Jonah 3

Siona Milong Xat Iahova e Ba Be Nineva

Siona 3:1-10

Iahova misepin vatei mun mi Siona bit, “Uhe taon xa muhulong tahal Nineva, e uhit mesen sepinien xa nisa ni minuk mi xil.”

Ma Siona milong xat Iahova e ba be Nineva. Taon tahal Nineva be mahulong pupu. Xosxa moletin de rin tei e minemi bit vahe rin sav, xi ikakao melengien ihe tol vari. Ma Siona ba be taon ak e mikakao en melengien tei. Di, melele xa de hilaep xati te taon ak, xi mikei ba ni moletin xil bitene, “Melengien be hanutap lu (40) sutang di tengan Hi ihu len vari ni taon ak tahal Nineva.”

Melele xa moletin xil tahal Nineva lalonge mak, laneket e sepinien na Iahova. Ma labithiteni tengan moletin xil vus, ngan xil xa latellep ha ituxoh ngan xil xa latereli, lihal ni anien e lising ni talmusu xil tengan lipisen ni xa lalonge misa ve tesaen xil nae.

Melele xa suv toto tahal Nineva milongeong ni usil naha xa Siona di tehithiteni, milonge misa pupu. Ma mitamea ra hor nan e mileh rat eising hos xil nan. Di, mising ni talmusu xil tang e ba midotan de husupang xil. Di, misemae ni tengan latis mesen rae nan ak iha mi mol-Nineva xil vus tengan ti lihusili xa bit:

  • Ngan ak be rae na suv toto del eilep nan xil. Moletin xil vus itel vongoro sae xil mun linakar pis ti anien e linamu ti oei.
Moletin xil vus itel vongoro sae xil mun lising ni talmusu xil e ti litak kes Hi ve esaeen nan. Xil lihiles ra tutuen nae xil e sexien tesa nae xil mun. Melele xa ripol ni imak, ma xos Hi nasa ti mun pangasien namei xat xir. Xos xi ikila ihiles nenemien nan e nahu vin xir ti natel ekaten nan xa nggeih pupu.”

10 Melele xa Hi miketeh pus naha xa latepol ni, e pusi xa latehiles ra sexien tesa xil nae, xi biles nenemien nan e tasa pangasien ti mun mi xil vaxoni ngan xa tehiteni.

Copyright information for `TVK