Luke 7

Neketen na Vat na Moletin Xil te Vaeen

Luk 7:1-10

Melele xa Iesu pispisi mi moletin xil bus, xi be Kapaniam. E taon ak, vat tei na moletin xil te vaeen da. E tim san, moletin tei te polien nan mesei holu, sangas vamat, e vat ak ien bei pupu. E melele xa xi milonge xa Iesu de e taon ak, xi misa rut elda xil na mol Siu xil tengan lava lasis Iesu mei vatutou ni moletin nan ak. Ma elda xil ak labe visal Iesu e ladak kesi tengan vatemanon e labiteni mini labitene, “!Amei, tutou ni moletin ak li! Vengan xa xi be hisit moletin xa xamem ngasen mamerere ni. Xi ien bei Siu xil e xi di tetutou ni xamem matehil nim te pispisien nar.”

Ma Iesu be xil laba. E melele xa Iesu di be sangas e tim, vat ak misa tunali vutatei xil lamei e labit sepinien nan mini xa bit, “Suv, onakon ti onamei. Inou natapin ti tengan xouk omei e tim savan mu tengan inou mun, namei visaluk. E usepin tang, nakila xa moletin navan ilonge ihos rilomun. Ixoni inou, melele xa eilep navan misepin tang minou, nanggusil raen. E melele xa inou mun nasepin tang mi moletin tei te vaeen navan, xi mun pol nggusil raeok. Nakila nasemae ni tei nihit, '!Ha!' ma xi iha. Mu nihit, '!Amei!' ma xi imei. E nakila nisemae ni moletin te polien navan nihit, 'Pol ni netak!' ma xi ipol ni.”

Melele xa Iesu milong sepinien ak, xi mitemanin ma biles pus vanut moletin xil xa di langgusili e biteni mi xil bitene, “Reitin mak, natapus ti mu hisit neketen ak e moletin tova tahal Isrel.”

10 E melele xa ngan xil xa latexo nim ma vat ladilomun laba, lapusi xa moletin te polien nan milonge bos ngamu.

Iesu Pol ni Horamue na Tunau Tei Meul Rilomun ra Maten

Luk 7:11-17

11 Dutou ni ngan ak, Iesu del moletin nan xil langgusil suse laba tengan lave taon tahal Naen, e moletin hao di langgusili. 12 Melele xa xil lamei sangas visal puiteh te vioh te taon ak, xil lapus vanut moletin tei ladel tiei na horam maxoe tei xa mat lava latihin ni. Horamue ak be siskes na tunau tei. 13 Melele xa suv Iesu pus tunau ak di dang, xi en misae en ma biteni mini bit, “Onatang ti.” 14 Di, Iesu ba be sangas visali e misasa dal xat vet ma ngan xa mat. Ma xil xa lapoe lasoh. Di, Iesu biteni mi ngan xa mat bitene, “!Horam maxoe, nabiteni minuk, meul!” 15 Ma horamue ak meul rilomun e mea. Di, misepin mun. Ma Iesu miling rilomun ni mi ninen.

16 Moletin xil vus latemanin e di lapet rat his Hi e di labitene, “!Taxeak, provet tei xa be himetu de visal xir!” E ngan xil labit, “!Hi bemei tuei tengan vatutou ni moletin nan xil!”

17 Ma longeongen usil Iesu mikapis e ut ngasen e Sudea del rute xil vus xa be sangas visali.

Eloheoh Lu na Sion xa Di Mikas Moletin Xil

Luk 7:18-35

18 Longeongen usil Iesu duxoh moletin xil na Sion, ma xil ba di lasep usili mini. 19 Xi misil rumali lu luba tengan lalsis suv Iesu lalihit, “?Xouk obe ngan xa Hi tehit xati tehit imei, mu mutatil tova mun tesav?”

20 Melele xa lumei visal Iesu, lusisi lubitene, “Sion xa di mikas moletin xil misil xamel tengan mei malsisuk imak, 'Xouk obe ngan xa Hi tehit xati tehit imei, mu mutatil tova mun tesav?'”

21 Melele nen ak, Iesu di pol ni moletin xil xa lamesei mu ngan xil xa lalong pangas xil, mei lalonge bos. E di nggol rerat ninin tesa xil ra ngan tesav xil. E ngan xil xa mete bar, pol ni xil mei laketeh rilomun. 22 Ma Iesu bit rilomun ni mi moletin xalu na Sion bitene, “Muliha mulihit naha xa mulonge e mupusi mi Sion. Ngan xil xa mete tevar, lakila laketeh rilomun; e ngan xil xa latesakras kakaoen, lakakao. Moletin xil xa lathur meseien leporsi, xil mei vexil memese; e ngan xil xa vurange tevon, lalongeong mun. Ngan xil xa latemat, lameul rilomun; e setuen te longeongen hos di ba mi hoeo xil. 23 Ngan xil xa nenemien nae di tave lu ti usil nou, Hi ituxol xat xil.”

24 Melele xa moletin xalu na Sion luba, Iesu misep usil Sion mi vanut moletin xil bitene, “?Melele xa xamim mutehe uruvuol tengan mupus Sion, mutehit mupus hisit moletin eah? ?Muteha tengan ha mupus ngan xa tenaxeih ti nggoni sulut vatiei tei xa misakras vasomal melele xa vatiang bui nggeih? !E-e! 25 ?Moletin eah iaxa muteha tengan ha mupusi? ?Moletin tei xa mising ni eising xil xa bos pupu? !E-e! Xil xa lasing mak e meulien nae polu e holesok holu, xil ladi e tim sa suv toto xil kestang. 26 ?Mak, ma visi iaxa muteha tengan ha mupusi? ?Provet tei? !Io! Xi be provet tei e nabiteni mi xamim, xi be eilep mu ni provet sav xil. 27 Sion be ngan xa Vanuvei na Hi di misep usili bitene,

'Mupusi, nisa eloheoh navan iha itiamu ni xouk,
tengan isak mese ni holesok xil itetiluk.'
28 Ngan ak reitin, moletin sav tovuol xa lapesi e ut etan xa vahe eilep mu valeli Sion. E movotei tei xa Hi be suv toto nan be eilep mu mili Sion.”

29 Melele xa moletin xil lateong ni mak, e moletin te takis xil mun, lake reitin xa suse na Hi bos mak mu vengan xa xil latelong sepinien na Sion, latehiles meulien ra tesaen nae, e latemae ni Sion mikas xil. 30 E Parasi xil del tisa xil te Rae xil na Mosis xa latamae ni Sion vakas xil ti, xil lasin polien na Hi e meulien nae.

31 Iesu biteni mun bitene, “?Moletin xil te xosali ak, langgoni naha? ?Sexien nae nggoni naha? 32 Xil langgoni tutut horamue xil xa ladotan ladi e valkesao e di lake xat xil mun tang labitene,

'Di mabas kitar nggoni melele te tetelien,
e di mutakikei ti e mutavasias hemim ti vatel xamem.
Di, madang nggoni ngan xa madi e maten tei,
e mutatang ti vatel xamem.'

33 Nabiteni mak vengan xa melele xa Sion temei, xi di tehal ni anien ve sisen e di tamu ti uaen, ma xamim mubiteni mubit, '!Sion, ninin tesa tei da en!' 34 E melele xa Nat Moletin temei, xi di ngganien e di mumun, ma xamim mubiteni mubit, '!Pus ti mu moletin ak, xi di ngganien e di mumun pupu! Xi di mikei tua e moletin te takis xil e moletin tesa xil mun.' 35 Visi e xir xa bit di nggusil metisouen na Hi, meulien nan ipisen ni.”

Atou Tesa Tei Mideh Vokon Xat Le Iesu

Luk 7:36-50

36 Dutou ni ngan ak, Parasi tei misis Iesu tengan vanien vatela, ma Iesu be tim san e dotan e suon tengan vanien. 37 Melele xa moletin xil te rute ak lalonge xa Iesu mei vanien e tim sa Parasi xiak, atou tei te suse minemi bit ha vapusi. Misak ni, minggur valit vokon tei xa vatu teni be nesao, ba. 38 Di, be nim e misoh pe tou Iesu e di muis. Vengan xa Iesu di bulun len be petoun, simeten di mileh e di mikas le Iesu. Di, misihia ni hilin, e pesum ni len e mideh vokon xati. 39 Melele xa Parasi ak pus netak, ma xi di misep tasen bitene, “!Vahit moletin ak vahe provet tei xa be reitin, xi vakila vari xa atou xa di duxoli xiak be hisit atou eah! Xi vakila xa xi be atou tei te suse.”

40 Ma Iesu misepin mi Parasi ak bitene, “Saemon, ieok bei namit sepinien tei minuk.”

Ma Saemon misisi bit, “?Tisa, obit ovit neh?”

41 Ma Iesu dei vole ak mini bitene, “Rumali lu luleh vatu ra eilep tei. Tei xalu nggur 500,000 vatu, e tei tisav nggur 50,000 vatu. 42 Dutou ni, rumali xalu ak lusakras lalsa xoles vatu nan. Misak ni eilep en misae e xalu e misep xol xalu tengan lalnasa xoles ti neta mini. Ma nisisuk, ngan xave e xalu iaxa eheien nan iti e eilep ak ili?”

43 Saemon mea e bitene, “Nanemi nabit ihe ngan xa kaon nan mahulong mu, e eilep en misae en.”

Ma Iesu biteni mini bitene, “Obiteni momal.”
44 Di, Iesu biles pus atou ak e biteni mi Saemon bitene, “Xouk ole kil atou ak? Melele xa namei e tim sam, xouk otasa ti oei tengan nikas leok ni. E atou ak, tekas leok ni simeten e tesihia tevue ni hilin. 45 Xouk otapesum ni viuk ti tengan ovur pilei nou. E atou ak, melele kokot xa temei nim, xi di tepesum ni leok xa tenangel ni ti. 46 Xouk otasa ti mun oel tengan naxul maxoe ni nou ni; e xi mideh vokon nan ba xat leok. 47 Ma nabiteni mi xamim, atou ak di ien bei nou holu, e ngan ak di pisen ni xa mikila xa naleh rat tesaen holu ra meulien nan. E ngan xa naleh rat tesaen nan hokorong, xi di pisen eheien nan hokorong minou.”

48 Di, Iesu biteni mi atou ak bitene, “!Taxeak, tesaen nam, naleh rati ranuk!”

49 Rut moletin xil xa ladi di labiteni mi xil labitene, “?Hisit moletin eah ak xa mikila ileh rat tesaen ra moletin tei?”

50 E Iesu biteni mi atou ak bitene, “Ve neketen nam e nou, taxeak, Hi miteh meulien e xouk. Ha itel xat tomat na Hi.”

Copyright information for `TVK