Luke 22

Lingxatien Tengan Lavas Iesu Vamat

Luk 22:1-6

Melele bemei sangas tengan Siu xil lanem rilomun ni 'Melengien xil te Beret xa Is Tovuol En.' Melengien kokot teni vari, xil lapol ni anien xa lakesi ni ‘Anien te Tavien’ en. Vat xil na pris xil del tisa xil te Rae xil na Mosis di lalang ves suse tengan lavas xuxus ni Iesu vamat vaxo en. Xil uli xil mikan xa moletin xil xa di langgusili, linapol ni neta tova mi xil.

Di, Temat bemei nggeih e nenemien na Sudas Eskariot, xa be tei e lu e le (12) na Iesu. Ma Sudas be reling xil e ba misepin del Vat xil na pris xil del eilep xil na mereketeh xil te Nim Eo usil suse xa xi mikila iling Iesu e he xil ixo en. Xil lamaal ven e labit xati xa lixale ven. Mak, ma Sudas mae ni. Di, ba di milang ni suse xa bos tengan iling Iesu ihe he xil ixo en e melele xa moletin xil lanave holu ti.

Moletin Lu na Iesu Lalibue Xat Holesok Xil te Anien te Tavien

Luk 22:7-13

E 'Melengien xil te Beret xa Is Tovuol En', melele xati tengan lapol ni 'Anien te Tavien', moletin xil di labas sulut sipsip xil ven. Ma Iesu misil Pita xal Sion del xat sepinien ak, “Muliha mulsak mese ni Anien te Tavien tengan ha ria vituei ni.”

Ma xalu lusisi lubit, “?Rute xave iaxa xouk iem bei xa maliha malsak mese ni en?”

10 Xi biteni mi xalu bitene, “Melele xa mulihe hal Serusalem, moletin tei xa po valoei xa pol imei ihisu ni xamil. Mulhusili ha mulhe nim xa xi iha en. 11 Di, mulsis moletin xa nim man mulhitene, 'Tisa bit, ‘?Von toen xave iaxa nitel moletin navan xil mei mua Anien te Tavien en?’' 12 Xi itel xamil mulhe nesao e nim man e ipisen von toen tei xa mahulong xa langgur revi ngamu datil xamil. Rute ak vari iaxa mulsak mese ni holesok xil vus en.”

13 Xalu luba, e lupus holesok xil vus nggoni ngan taxa Iesu tehiteni mi xalu. Ma xalu lusak mese ni anien ak en.

Anien Eo na Suv Iesu

Luk 22:14-23

14 E melele te anien en, Iesu ba dotan e von anien en del moletin nan xil. 15 Di, Iesu biteni mi xil bitene, “Ieok tehei pupu xa nama Anien te Tavien ak vatel xamim. Ti, niha sung nilong pangas nou. 16 Nabiteni mi xamim, ninaxa ti mun Anien ak ituxoh melele xa koute teni istal, e melele xa Hi isak ni lelaxatien nan mei istal en.”

17 Di, Iesu nggur kap xa uaen ba en, memes Hi ven e biteni bit, “Muhuri, e xamim vus mumu ni. 18 Nabiteni mi xamim, taxeak iha ninamu ti mun uaen ak ha ituxoh melele xa Hi imei istal ihe suv toto na moletin xil.”

19 Di, Iesu nggur beret, memes Hi ven, bul pasi e misa ni mi xil e biteni, “Ngan ak be tiei navan xa nimae ni ve xamim. Vehakut xa ti mupol ni imak, ti munem xat nou ven.” 20 Usil sexien tak, melele xa langganien bus, Iesu nggur kap xa uaen ba en, misa ni mi xil, e biteni bit, “Uaen ak be reok xa ileh tengan muhur meulien ixo en, e isak ni hitxatien hu na Hi mei istal e ihe reitin.

21 “!E muteong ni nou! Ngan xa imae ni nou nihe he moletin tesa xil di dotan del nou e anien ak taxeak. 22 Reitin mak, Nat Moletin imat ixoni ngan taxa Hi tehit xati ngamu. E isa pupu mi moletin xa be suse teni!”

23 Ma xil di lasis xil mun tang xa visi e xil ikila ipol ni rin ak.

Moletin Xil na Iesu Di Langor ve Visi e Xil Be Eilep Mili

Luk 22:24-30

24 Melele xa moletin xil na Iesu ladi tamu e von anien en, di langor mi xil mun usil visi e xil iaxa be eilep mili. 25 Ma Iesu biteni mi xil bit, “Suv toto xil na moletin xil xa latakil ti Hi di lapisen xeihen nae mi ngan xil xa ladi pe he. E eilep xil mun nae di labit moletin xil lakes xil ni ‘Eilep te Tutouen.’ 26 E rin xa namim, namak ti. E-e. Eilep tei e xamim ipol ni nenemien nan ihe tan ixoni horam maxoe tang. E ngan xa be suv ipol ni nenemien nan ihe tan ixoni moletin te polien tang. 27 ?Visi iaxa be eilep, ngan xa dotan di ngganien, mu ngan xa di miseti anien? Moletin xil vus lanemi labit ngan xa di dotan. E inou, nade vis xamim nanggoni ngan xa di miseti anien.

28 “Xamim mutetel xat inou e sakpisien xil vus xa testal minou. 29 E texoni ngan taxa Tata teling xat nou tengan mei nihe suv toto tei, ma inou mun niling xat xamim muhe suv toto xil. 30 Melele nihe suv toto, nisa von totanen te merereen mi xamim vus, e ti muanien e ti mumun itel nou e voninok. E ti mulaxat vatimol xil tahal Isrel xa labe lu e le (12) e mulepis meulien nae xil.”

Iesu Bit Kila xa Pita Iluvos Ihit Takil Ti

Luk 22:31-34

31 Di, Iesu biteni mi Saemon Pita bitene, “!Saemon, Saemon uteong ni nou! Temat tesis Hi tengan isak pis xamim vus, e Hi mae ni tengan ile kil neketen namim. 32 E inou nasis ve xouk Saemon tengan neketen nam navus relinguk ti. E melele xa uhiles meulien nam e neketen nam ixeih mun e nou, ma ututou ni neketen na tumali xil mei ixeih mu.”

33 E Pita mitamea e biteni mini bitene, “!Suv, inou nabue xat nou tengan nihe nim te xeih itelak e nimat itelak!”

34 E Iesu bit rilomun ni mini bitene, “Nabiteni minuk Pita, itiamu xa tuto ikora e makoe roroh tamu, xouk uhiteni ihe vatol xa otakil ti nou.”

Iesu Bit Moletin Nan Xil Livue Xat Xil

Luk 22:35-38

35 Di, Iesu misis moletin nan xil bitene, “Melele xa natesil rerat xamim, tenatel xati ti neta vaxoni paos, ateli, mu sandel. ?Mutehe terume ni neta tova?”

E labit rilomun ni labitene, “E-e, neta tovuol.”

36 Iesu biteni mi xil bitene, “E taxeak, tei xa tiei te vaeen nan tovuol, ma ipos ni eising tova nan e ixal tova. 37 Nabiteni mi xamim, sepinien xa de Vanuvei na Hi imei ihe reitin xa bit,

‘Lapol nggeih mini
nggoni moletin xil xa di langgur xoteh rae xil.'
Naha xa latetisi, Hi ling xati xa mei ihe reitin e meulien navan.”

38 Moletin nan xil labiteni mini labitene, “!Suv, pus ti mu! Tiei lu te vaeen xiak.”

Ma Iesu bit rilomun ni bitene, “!Ei, pipin!”

Iesu Be Vathu te Urvatiei te Olip Tengan Vasis

Luk 22:39-46

39 Iesu be reling Serusalem e be Vathu te Urvatiei te Olip nggoni ngan taxa di pol vehakut ni, e moletin nan xil langgusili. 40 Melele xa laba laduxoh rute ak, Iesu biteni mi xil bitene, “Mutit ni sisen tengan Hi namaen ni ti sakpisien xil namei e xamim.”

41 Di, be reling xil be sotin vuteili, di mitingeiril be tan e di misis bitene, 42 “Tata, xosxa omae ni, hur rat longpangasien xa di bemei sangas ranou. E onapol ni ti naxoni ngan xa inou ieok bei; upol ni ixoni ngan xouk kestang iem bei.” 43 E masxaxa tei te ut nesao mei mistal mini e misak ni ven e nenemien nan xeih mu. 44 Del nenexoen te longpangasien, xi misis nggeih mu. Misak ni vetin nan xa mileh, mot be tan nggoni ra.

45 Melele xa Iesu misis bus, xi mea, ba rilomun visal moletin nan xil. E mikameti xa xil vus di lapat. Ve buol pupu vengan xa nenexoen di bas xil. 46 Ma Iesu biteni mi xil bitene, “?Veneh ma di mupat? Mutamea, mutit ni sisen tengan Hi namaen ni ti sakpisien xil namei e xamim.”

Ladal Xat Iesu

Luk 22:47-53

47 Melele xa Iesu di tamu misepin, Sudas xa be tei e lu e le (12) na Iesu bemei del tetit moletin tatei xil. Xi bemei visal Iesu tengan vapesum ni vin. 48 E Iesu biteni mini bitene, “?Sudas, xouk omae ni Nat Moletin nggo pesumen?”

49 Melele xa moletin na Iesu xil lapus naha xa di mistal, lasisi labitene, “?Suv, rakila ravae ni tiei te vaeen?” 50 Tei xil milat tiei tei e miseh xoteh vorang metu na moletin tei te polien na Vatixar na pris xil.

51 E Iesu biteni bit, “!Ei, pipin!” Di, mitang duxol moletin ak e pol ni vurangen bos rilomun.

52 Di, Iesu biteni mi Vat xil na pris xil, mereketeh xil te Nim Eo, del elda xil xa lamei tengan lital xati, bitene, “?Midep ma mumei del tiei te vaeen e homenda tengan mutal xat moletin tova te kanen? 53 Vehakut nade visal xamim e Nim Eo, e mutasak pis ti tengan mutal xat nou. E taxeak be mesal namim, e melele te maluxoluken xa xeihen na Temat di pol.”

Pita Bit Takil Ti Iesu

Luk 22:54-62

54 Xil ladal xat Iesu e ladeli ba be nim ma Vatixar na pris xil. E Pita di mile xus e di dutou ni xil. 55 Melele xa laduxoh nim ak, lasahan upang tei di minggan e hilaep te vioh. Ma Pita ba mos del ngan xil xa di ladotan xorelisi. 56 Melele xa atou tei te polien pusi xa Pita dotan de visal upang, miketeh momal ba ni e biteni bit, “Moletin ak mun tevituei tetel Iesu.”

57 E Pita miluvosi bit, “!Atou, inou natakil ti moletin xai!”

58 Tave nousav ti, moletin tei pus kil Pita ma biteni mini bitene, “!Xouk mun obe tei e xil!”

E Pita misep luvosi mun bitene, “Ei, tiramue, tave nou ti.”

59 Di, be nousav vuteili, tiramue sav mun misepin nggeih xati bit, “!Reitin mak! Tiramue ak tevituei tetel Iesu, vengan xa sepinien nan nggoni ngan Kaleli xil tang.”

60 E Pita biteni nggeih bit, “!E-e, natakil ti vari naha xa di obiteni iaxai!”

Vatakes, melele xa di tamu misepin, tuto tei mikora.
61 E melele nen tak, suv Iesu biles, miketeh momal ba ni Pita, ma Pita minem rilomun ni naha xa suv tehiteni mini tehit, “Itiamu xa tuto ikora e makoe roroh tamu, xouk uhiteni ihe vatol xa otakil ti nou.” 62 Ma Pita ba e di midang vengan milonge misa pupu.

Lapol Pepamen mi Iesu e Labas Pangasi

Luk 22:63-65

63 Mereketeh xil xa di laketeh xol Iesu lasep pepamen ni e di labas pangasi. 64 Labar xol meten e melele xa tei xil basi, lasisi labit, “?Xosxa obe provet tei, hit pisi, visi iaxa basuk?” 65 E laso sepinien hao mun xa misa ba ni.

Langgur Iesu Be Kot

Luk 22:66-71

66 Melele xa ut milan, elda xil, Vat xil na pris xil, del tisa xil te Rae xil na Mosis ba labe vituei e von kot en, e ladel Iesu mei misoh pe met xil. 67 Xil lasisi labitene, “?Hit pisi mi xamem, xouk iaxa obe Kristo xa Hi tehosei?”

E xi bit rilomun ni mi xil bitene, “Xosxa nihiteni mi xamim, ma munake reitin ti e nou.
68 E xosxa nisis xamim xa veneh ma mutaneket ti, ma musakras muvit kuhi minou. 69 E nihiteni imak, taxeak iha, Nat Moletin itotan e von xeihen e ri metu na Hi.”

70 Ma xil vus lasisi labit, “?Xouk iaxa obit obe Nat Hi?”

Ma Iesu bit rilomun ni mi xil bitene, “Nggoni ngan taxa di mubiteni iaxai.”

71 E xil labiteni labit, “Veneh ma rilang ves moletin tova tengan isa sepinien iha xati? Xir vus ralong sepinien tesa xil xa mistal nggo valongon e be an mun tang.”

Copyright information for `TVK