Psalms 6

Sisen ve tutouen na Hi e melengien te xeih xil

Suv toto Deved iaxa tetisi

O Iahova, iem nat nou ti e onavul xat nou ti.
Onameas pangas nou ti natel ekaten nam.
O Iahova, iem isae li e nou vengan veok memerou.
Usak pilei nou vengan leok di malili tova tang ve ulikanen.
Nenexoen di bas tan ni nou.
?O Iahova, vilieh vari usa huit sisen navan?

O Iahova, utilomun mei uteh meulien e nou li.
Ututou ni nou vengan esaeen nam mahulong.
Moletin xa mat misakras vanem xatuk.
?E visi vari mikila vapet rat hisom melele xa de vul te maten?

Di nadang xa nadang, e veok memel.
E vongien xil vus, simetok di mileh ba xat eilung mavan
e misak ni von paten navan memer tevi.
Nasakras naketeh vahos vengan xa metok mitep.
Nalonge misa pupu vengan moletin tesa xil di lapurun nou.

Muhe sotin ra nou, xamim xa di mupol ni tesaen holu,
vengan Iahova iaxa miteong ni tangen navan xil.
Melele xa nasis mini ve tutouen, Iahova milong nou,
e xi isa huit sisen navan.
10 Elu navan xil lihe unoun melele xa limei visal nou,
vengan Hi ihol rerat xil e isak ni xil lilesae itel ulikanen.
Copyright information for `TVK