Psalms 139

Ripet Rat His Hi xa Mikil Sen Suse Xil Nar

Suv toto Deved tetisi

O Iahova, opus sein holesok xil xa di tinok e okil kuh nou.
Okil nou e melele xa nadotan e melele xa natamea.
E okil sein nenemien xil navan, neta sav xosxa ode sotin.
Xouk okil nou melele xa di nakakao e melele xa di nangel.
Xouk okil kuh sexien navan xil.
Melele xa natasepin ti mu,
e xouk, Iahova, okil sepinien xil vus navan ngamu.

Xouk obe vioh xa di mikapis xol nou,
e del hem, di osikoe xol meulien navan.
Melele xa di nanem usil holesok xil xa di opol ni minou,
kilakilen ak eilep mak mu mili, nasakras nakil sein ni.

?Xosxa nihit nilesae ra Ninin nam, ma niha xave?
?Ut eah iaxa inou nikila niha en xa xouk otara ti en? !Ut tovuol!
Xosxa nimat e nihe ut nesao, xouk oda ngamu.
E xosxa nihe von maten pe huitan, e rute ak mun, nipus xouk en.
Xosxa nikila nixa niha vuma ... nituxoh rute xa eai mistal nggo en,
mu niha nite rute xa ba minu en,
10 e rute xalu ak mun, ti utiamu ni nou e ututou ni nou
vengan xa xouk oda tuei en.

11 Xosxa di nanemi nabit maluxoluken ikila isoson nou,
mu nakila namiles melengien mei vahe vongien, nisakras nixus ranuk.
12 Nisakras vengan xa vongien tamaluxoluk ni xouk ti.
Reitin, e ketehen nam, vongien nggoni melengien,
e maluxoluken nggoni miehen tang.

13 Xouk iaxa otepeas ni tenbok xil vus.
Melele xa nada tamu e vang ninok, xouk otepol ni nou.
14 Melele xa di nanem usil sexien xa otepol kuhi ni nou texo en,
natemanin ni e napet rat Hisom.
Nakil kuhi xa holesok xil vus xa di opol ni
bos mak mu mili.
15 Melele xa di natexus e natemeul e vang ninok,
e siuk xil di tamu tehiste,
16 xouk di otepus tenbok xa tenavisten kuhi ti mu.
Melengien xil vus xa oteling xati ve nou,
tetiamu ni ngan xa latepes nou,
xouk otetis xati ngamu tete vanuvei nam.

17 O Iahova, nenemien nam xil be mahulong pupu e nasakras nanem kil xil vus.
!Labe holu xa labe holu pupu!
18 Xosxa nisak pisi nihit nivuli xil,
ma vulien teni ihe holu mak mu ili suhon xil vus te ut etan.
Xosxa nivuli xil ha vuma ... nipat,
e melele xa nitamea, nita tamu visaluk.

19 O Hi, usak ni moletin xil xa iexil bei pupu tengan lavas vin nou, lihe reling nou.
Ieok bei pupu ni xa ovas vin moletin tesa xil.
20 Moletin xil ak di lasep sisiluk,
e di lasep purun Hisom.
21 O Iahova, inou di ieok minggat ngan xil xa iexil minggatuk,
ngan xil xa di lasin lelaxatien nam, lapuru tang pe metok.
22 Tinok pepang xat xil
e labe elu navan xil.

23 O Hi, uteketeh kuhi ihe meulien navan,
usak pis nou e ukil nenemien xil navan.
24 Xosxa ukameti xa di nanggusil suse te tesaen,
ma utel nou e suse hos nam xa da vehakut.
Copyright information for `TVK