kuh xil. Lixoni moletin te sipsip xil xa lalaxat kuh sipsip sae xil e lisak ni xil ulixil nakan ti mun e linanexo ti. Ti xil mun vari nakesae.”

Iahova biteni mun bit, “Melengien tei di bemei xa inou nihosei suv toto tei xa sexien nan imal tevi ixo vatimol xil na Deved. Xi ilaxat kuh moletin xil e ilepis rin nae itel metisouen. Xi isa longpangasien mi ngan xil xa lasa, e mi ngan xil xa lamal, xi isa hosien mi xil. Melele xa ihe suv toto, mol-Sudah xil liti e hosien, e mol-Isrel xil liti e tomat. Xil likesi ni 'Iahova xa Milepis Rin Nar del Momalen'.”

Copyright information for `TVK