Luke 16

Iesu Dei Vole Usil Vat Tei xa Pol ni Vatin

Luk 16:1-14

E melele xa Iesu di ngganien del Parasi xil, xi biles e dei vole tei mun mi moletin nan xil bitene, “Vatei, eilep tei xa holesok nan holu nggur moletin tei nan te polien e milingi be vat te holesok nan xil. Xi pol ba vuma ... eilep ak nggur longeongen xa bit vat nan ak di talaxat kuh holesok nan xil ti. Ma mikes vat ak mei biteni mini bitene, ‘?Naha iaxa di nalonge usiluk? Uha utis usil polien xil navan xa di otepol ni, vengan xa navehi ti, niso nuk ra polien ak.’

“Ma vat ak misep tasen bitene, ‘Suv navan vaso nou e polien navan xiak. ?Imak, ma itep xiak? Veok te xeih ti vapin tengan natalen tan, e nabe unoun pupu tengan nasis moletin sav ni vatu. !Aha! Nakila naha xa nipol ni. Ngan ak ipol ni melele xa nivus ra polien ak, tua navan xil liti, e lihur pilei nou nihe tim sae.'

“Ma vat mikes kekes ni moletin xil xa laleh hon ni holesok xil e lataxale ti. Xi misis ngan diamu bitene, ‘?Xouk onggur naha ra eilep navan?’

“E moletin ak bit rilomun ni mini bitene, ‘Naleh tutut teram te oel xa lapol ni nggo huit olip be handred tei (100).’

“Ma vat biteni mini bitene, ‘Utemanon, uhur uvei nam, e utei vatu nen imei etan e hanutap lu e hexalu mun (50) tang.’

“Di, misis ngan tesav bitene, ‘E xouk, onggur naha ra eilep navan?’

“Xi bitene, ‘Naleh bak pulaoa be taosen tei (1,000).’

“E vat biteni mini bitene, ‘Uhur uvei nam e utei imei e tan e bak xa be handred tol e he sav (800) kestang.’

“Misak ni, tave ti neta xa vat pol ni vatin mak, e eilep nan pet rati vengan xa xi pisen ni xa nenemien nan be teviei. Nabiteni mak vengan xa moletin xil te ut etan langgur vatie melele xa lapol del tua nae xil. Sexien nae xil mili sexien na moletin xil xa labit langgusil Hi e ladi e miehen.”

Iesu biteni mun bitene, “Ma nabiteni mi xamim, vatu namim misakras vati vahehi. Ma muleh moletin sav xil limei visal xamim e mututou ni xil ni holesok namim xil te ut etan ak. Mak, ma melele xa muling sen holesok namim xil te ut etan, ma Hi ihur pilei xamim e ut nesao. 10 Moletin xa di milaxat kuh neta tei xa hokorong, ma ikila ilaxat kuh neta tei xa mahulong. E moletin tei xa di purun neta tei xa hokorong, xi ikila mun ipurun neta tei xa eilep. 11 Xosxa moletin xil linanesi ti e xouk itel holesok xil te ut etan; Hi mun misakras vanesi e xouk vatel holesok hos nan xil xa tellep mu ili. 12 E xosxa mutalaxat kuh holesok xil na Hi ti xa milingi e hemim e ut etan, ma misakras vasa ti mun neta mi xamim e ut nesao.

13 “Moletin te polien tei misakras vapol mi suv lu. Maxani, en iat tei, e eheien nan iti e tei xalu; mu imerere ni tei, e iketeh isa ni tei xalu. Osakras omot mi Hi vatel vatu.” 14 Melele xa Parasi xil lalong sepinien xil ak, lasep pepeas ni Iesu, vengan xa eheien nae di vatu.

Iesu Misep Usil Sexien xa Parasi Xil Langgur Xoteh Rae Xil na Hi

Luk 16:15-18

15 E Iesu biteni mi Parasi xil bitene, “Xamim xil ak iaxa mupol ni xamim momal e pe met moletin xil, e Hi mikil nenemien namim. Naha xa moletin di minemi bit bos, ngan ak Hi di misin ni vari tang.

16 “Rae xil na Mosis e tisen na provet xil latepisen suse na Hi mi moletin xil duxoh melele xa Sion mei e di tekas moletin xil. E mei duxoh xosali iha, longeongen hos di pisen suse xa Hi imei ihe suv toto te meulien na moletin xil. Longeongen ak di mikapis e ut xil ngasen, e moletin xil holu di langgeih tengan labit Hi vamei mak. 17 Neta sav xos ut nesao e ut etan lalovus e melengien tei, e mavolut sepinien xa de Rae xil na Mosis, xeihen teni misakras vavus.

18 “Ve rin ak, e pe met Hi, tiramue xa miling atou nan e nggur atou sav, xi di pol ni tesaen dela. E tiramue xa miteli del atou xa tiramue nan milingi, xi mun di pol ni tesaen dela.”

Lasaros e Moletin Tei xa Holesok Nan Holu

Luk 16:19-31

19 Iesu mitumul mi moletin xil bitene, “Vatei, moletin tei da xa holesok nan holu, mising ni eising xil xa bos e vatu nen be nesao. Xi mikila vaxal holesok xil ngasen xa xi ien bei. E meulien nan, xi milonge bos vehakut. 20 Moletin tei mun da xa holesok nan tovuol, hisen Lasaros. Xi menuk ba xati e misakras vakakao. Vehakut, tua nan xil lapoe ba, lalingi e hol puiteh te vioh ma moletin xa holesok nan holu tengan mikila ti vasis moletin xil ve vatu. 21 E vehakut, Lasaros bit va saxut anien xa moletin ak di miso ni ba. E rilomun, kuli xil mun lamei di lamumun menuk nan xil.

22 “Ba vuma ... hoeo ak mat, e masxaxa xil ladela ba, lalingi de ri Ebraham e ut nesao. Di, moletin xa holesok nan holu mun mat, ma ladihin ni. 23 E moletin ak be de ut sa Temat, e milong pangas xi pupu. Di, miketeh be nesao, pus Ebraham de sotin, e Lasaros de rin. 24 Ma xi mikei be nesao bitene, '!Tata Ebraham, iem isae li e nou! Sil Lasaros vaha vasa vakuhen vahe oei, e mei vatuxol meok tengan vamarir. !Vengan xa inou, nalong pangas nou pupu e upang ak!'

25 “E Ebraham biteni mini bitene, 'Natuxuli, unem pisi mu. E meulien nam te tiamu, di mak otepus kuh hosien, e Lasaros di telong pangas xi tova tang. E taxeak, xi sung di pus hosien inggak, e xouk, di olong pangasuk. 26 E tei mun, vul tei xa mahulong da xoteh xir, misak ni xamem masakras mavur xotehi mavat visal xamim; e xamim mun, musakras mumei visal xamem.'

27 “Ma moletin xa holesok nan tehe holu biteni mini bitene, 'Tata Ebraham, ieok bei li xa osil Lasaros vahe visal vatimol navan xil. 28 E rute ak, tua navan xil labe lim (5) ladi en, mae ni ha vasel xat xil tengan xil sung linamei ti e ut te longpangasien ak.'

29 “E Ebraham biteni mini bitene, 'Rae xil na Mosis del sepinien na provet xil te tiamu di tuei tengan lisa selxatien mi tua nam xil. Ling xil tengan ti lilong xat naha xa sepinien xil ak di labiteni.'

30 “Moletin ak bit rilomun ni mini bitene, 'E-e, tata Ebraham, ngan ak tapin ti mu! E vahit moletin tova vameul rilomun ra maten e vahe visal xil, ma xil lakila laviles meulien nae ra sexien tesa xil.'

31 “E Ebraham bitene, 'Xosxa linalong xat ti Rae xil na Mosis e sepinien na provet xil, ma misakras lalong xat sepinien na moletin tei xa meul rilomun ra maten.'”

Copyright information for `TVK