Luke 10

Iesu Misil Rerat Vanut Moletin Tengan Lava Lapol

Luk 10:1-12

Dutou ni ngan nen ak, Iesu bosei moletin xil xa latehe hanutap tol e lu e le mun (72). Di, misil rerat xil labe lu lu tengan lave metimal xil vus e rute sav xil mun. Iesu bit xil litiamu ni, e navehi, xi mun ha imos e xil. Iesu biteni mi xil bitene, “Anien holu di e naho, e moletin xil xa lava ti laleh rerati latave holu ti. Mak, ma musis Suv te naho tengan xa vasa ti mun moletin xil xa liha ti lipol e naho san. !Muha itel merouen tang! Moletin holu ti lisep pangas xamim ve sepinien namim. Reitin mak, xosali, nasil rerat xamim muva xiak, munggoni sulut sipsip xil xa laba ladi hilaep te kuli reran xil. Muha ihe hem ihon tang. Munaleh ti vatu, mu ateli, mu sandel timun natel xat xamim. Munahas ti melengien natel moletin xil e suse namim. E melele xa ba mube nim ngan, neta xa muhiteni itiamu, muhitene, 'Tomat na Hi iti mi xamim e nim ak.' Xosxa ngan xa de nim be moletin te tomat, ma muling sepinien te tomat ixulehi itel xati. E xosxa tovuol, ma tuxolxatien te tomat ihe relingi, e itilomun imei e xamim. Muti kat tang e nim ma moletin xil xa langgur revi xamim, e anien mu oei eah xa lasa ni mi xamim, muhuri, vengan xa moletin te polien ikila ihur huite xil te polien nan. Munalil ti e nim xil. E melele xa mube taon tei e moletin xil te rute ak langgur pilei xamim, mua anien taxa lasa ni mi xamim. Mupol ni ngan xil xa lamesei ladi e rute ak, lilonge ihos rilomun. E muhiteni mi xil muhitene, 'Hi dat sangas visal xamim e bit vahe suv toto te meulien namim.'

10 “E xosxa mube taon tei e moletin xil te rute ak latahur pilei xamim ti, muha musoh e valkesao e muhiteni, 11 '!Vengan xa mutahur pilei xamel ti, iemel ti tavei meas te vonemi mun xa di xat kaelemel, malevas rati iha xat xamim xa neta xa mupol ni mi xamel, imei rilomun, ia xamim. E mutakil ti vari xa xosali ak, Hi temei sangas ni xamim e tehit imei ihe suv toto e meulien namim, e di musin ni.' 12 Nabiteni mi xamim, melele xa Melengien Kor imei, pangasien xa imei e moletin xil te rute ak ixeih pupu, ili pangasien xa Hi isa ni mi moletin xil xa lateti e hal Sodom te tiamu.

Selxatien Ba mi Xil xa Lasin Moletin Xil na Iesu

Luk 10:13-16

13 “?Munem xat rute tol xa moletin xil latake reitin en sepinien nam ti? Naso sepinien ak ba xat xil: Isa tova tang mi xamim, moletin xil tahal Xorasin! Isa mun ve xamim tahal Betsaeta! Xosxa moletin xil tahal Taer mu Saedon, xa latave Siu ti, lava lapus hisit merekel vaxoni ngan xa mistal mi xamim, ma nanemi nabit xil laviles meulien nae ra tesaen. E xos vahit xil lipisen ni xa lalonge vasa vamak: lasing ni talmusu xil, e laxul ni vulmeas. 14 E Melengien Kor, Hi en isae e moletin xil tahal Taer e Saedon ili xamim. 15 ?E xamim, moletin xil tahal Kapaniam munemi mubit muhe ut nesao? !E-e, muhe tan, e von upang!”

16 Di, Iesu biteni mi moletin nan xil bitene, “Moletin xa di miteong ni xamim, ma di miteong ni nou. E tei xa di misin xamim, ma moletin ak di misin nou. E moletin xa di misin nou, xi di misin ngan xa misa nou namei.” Di, xil latasil laba.

Moletin Xil xa Iesu Tesil Rerat Xil Ladilomun

Luk 10:17-20

17 Melele xa moletin xil na Iesu xa labe hanutap tol e lu e le mun (72) ladilomun, xil lamaal pupu. Labiteni mi Iesu labitene, “!Suv, melele xa masemae mi ninin tesa xil e hisom, mapusi xa xil di lalong xati!”

18 Iesu bit rilomun ni mi xil bitene, “Polien namim misak ni xeihen na Temat mot vari nggoni an xa milangas nggo nesao bemei e tan. 19 !Muteong! Nisa xeihen mi xamim tengan muhe xat uineh , tetal xil xa misa, e holesok xil mun xa ladi e xeihen na Temat, e neta ti naxul xamim. 20 E munamaal ti vengan xa ninin tesa xil lalong xat xamim. Bos mak mu xa ti mumaal vengan xa Hi midis xat hisemi tuei di Vanuvei te Meulien e ut nesao.”

Iesu Memes Hi ve Polien na Moletin Nan Xil

Luk 10:21-24

21 Iesu di mei polu ni Ninin Eo, misak ni memaal himetu, ma misis bitene, “Tata, xouk obe Suv te holesok xil ngasen e ut nesao e ut etan. Namesuk himetu vengan xa naha xa xouk di ososo ni ra moletin xil xa labe metisou, di opisen ni mi movotei xil xa latasukul kuhi ti. Io Tata, ngan ak di nggusil naha xa xouk di iem bei vastal.”

22 Di, Iesu biteni mi vanut moletin xil bitene, “Tata navan miling holesok xil vus di tuei e heok. Moletin xil latapus kil ti Nat Hi, Tamen kestang pus kila. E moletin xil latakil ti Tamen, Natnali kestang mikila, del ngan xil xa xi ien bei vapisen ni mi xil.”

23 Di, Iesu biles, pus moletin nan xil e misepin ba ni xil tase bitene, “Sien iti mi xamim vus xa di mupus xat holesok xil xa di mistal xiak ni metemim. 24 Nabiteni mak mi xamim, provet xil holu te tiamu e suv toto xil holu mun iexil tehei xa ti lapus ti holesok xil xa xamim di mupusi, e latnapus ti. E iexil tehei xa lalong ti sepinien xil xa xamim di muteong ni, e latnalong ti.”

Iesu Dei Vole Tei Usil Moletin Hos Tei Tahal Sameria

Luk 10:25-37

25 Vatei, tisa tei te Rae xil na Mosis bemei tengan vasak pis Iesu. Ma misisi bitene, “?Tisa, nipol ni itep ma nihur meulien sal?”

26 Iesu bit rilomun ni mini bitene, “?Rae xil na Mosis di biteni naha? ?Uhiteni minou?”

27 Moletin ak bitene, “'Iem ihei Hi xa be Suv nam ixo tinom tevi, ixo meulien tevi nam, ixo xeihen tevi nam, e ixo nenemien tevi nam.' E 'iem ihei tua nam ixoni ngan xa iem bei xouk tasom.'

28 Iesu bit rilomun ni bit, “Sepinien nam momal. Xosxa upol ni mak, ma uhur meulien sal.”

29 E moletin ak bit vapisen ni xa xi momal tang, ma misisi mun bitene, “?E moletin si vari iaxa be tua navan?”

30 Ma Iesu dei vole tei mini bitene, “Vatei, mol Siu tei mea nggo Serusalem mikakao bit vahe Seriko. Melele xa di nggusil suse ba, moletin tatei xil te kanen lamei ladal xati. Langgur rat eising nan e labasi, di, lalesae. Xil lalingi pat da nga, sangas vamat. 31 E melele nen tak, bos xa pris tei xa be Siu tei xa di nggusil suse bemei sangas visali. E melele xa mei pus moletin ak pat da, xi mitavi tang nggo ri suse. 32 Di, ngan Siu tei mun xa pol e Nim Eo na Hi nggusil suse bemei sangas visali. Xi mun mikakao e ba miketeh pus moletin ak xa pat da. E xi mun mitavi tang nggo ri suse ba. 33 Di, ngan Sameria tei, xa Siu xil di laketeh misa mi xil, bemei sangas visal rute xa moletin ak pat da en. E melele xa miketeh pusi, en misae pupu li en. 34 Misak ni xi bemei visali, e mikas moten menuk nan xil ni uaen, bas oel en, e pis xol xil. Di, po rati, milingi e dongki san, e poe ba di milaxati e nim te ngelen tei. 35 E makoe nen, misa taosen lu (2000) vatu mi moletin te nim ak. Di, biteni mini bitene, ‘Ulaxat kuh moletin xa xiak. E xosxa mani ak tapin ti, ma nisa rute mun e melele xa nitilomun nimei.’”

36 Di, Iesu misis tisa te Rae xil na Mosis bitene, “?Onemi obit naha? ?Visi e moletin xatel ak iaxa pisen sexien hos na tua tei na moletin xa moletin te kanen xil latehasi?”

37 E xi bit rilomun ni mi Iesu bitene, “Moletin xa pisen esaeen nan mini.”

Ma Iesu bit rilomun ni bit, “Bos, ma xouk mun uha upol ni imak tang.”

Iesu Be Nim Ma Merta xal Meri

Luk 10:38-42

38 Melele xa Iesu del moletin nan xil di lakakao tengan lave Serusalem, xil lamei e metimal tahal Betani. E metimal ak, atou tei da en, hisen Merta. Xi minggur pilei xil lamei e nim man. 39 Tunahin, hisen Meri, bemei visal Iesu e dotan sangas visal len. Xi di miteong kuhi ni pispisien nan. 40 E Merta misakras vateong kuhi vengan xa xi di misak mese ni anien ae. E vengan xa xi pol pupu, ma mei biteni mi Iesu bitene, “?Suv, midep? ?Onemi bos tang xa tuxahin miling polien xil ak di e bit inou tasok ti nipol ni? !Hiteni mini vamea vatutou ni nou!”

41 E Suv biteni mini bitene, “Merta, onexo pupu ve holesok xil holu. 42 E neta tei takes momal iaxa xamil mulikila mulipol ni. Meri pol ni neta xa momal ngamu, ma inou, ninahur rati ti rani.”

Copyright information for `TVK