Joshua 5

Longeongen usil rin xa Iahova tepol ni Oeisal Sodan temes tetuxoh melele xa mol-Isrel xil vus latehur xotehi mikapis e ut xil vus. Miloh ba duxoh suv toto xil tahal Amor xa de rin xa be wes te Oeisal Sodan, e ba mun duxoh suv toto xil tahal Kenan xa de sangas visal Tas Medeterenia. Melele xa lalongeong ni, xil vus, hixil mat e ulixil mikan tova tang.

Mol-Isrel Xil Vus xa Labe Malahos Labe Vexahu

Sosua 5:2-12

Di, Iahova biteni mi Sosua bitene, “Upol ni tiei tova ni hat xa mikan e upol ni vexahu ni malahos xil vus xa latave vexahu ti mu.” Ma Sosua pol ni holesok xil vus xa Iahova misemae ni mini. Xi pol ni mol-Isrel xil vus xa labe malahos labe vexahu e rute tei xa, xosali, lakesi ni Hu te Vexahu. Tetiamu, e melele xa mol-Isrel xil latehe reling Isip, malahos xil vus latehe vexahu ngamu. E vengan xa latalong xat Iahova ti, tiramue xil vus xa latepin ni vaeen e melele nen ak, xil latelel e kakaoen nae e uruvuol. Nggoni ngan xa Iahova tehiteni, xi tenamaen xil ti tengan lipus tan xa tehit xati mi avu nae xil tetiamu, tan tei xa bos e polu ni hosien. Tesak ni, mol-Isrel xil latekakao e uruvuol huram tehe hanutap lu (40). E horamue xil xa latepes rohon ni xil latnave vexahu ti. Ma horamue nae xil ak xa Iahova tepol ni xil latexoles tamexil, Sosua pol ni xil labe vexahu vengan xa latnave vexahu ti e suse.

Melele xa lapol ni vexahu ak bus, mol-Isrel xil vus ladit pe horao mae xil duxoh melele xa menuk nae xil mah. Iahova biteni mi Sosua bit, “Xosali, nanggur rat unounen te hal Isip ra xamim, ut xa mutehe slev xil en.” Ma xil lakes rute ak ni 'Kilkal' xa koute teni be 'nggur rati', e his ak da tak duxoh xosali.

10 Melele xa mol-Isrel xil ladi tamu e Kilkal, e motan xa mahulong sangas visal taon tahal Seriko, xil lapol ni anien tei xa eilep ve Anien te Tavien. Xil lapol ni e mahis e melengien hat e le tei (14) e aveti Aviv. 11 Melele xa ut milan, xil ba langga kokot ni anien te ut Kenan. Ladin utut uit e langga beret xa is tovuol en. 12 E melengien nen ak, manna takiri ti mun, e moletin xil lataxa ni ti mun. Xil langga kes ni anien xil xa meul di e tan tahal Kenan.

Copyright information for `TVK