Psalms 96

Iahova be Suv Toto te Holesok Xil Vus

1 Kronikel 16:23-33

!Rikikei ni sisien hu tei mi Iahova!
!Moletin xil vus te ut etan, mukikei mini!
!Mupet rat Iahova itel kikeien xil!
Melengien xil ngasen ti muhithiten longeongen hos xa xi teteh meulien e xir.
Muhit rat hosien nan e rute xil vus,
e polien tellep nan xil mun mi moletin xil ngasen.

Iahova bos pupu, e bos xa ti ripet rat hisen ihe nesao;
rimerere ni kestang; rinahusil ti hi sav xil.
Hi xil te ut sav xil labe neta sav tang,
e Iahova xa pol ni ut nesao be Hi reitin.
Xi be suv toto nar e miehen minahin xole;
Nim Eo nan polu ni xeihen e hosien nan.

Mumes Iahova, moletin xil ngasen te ut etan,
ve xeihen e miehen nan.
Mupet rat his Hi ihe nesao;
e muleh sanien xil namim imei e Nim Eo nan.
Mutingeiril pe met Hi xa be Hi Eo;
xamim vus e ut etan, muhe nin ni melele xa mumei visali.

10 !Muhit rati e ut xil ngasen xa Iahova be Suv Toto!
Hi duxol xat kuh ut etan, e neta tovuol vakila vaxeleal ni.
Hi ilepis moletin xil e rin xa momal.
11 Ut etan e tilang hat, lalhesi xalu.
Tas, itel holesok xil xa ladi en, lirum mi Hi.
12 Holesok xil vus xa ladi lameul e ut etan, limaal.
Vatiei xil e xol suse, likekei itel sien,
13 vengan xa Hi bemei tengan ihe suv toto e ut etan.
Hi ilaxat kuh moletin xil ngasen te ut etan,
ilepis xil itel momalen e reitinen.
Copyright information for `TVK