Psalms 27

Kikeien te memesien

Iahova, xi be miehen navan e miteh meulien e nou.
Mak, ma uluk nakan ni mosav xil ti.
Xi miketeh xol nou tengan neta ti naxui nou.
?Ma, uluk ikan ni naha? Neta tovuol.

Melele xa moletin tesa xil limei tengan lihas vin nou,
Hi isak ni xil lilesae e lika talang, xil limot vari e suse.
Neta sav xosxa vanut moletin te vaeen limei likapis xol nou,
tinok namulul ti.
Xosxa ngan xil xa di laketeh misa ni nou limea lihit livae itel nou,
nenesien navan e Hi namot ti.

Nisis Iahova ve neta tei,
neta tei takes iaxa ieok bei.
Ieok bei mak mu tengan nite Nim Eo nan
vehakut e meulien navan.
E rute ak, metok ite Hi navan, ite hosien nan vehakut,
e nisisi ve tutouen.
E melengien te xeih xil, nixus pe he Hi.
Xi isikoe xol nou e Nim Eo nan
e ihur pilei nou e rute tei xa bos pupu.
Isak ni, nihas tan ni ngan xil xa labit livae itel nou.
Nisa sanien navan xil mi Iahova itel kikeien te sien,
nikikei mini e nimesi.

!Iahova, uteong ni nou melele xa nikesuk!
!Iem isae li e nou, e usa huit sisen navan.
Tinok miteong ni xouk melele xa obit, “!Amei visal nou!”
Mak ma, e tinok, inou nimei visaluk e nisis minuk.
Onaxus ti ra nou li.
Iem nat nou ti, e onasin nou ti, eloheoh nam.
Hi xa miteh meulien e nou, tetiamu, otetutou ni nou.
Ma, onastokovein nou ti ninatasok.
10 Tave ti neta xa tata e nana navan lalihe reling nou,
e xouk, Iahova, ulaxat kuh nou.
11 Hi Suv, upispisi mi nou ni naha xa iem bei tengan nipol ni,
e utel nou ralikakao e suse xa momal,
xa elu navan xil lasakras lavusil inou en.
12 Onamaen nou ti ninahe he ngan xil xa di labae del nou.
Xil di laluvos usil rin navan e vehakut di labiteni labit lihas nou.
13 E lasakras, vengan nake reitin xa ti nimeul
tengan nipus hosien xil na Hi e ut etan ak.

14 !Xamim muling nenesien namim e Hi Suv!
!Musoh ixeih, e munanexo ti!
Reitin, muling nenesien namim e Iahova kestang.
Copyright information for `TVK