Psalms 148

Holesok Xil Vus Ti Lipet Rat His Iahova

!Ripet rat his Iahova!

Xamim xa mudi e ut nesao
mupet rat his Iahova!
Reitin, xamim vanut masxaxa xil xa di mubae e rin nan,
ti mupet rat hisen.

Eai e aveti, mupet rati.
Hitu xil, mupet rat hisen.
Holesok xil xa mudi e tilang hat, mupet rati.
Momah xil, mupet rat hisen.
Xamim vus, ti mupet rat his Iahova,
vengan xi tepeas ni xamim texo raen.
Reitin, melele xa xi tesemaen ni, xamim muteha muteti kat e vonemim xati,
e musakras muli haxot xil xa Hi misa ni mi xamim.

Xamim vus xa mudi e tan,
itel holesok xil vus xa mudi e huinep te tas,
mupet rat his Iahova.
An xa di milangas e veta xa di mirum,
us xa mus e votiang xa bui nggeih,
xamim vus xa di munggusil raen,
mupet rat his Iahova.

Hu xil e vathu xil, ti mupet rat his Hi
itel vatiei xil xa di tim e ngan xil mun xa ladi xol suse.
10 Vongoro xil xa mumah e vuran xil mun, mupet rat hisen,
itel holesok sav xil xa di mukea e di mungga.

11 Suv toto xil e moletin sav sav xil, mupet rat his Hi;
itel vat e eilep savsav xil te ut etan.
12 Horam maxoe xil e atou maxoe xil mun, mupet rat hisen,
itel mometu e tovoli xil, e tutut horamue e atuli xil mun.

13 Holesok xil vus lipet rat his Iahova
vengan hisen kestang be nesao mak mu mili his sav xil.
Reitin, hisen be eilep mak mu e ut etan e ut nesao mun.
14 Xi misak ni moletin nan xil langgeih
tengan lipet rat hisen.
Xi di milaxat kuh mol-Isrel xil vengan xa eheien nan di e xil.

!Ripet rat his Iahova!
Copyright information for `TVK