Psalms 32

Ngan xil xa Hi miketeh bos ni xil lapolu ni sien

Suv toto Deved iaxa tetisi

Sien iti mi ngan xil xa Hi taketeh ti mun vasa mi xil ve tesaen nae,
mi moletin xil xa Hi tanem ti mun usil tesaen nae.
Sien iti mi ngan xil xa Iahova tavul xat xil ti ve sexien nae xil,
e ngan xil xa xi takamet ti luvosen e meulien nae.

Melele xa natnavit rat tesaen navan xil ti,
longpangasien tehas purun nou e tesak ni veok temel.
Melengien e vongien,
otesa pangasien minou.
Xeihen navan tehe reling nou
texoni nin xa mikesae e melele xa eai nggan nggeih.

Di, natehit rat tesaen navan minuk Iahova.
E natasoson ti mun tesaen navan xil ranuk.
Natenemi natehit nihit rat tesaen navan minuk,
e xouk mei uketeh ihos rilomun ni nou.

Ma, ngan xil xa di langgusil xatuk ti lisis minuk e melengien te xeih xil.
E melele xa longpangasien holu imea tengan vamuvul xat xil nggoni tahe xa mahulong, e napurun xil ti.
Xouk obe von xusen navan.
Di osikoe xol nou e melengien te xeih xil.
Inou nikikei minuk itel memesien vengan di odutou ni nou.

Di, Hi Suv biteni minou bit,
“Nipispisi ni xouk usil suse xa momal tengan uhusili.
E nisa nenemien hos minuk.
Ma, onapol ni vatxeihen nam ti naxoni hos tei
xa laling aean tei de vulongen tengan vapol ni vamah e vakakao vamal e suse.”

10 ?Mupusi? Moletin xil xa lapol ni sexien xil xa tamal ti, pangasien holu bemei e meulien nae.
E ngan xil xa laling neneisien nae e Iahova, eheien nan mikapis xol kuh xil.
11 Xamim xa mumal pe met Iahova, mulonge ihos e muhutahut.
!Xamim xa di mulong xati, mumeun ixeih itel sien.
Copyright information for `TVK