Luke 13

Muhiles ra Tesaen Namim, Maxani Mulel

Luk 13:1-5

E melele nen ak, rut moletin xil lamei latumul mi Iesu usil ngan Kaleli xil xa di latehas vongoro sae xil e Nim Eo xa tehe sanien nae mi Hi. E melele xa di tamu latepol ni, moletin te vaeen xil na Suv Paelet mei latehas xil e re xil teha xat sanien nae xil. Ma Iesu biteni mi xil bitene, “?Midep? ?Munemi mubit ngan Kaleli xil, suse xa latelel xiak di pisen ni xa tesaen nae tehe tellep mu teli na moletin sav xil tahal Kaleli? !Tave reitin ti! Nabiteni mi xamim, xosxa munaviles meulien namim ti ra tesaen namim, ma xamim mun mumak tang. Munem pis moletin tol e le sav (18) xa latelel sangas ni rute tei xa lakesi ni 'Saelom'. ?Midep? ?Munemi mubit nim te keteh en xa tehe teviei tehe nesao temot mei tetaxat xil vengan xa tesaen nae xil tehe tellep mu teli tesaen na moletin sav xil tahal Serusalem? !Tave reitin ti! Nabiteni mi xamim, xosxa munaviles meulien namim ti ra tesaen namim, ma xamim mun mulel.”

Iesu Dei Vole Usil Vatit Fik xa Huite Tovuol

Luk 13:6-9

Di, Iesu dei vole tei mi moletin xil ak bitene, “Moletin tei milih vatit fik tei de urvatiei te grep san, e vehakut xi ba di misao ni, e tapus ti huite. Ma biteni mi moletin xa di milaxat urvatiei san bitene, 'Huram tol tuei iaxa namei nabit napus ti huit fik ak, e natakamet ti vari. !Terati! Di misukoh xol ut votei tang.'

“E moletin nan xa pol e urvatiei ak bit rilomun ni mini bitene, ‘Suv, lingi vata munamun mu vahe huram tova tang. Nikil ikapis xole, ti niso tisok ihe pe vatte tengan imeul ihos. Xosxa iva e huram xor, ma bos; e xosxa nava ti ma nitei rati sung.’”

Iesu Pol ni Atou Tei xa Marin Mikavui Mei Bos Mun e Sabat

Luk 13:10-17

10 Vatei, e Sabat, Iesu di pispisi mi moletin xil e nim te pispisien tei. 11 E pus atou tei bemei xa ninin tesa tepurun marin huram tehe tol e le sav (18). Misak ni xi misakras vasoh vamal. 12 Melele xa Iesu miketeh pusi, mikei ba ni bitene, “Nana, meseien nam be relinguk ngamu.” 13 Iesu miling hen en, ma varinga tang, atou ak misoh mal e di memes Hi ven.

14 Ngan ak misak ni eilep te nim te pispisien ien mikat vengan xa Iesu pol ni mar atou ak bos e Sabat. Ma misel ba ni vanut moletin ak bitene, “Melengien tei e he sav (6) iaxa moletin ikila ipol en. Mumei mumeluv ra meseien namim e melengien xil ak, e nave Sabat ti.”

15 E Iesu bit rilomun ni mini bitene, “!Ei, xamim mube vat luvosen tova tang! Xamim di mulal rat buluk samim xil e muleh xil be langganien e Sabat nggoni melengien sav xil mun tang. 16 E midep mi atou ak xa be atuli tei na Ebraham? Temat bar xati huram be tol e le sav (18) xiak. ?Munemi mubit rasakras ralal rati ra meseien nan e Sabat?” 17 Sepinien na Iesu misak ni moletin xil xa laketeh misa ni labe unoun. E moletin sav xil lamaal tova tang ve polien hos xa Iesu pol ni.

Iesu Dei Vole Lu Usil Suse xa Hi Mei Ihe Suv Toto na Moletin Xil

Luk 13:18-21

18 Di, Iesu biteni mi xil bitene, “?Hi imei ihe suv toto na moletin xil itep? ?Nisepin ni imese mi xamim itep? 19 Nggoni utut vaak xa hokorong, mot mei de vatiei tei. Utut vaak ak miteh, meul mei be vatiei xa eilep, ma tuman xil, mei langel e halite xil.”

20 Rilomun, xi biteni mi xil bitene, “?Hi imei ihe suv toto na moletin xil itep? 21 Nggoni is xa atou tei miso ni vuteili tang ba del pulaoa xa mahulong. Xi bilesi vuma ... is ak pol ni pulaoa xil ak lakaeo, labe mahulong mu.”

Iesu Dei Vole Usil Puiteh xa Hokorong xa Be Ut Nesao

Luk 13:22-30

22 Melele xa Iesu di pol ni suse nan tengan vahe Serusalem, xi nggo metimal xil e di pispisi mi moletin xil. 23 E vatei, moletin tei misisi bitene, “?Suv, moletin holu iaxa lihur meulien hu e ut nesao, mu rute tang?”

24 E Iesu bit rilomun ni mi xil bitene, “Ti musak pisi vehakut ti muxo puiteh xa hokorong e ut nesao vengan xa moletin holu di lasak pisi e rute xil tang likila lixo en. 25 Xosxa melengien imei xa suv te nim ak imea mei ikoe xol puiteh, ma xamim mumei musoh mutit hale. E ti muti puiteh e mukei iha ni suv ak muhitene, 'Suv, sah puiteh, mavat nim.'

“E xi ihiteni mi xamim ihitene, ‘Inou natakil ti xamim e natakil ti xa xamim tahal ut xave!'

26 “Ma xamim muhiteni mini muhitene, ‘Xamem di mateanien e di matemun tetel xouk e di otepispisi e metimal namem.’

27 “E xi ihiteni mi xamim ihitene, ‘Inou natakil ti vari xa xamim tahal ut xave. Xamim vus musa. !Muha!’ 28 E melele xa xiak, xamim mupus Ebraham, Aesak e Siakop itel provet te tiamu xil liti nim na Hi e ut nesao. !E Hi isin xamim e mutit hale! Isak ni, xamim mutang vengan mulong pangas xamim e metemim ipili vengan iemim ikat. 29 Moletin xil lixo hal sav xil e ut ngasen e ut etan limei vengan xa Hi ihe suv toto nae. Limei nim e litotan e von anien itela. 30 Ngan ak be reitin, ngan xil xa ladutou taxeak, mei litiamu. E ngan xil sung xa ladiamu, mei litutou.”

Iesu Ien Sae Holu Ve Hal Serusalem

Luk 13:31-35

31 E melele nen ak, rut Parasi xil lamei labiteni mi Iesu labitene, “!Bos xa umea reling rute ak uha, vengan xa Suv Toto Herot bit vahasuk omat!”

32 Iesu bit rilomun ni mi xil bitene, “Muha rilomun e muhiteni mi kuli reran ak imak: xosali e visuvong, ti nixol rerat ninin tesa xil e nisak ni moletin xil xa lamesei lilonge ihos mun. E melengien tol nen, nipol sen naha xa natemei ven. 33 Io, xosali, visuvong, e hoeis, nihusil suse navan nihe Serusalem vengan xa e rute ak, mol Isrel xil di labas vin provet holu nae xil.

34 “!O moletin xil tahal Serusalem! Xamim xa di mubas vin provet xil e di munggo vin eloheoh xil xa Hi di misa xil mi xamim. Melengien hau, ieok tehei pupu tengan naleh viton xamim mumei visal nou vaxoni toatou xa di mileh viton tuten xil lamei pe aveoun. E xamim iemim tavei. 35 Ma Hi iling xamim muti imak, naxur xol xamim ti mun. Ma musakras mupus nou ha vuma ... muhiteni muhitene,

‘Hi Suv, utuxol xat xi xa bemei e hisom.’
Copyright information for `TVK