Job 42

Di, Siob bit rilomun ni mi Iahova bit,

“Iahova, nakila xa xouk onggeih xa onggeih.
Xouk okila opol vuol ni holesok xil vus xa iem bei.
Otesis nou otehit inou nabe visi iaxa di nasak pis nenemien nam xil
del sepinien navan xil xa be neta sav tang xa metisouen tovuol en.
E inou natesepin usil holesok xil hao xa natakil ti,
e usil neta xil xa latellep pupu xa mili nenemien navan.
Otehiteni minou tengan niteong ni xouk melele xa otesepin,
e nisak pisi nisa rilomun ni sepinien nam xil.
Tetiamu, natekilak texo naha xa mosav xil latehiteni minou,
e taxeak, napus kilak sung ni metok xati.
Ma inou nabe unoun ve holesok xil xa natehiteni.
Nileh rilomun ni sepinien navan,

e ha nixul ni vul meas tengan ipisen ni xa nalonge misa pupu ve naha xa natepol ni minuk.”

Hi Misa Tuxolxatien mi Siob Mili Ngan Tetiamu

Siob 42:7-17

Melele xa Iahova misepin mi Siob bus, xi biteni mi Elivas tahal Teman bit, “Ieok nggatuk del timue nam xalu, vengan mutasepin ni reitinen ti usil nou vaxoni ngan xa Siob, moletin hos te polien navan, tesepin ni. Ma taxeak, mutileh buluk ihe lu e he sav (7) e sipsip mun ihe lu e he sav (7) e mutihe visal Siob. Ha mutitin xil lihe sanien eo namitel imei ni minou. Ti, Siob, moletin te polien navan, isis ve xamitel e inou niteong ni sisen nan. Imak, ma ninapurun xamitel ti naxoni ngan xa momal tengan mutihuri ve sepinien te talangen xil namitel. Vengan mutnasepin ti vahe reitin usil nou vaxoni ngan xa Siob tesepin ni.”

Ma Elivas, Bildat, del Sofar latopol ni naha xa Iahova tehiteni mi xatel, e Iahova milong sisen na Siob.

10 Melele xa Siob misis ve timue nan xatel bus, Iahova duxol xat Siob rilomun. Xi misa holesok xil xa tekesae relingi be valu mili ngan nan xil xa telehi tetiamu. 11 Di, tuneli e tunahin xil vus lamei visali del timue sav nan xil tengan mei lasao ni. Xil lapol ni anien tei xa eilep ven e tim san. E lapisen esaeen nae mini e ladutou ni ve longpangasien xa Iahova tesakini tengan vahuri. Xil kekes lasa mani e ring tei xa be gol mini.

12 Iahova duxol xat melengien kor xil na Siob mili ngan xa tetuxol xati tetiamu. Siob, sipsip san xil laduxoh taosen hat e le tei (14,000), kamel san xil laduxoh taosen tei e he sav (6,000), buluk san xil laduxoh taosen lu (2,000), e dongki san xil laduxoh taosen tei (1,000). 13 Horamue nan xil labe lu e he sav (7) e atuli nan xil labe tol (3). 14 Atuli nan xa be muimol, hisen Semaemah. E ngan xa dutou ni, hisen Kesiah. E ngan xa be tasite, hisen Keren-Hapuk. 15 E ut xil vus e ut etan, latnapus ti atou sav tova xa valnaon vahos vaxoni atuli na Siob xatel. E tameatel misa tan e vongoro xil mi xatel nggoni ngan taxa misa ni mi tua natel xil.

16 Dutou ni holesok xil ak, Siob temeul nousav, e huram nan tetuxoh handred tei e hanutap lu mun (140) tetel xat ngan xa tehuri tetiamu. Xi temeul tehe nousav e tepus havneli e havnahin xil tetel horamue nae xil mun. 17 Siob mei tehe momatu kuhi, di, xi mat sung.

Copyright information for `TVK