Job 40

Di, Iahova misep rilomun mi Siob bit,

“Siob, xouk obit Hi te Xeihen iaxa pol tamal ti.
!Xouk xa otesepin teha xat nou, uhit rilomun ni sepinien navan xil!

Ma Siob bit rilomun ni mi Iahova bit,

“O Iahova, inou nasep talang pupu li. ?Nihit naha vari?
Inou ninavit ti mun neta.
Inou nabit neta xil hao ngamu xa tave ti tengan namiteni.”

Iahova bemei mun misepin mi Siob nggo votiang tei xa nggeih bit,

“!Mea soh xosxa obit obe tiramue!
Hit rilomun ni sepinien xil xa nasisuk ni.
?Xouk di osak pisi tengan opisen ni xa inou natepol ni neta tova xa misa?
?Xouk di obiteni xa inou iaxa natnapol ti vamal minuk, tengan upisen pisi xa xouk omal?
?Xouk onggur xeihen tomak nggoni nou?
?Raem nggoni raeok xa mikila varum vaxoni veta?
10 Xosxa okila, ma umea usoh itel merereen e koaien nam.
Using xolok ni eising na eilep xil itel miehen nam.
11 Melele xa di opus ngan xil xa di labut xil, upol ni ekaten nam iha xat xil,
e usak ni nenemien nae xil ihe etan.
12 Reitin, upus xil e usak ni xil lihe tan.
Upel xat ngan xil xa di lapol misa e rute xa di lasoh en.
13 Utihin xil vus ni tan.
Uvar viton xil e von maten.
14 Xosxa okila opol vuol ni holesok xil ak, ma inou mun nipet rat hisom,
e nihiteni xa xouk vari ukila uteh meulien e xouk mun tang.”
Copyright information for `TVK