Psalms 15

Sexien xil xa Hi ien bei

Suv toto Deved iaxa tetisi

?O Iahova, visi vari ihe vangit Nim Eo nam?
?Visi imot minuk e Vathu Saeon xa be hu eo nam?

Ngan xil xa kakaoen nae momal pe met Hi,
e di lapol ni sexien xil xa bos.
Io, ngan xil xa di lasepin ni sepinien te reitinen
xa nggo tine xa momal.
Ngan xil ak di lataseputut ti ni his mosav xil,
e di latapol ni ti neta vasa vaha mi tua nae xil,
e latasep sisil moletin nae xil ti.
Ngan xil ak lasin moletin tesa xil,
e lamerere ni ngan xil xa di langgusil xat Iahova del merereen.
Vehakut, di lapol usil naha xa labit xati,
tave ti neta xa be neta tei xa nggeih.
Xil di lamaen mani mi moletin sav xil
e latasis xil ti tengan lasa vatin mun vata xati.
E xil latamaen mosav xil ti laxal xil
tengan lapangei moletin tei xa tapol ni ti neta vasa.

Hisit moletin xil xa di lapol ni sexien hos xil ak,
neta tovuol vakila vaxeleal ni xil.
Copyright information for `TVK