Psalms 111

Ripet Rat His Iahova ve Holesok Xil xa Di Pol ni

!Ripet rat his Iahova!

Del meulien tevi navan,
ti nisa memesien iha mi Iahova.
E pe met moletin nan xil,
inou ti nipol ni imak.
Holesok xil vus xa Iahova di pol ni bos pupu.
Moletin xil vus xa labesi xil ven, labit lakil kuh koute teni.
Polien xil vus na Hi di pisen ni xa xi be eilep
e momal tengan lamerere ni.
Xi momal tevi xosali e vehakut.

Iahova misak ni moletin xil lanem usil sexien nan xil xa tellep.
Moletin xil lile kila xa hosien e esaeen nan mahulong pupu.
Xi di misa anien mi ngan xil xa di lamerere ni.
Ien tabong ni ti hitxatien te xeih nan xa tepol ni tetel xil.
Xi tepisen xeihen xa de hen mi moletin nan xil
melele xa tesa tan na moletin xil te kantri sav xil mei tehe nae.

E holesok xil vus xa Iahova di pol ni,
xi pol ni momal e misakras vamot e tova.
Rae xil ngasen nan, rakila raling nenesien nar en.
Rae nan xil iti vehakut, lasakras lakesae.
Moletin nan xil likila lihusil rae nan xil itel reitinen e momalen.
Hi tesak ni moletin nan xil, vexil temase.
Xi tepol ni hitxatien tei te xeih tetel xat xil xa misakras vameot vatei.
Hisen be eo e mahulong pupu.
10 Merereen mi Hi
be vatit metisouen.
Moletin xil xa lalong xat rae xil nan,
lanem kil holesok xil vus.
Bos xa risa memesien iha mini vehakut.
Copyright information for `TVK