Luke 19

Sakias Biles Meulien Nan

Luk 19:1-10

Iesu nggusil suse ba nggo Seriko tengan itavi iha. E rute ak, eilep tei na moletin te takis xil da, hisen Sakias, e holesok nan xil holu. Xi bit vapus ti xa Iesu be visi, e misakras vengan xa xi be tamure tang e vanut moletin tei xa mahulong pupu di langgusili. Ma miloh diamu ni vanut moletin ak, e ba peou e vatit sabilong tei tengan ipus Iesu mei ixo visali iha. Melele xa Iesu bemei momal ni rute ak, miketeh be nesao e biteni mi Sakias bitene, “Sakias, temanon amei e tan, vengan xa xosali nite e tim sam.”

Sakias mitemanon bemei e tan. Xi besi xi e del Iesu lube tim san. Moletin xil vus xa lapusi laseputut ni e labitene, “Moletin ak ba tengan ha vahe tim sa moletin tesa tei.”

Melele xa ladi tamu e tim sa Sakias, xi mitamea misoh e biteni mi suv Iesu bitene, “!Suv, uteong ni nou! Niseti holesok xil vus navan ihe vanute lu, e vanute tei, nisa ni mi moletin xil xa labe hoeo. E xosxa nakan ni vatu na moletin tei, ma vatu xil ngasen xa nakan ni rani, nisa rilomun ni mini ihe hat (4) mun.”

Ma Iesu biteni mini bitene, “Xosali, Hi miteh meulien e xouk del vatimol xil nam, vengan xa xouk di opisen ni xa oneket nggoni avu nar Ebraham te tiamu. 10 Nat Moletin bemei tengan valang ni hisit moletin xil xa di lakesae, e vateh meulien e xil.”

Iesu Dei Vole Usil Eilep Tei xa Miseti Vatu Nan mi Moletin Nan Xil

Luk 19:11-28

11 Melele xa moletin xil di lateong ni Iesu e tim sa Sakias, xi dei vole tei mi xil. Xil di lanemi labit navehi ti, Hi istal mei ihe suv toto te meulien na moletin xil. Lapusi xa xil di lamei sangas e Serusalem, ma lanemi xa Hi iling Iesu mei ihe suv toto inggak. 12 Ma Iesu biteni mi xil bitene, “Vatei, eilep tei di bue xat xi tengan vahe ut tei xa sotin tengan lalingi vahe suv toto tei e ut xati nan. Ti, itilomun imei e von nen. 13 E diamu, xi mikes viton moletin xil te polien nan xa labe hexalu (10) lamei tengan vaseti vatu xa be handred taosen (100,000) mi xil kekes. E xi biteni mi xil bitene, ‘Muleh vatu xil ak muha, mupol itela ituxoh melele xa nitilomun en.’

14 “Eilep ba, e moletin xil te ut nan iexil tavei vari. Misak ni xil lasil eloheoh nae xil tengan ha lihiteni mi moletin xil te kavmen lihitene, ‘Xamem iemem ti tavei moletin ak vamei vahe suv toto namem.’ 15 Tave ti neta xa lasin ni, e moletin xil te kavmen ak lapeti be suv toto nae. Di, xi dilomun be von nen.

“Melele xa dilomun, mikes moletin te polien nan xil lamei tengan vakil ti xa xil lapol ni midep del mani xa teseti mi xil.
16 Ngan diamu bemei, biteni mini bitene, ‘Suv, inou napol del vatu nam, ma nakamet vatu be milian tei (1,000,000) mun da xat ngan xa otesa ni minou.'

17 “Eilep biteni mini bitene, ‘!Bos pupu! Xouk obe moletin te polien tei xa bos. E vengan xa olaxat kuh neta xa hokorong tang, ma nilinguk tengan ti ulaxat taon xil navan ihe hexalu (10).

18 “Tei mun e xil bemei e bitene, ‘Suv, inou napol del vatu nam, ma nakamet vatu xa be handred taosen lim (500,000) mun da xat ngan xa otesa ni minou.'

19 “Ma eilep ak bitene mini bitene, ‘Xouk ulaxat taon xil navan ihe lim (5).’

20 “E tei mun bemei e bitene, ‘Suv, vatu nam xiak, natepis xol kuhi ni kaliko e ba natelingi tang teta. 21 Uluk tekan ni xouk vengan xa xouk obe moletin te xeih. Xouk okila ovur neta xa otapol ti ven, e di onggur pupu ni anien xa moletin sav xil lapol ni e naho xil sam.’

22 “Di, eilep biteni mini bitene, ‘!Xouk obe moletin te polien tei xa osa tang! Nipol ni sepinien nam xil ak ianuk mun tang! Xouk okila xa inou nabe moletin te xeih, di nanggur neta xa di natapol ti ven, e di nanggur anien xa moletin sav xil di lapol ni e naho navan. 23 ?Veneh ma otaling vatu navan ti vaha vate bangk tova? Vamak, ma melele xa nitilomun, mei namuri vatel tuten mun vata xati.'

24 “Di, biteni mi ngan xil xa lasoh ladi sangas bitene, ‘Muleh rat vatu xil xai rani, e musa ni mi moletin navan xa nggur vatu xa be milian tei (1,000,000).'

25 “E xil labiteni mini labitene, ‘Suv, xi nggur milian (1,000,000) ngamu!’

26 “E xi bit rilomun ni mi xil bitene, ‘Reitin mak, ngan xil xa di langgur huite e neta xa nalingi e he, xil likila lihuri ihe mahulong mu. E ngan xil xa di latahur ti vari huite; holesok xil vus xa nalingi e he, nileh rati ra xil.'

27 “Ngan ak bus, eilep ak biteni mun mi moletin nan xil bitene, 'E taxeak, ngan xil xa laketeh misa ni nou, e iexil tavei nou mei namei suv toto nae, muleh xil limei e muhas xil lilel pe metok.’”

28 Melele xa Iesu misepin mi moletin xil bus, xi be Serusalem del moletin nan xil.

Iesu Be Serusalem Nggoni Suv Toto Tei

Luk 19:29-40

29 Melele xa Iesu bemei sangas ni metimal tahal Betfas e Betani, sangas ni Vathu te Urvatiei te Olip, e misis moletin nan lu tengan lalitiamu laliha. 30 E biteni mi xalu bitene, “Mulhe metimal xor, e melele xa muba en, mulkamet sulut dongki tei xa lasare da, xa moletin tovuol tamu vatotan en. Mullal rati e multeli imei inggak. 31 Xosxa moletin tei isis xamil xa mulal rati veneh, ma mulhiteni mini xa suv ien bei.”

32 Xalu luba, e lupus holesok xil vus momal tang nggoni ngan xa Iesu tehiteni mi xalu. 33 E melele xa di lulal rat sulut dongki ak, moletin xil xa sae lasis xalu labitene, “?Veneh ma mubit mullal rati?”

34 E xalu lubiteni mi xil lubit, “Suv ien bei.” Ma xil lamae ni mi xalu. 35 Di, ludeli sulut dongki ak be visal Iesu. Luden eising nalu de mar dongki, e ludutou ni Iesu ba dotan da en. 36 E melele xa di ba nggo dongki ak, moletin xil di laden kuh eising nae xil e suse.

37 E melele xa xi bemei sangas Serusalem, momal ni suse xa nggo Vathu te Urvatiei te Olip, vanut moletin nan xil di lames Hi e di lapet rat hisen del meunen ve merekel xil xa di latepusi ti tepol ni e labitene,

38 “!Hi Suv, utuxol xat suv toto xa bemei e hisom!
Iling tomat mi moletin xil itel Hi,
e xil lipet rat hisen ihe ut nesao.”
39 Di, rut Parasi xa lamos e vanut moletin ak lasepin mi Iesu labitene, “!Tisa, sepin mi moletin nam xil litit votei!”

40 E Iesu bit rilomun ni mi xil bitene, “Nabiteni mi xamim, xosxa xil litit votei, ma hat xil ak sung lixoles e ti likekei ni.”

Iesu Des Moletin Xil Tahal Serusalem

Luk 19:41-44

41 Melele xa Iesu bemei sangas ni Serusalem, keteh pusi, ma muis 42 e bitene, “O mol-Serusalem xil, vahit mukil suse te tomat, ma mukila muvuri. E taxeak, vengan xa di musin nou, Hi misak ni minggus ra xamim, e mesal tovuol munamun tengan muvur xat tomat. 43 Melengien tei di bemei xa xil xa di labae del xamim limei, lixorelis taon namim, e xamim ngasen musakras mulesae. 44 Xil lihas vin xamim e limulel holesok xil vus namim. Hat te nim xil linavil xat xil ti mun, vengan xa xamim mutapus kil ti melele xa Hi temei tengan vateh meulien e xamim.”

Iesu Minggol Rerat Moletin Xil ra Nim Eo na Hi

Luk 19:45-48

45 Di, Iesu be Nim Eo na Hi e di minggol rerat ngan xil xa di lapos ni holesok nae xil en. 46 E xi biteni mi xil bitene, “Hi bit xati di e Vanuvei Eo nan bitene,

‘Nim Eo navan ihe 'nim te sisen'.’
E xamim mubilesi mei be 'nim te xusen' na moletin xil te kanen.”

47 Di, e melengien xil ngasen, Iesu di pispisi e Nim Eo na Hi. E vat xil na pris xil, tisa xil te Rae xil na Mosis, e vat sav ngan xil mun te rute ak lalang ves suse tengan lavasi vamat. 48 E xil lasakras vengan xa, vehakut, vanut moletin xil di lamosos ladela e iexil bei mak mu tengan lateong kuhi ni sepinien xil nan.

Copyright information for `TVK