Job 38

Di, Iahova misepin mi Siob nggo votiang xa nggeih bit,

“?Xouk obe visi iaxa di osak pis nenemien navan xil
del sepinien nam xil xa be neta sav tang xa metisouen tovuol en?
!Mea soh, xosxa obit obe tiramue!
Usa rilomun ni sepinien xil xa nisisuk ni.
?Oteta xave melele xa natepeas ni ut etan?
Xosxa okil kuh holesok xil vus, usep usili minou.
?Visi iaxa teling kusute xalu e vonealu xati?
?Visi iaxa mikila xa ut etan teviei midep?
?Xouk okila?
?Vatit ut etan ak be naha vari?
?Visi iaxa teling xat vatihat te ut etan?
E melele nen ak, hitu xil te makoe latekikei vituei,
e masxaxa xil vus te ut nesao latemeun tetel sien.

?Visi iaxa tepol ni vioh xa misikoe xol haxot te tas,
melele xa teleh rohon texo pe huitan temei.
Inou iaxa natekutexol tas ni momah xil
e natesak ni maluxoluken da xole.
10 Inou iaxa nateling haxot te tas
tengan misakras vamea e vapangei tan.
11 Inou iaxa natehiteni natehit, '!Xouk utuxoh ut e onali ti mun onava!
Tehe nam xil ti limavul xat rute ak kestang.'

12 ?Siob, obe visi vari?
?Xouk otesemaen ni tuei vatova tengan ut valan mei vahe melengien hu tei mun?
13 ?Xouk otehiteni tuei vatova mi eai tengan ian e ut xil vus e ut etan,
e isin rerat ngan xil xa lasa ra von xuxusen nae?

19 ?Xouk okil rute xa miehen nggo en,
mu rute xa maluxoluken ba minggus en?
20 ?Xouk okila opisen suse xati nalu mi xalu?
?Mu osil xalu lalotilomun lalohe vonealu?
21 ?Okila opol ni? !E-e, osakras!
Vengan latnapesuk ti mu e huram nam xil tapin ti.

34 ?Okila okei vaha ni momah xil te ut nesao
e osak ni us vamus vakasuk?
35 ?Okila opol ni an valangas
e vatatiluk tengan osepmaen ni xa iha xave?
36 ?Visi iaxa misa metisouen mi moletin,
mu misak ni nenemien nan mikilakil?
37 ?Visi iaxa nenemien nan pipin tengan vavuli momah xil?
?Visi iaxa mikila vateh rat us vamus
38 e melele xa vul meas mituvan e ut xil vus,
e eai ngga xat tan nggeih?”
Copyright information for `TVK